Ndida Eti Edu Uwem Nnọ Ikọ Ntiense
1 Ke n̄kaowo mfịn oro ananade ukpan, ediwak uyen ẹtahade uwem mmọ anafai anafai ke n̄kpọsọn̄ ibọk, oburobụt ido, nsọn̄ibuot, ye afai. Ke edide isio, eti edu uwem n̄kparawa owo oro odotde ẹkpebe ke esop Christian enem ndikụt onyụn̄ enen̄ede edi n̄kpọ uyai ọnọ Jehovah. Enye anam n̄kpọ nte okopodudu ikọ ntiense emi ekemede ndidụri mbon efen nnọ akpanikọ.—1 Pet. 2:12.
2 Ediwak ifiọkutom ẹwụt ẹte ke eti edu uwem mme uyen Christian esinyene eti utịp ke idem mbon oro ẹkụtde. Ke etịn̄de aban̄a uyen Ntiense emi ekedide eyen ukpepn̄kpọ esie, andikpep kiet ama ọdọhọ ofụri ubet ukpepn̄kpọ ete ke Abasi eyenan̄wan oro, Jehovah, edi ata Abasi. Enye eketịn̄ emi koro edu uwem eyenan̄wan emi ekesidide ukpono ukpono kpukpru ini. Andikpep efen ama ewet ọnọ N̄ka, ọdọhọde ete: “Ami n̄kpama nditoro mbufo mban̄a ndiye n̄kparawa owo oro mbufo ẹnyenede ke ido ukpono mbufo. . . . N̄kparawa mbufo ẹnen̄ede ẹdi uwụtn̄kpọ. Mmọ ẹkpokpono ikpọ owo mmọ, ẹtie in̄wan̄în̄wan̄ ẹnyụn̄ ẹsịne n̄kpọ ediye ediye. Ndien didie ke mmọ ẹfiọk Bible mmọ ntem! Oro ke akpanikọ edi ido ukpono!”
3 Eti edu uwem Ntiense edide isua itiaba ama otụk andikpep efen ke ubet ukpepn̄kpọ esie. Sụn̄sụn̄ ye eti ido eyeneren oro, emi akanamde enye edi n̄wọrọnda ke edide ata isio ye nditọiren eken, okodụri enye ada. Edida mme edinịm ke akpanikọ eke ido ukpono esie ke akpan n̄kpọ—enye ikokopke bụt ndidi isio ke ntak se enye enịmde ke akpanikọ—ama otụk enye. Enye ama ekeme ndikụt ke ẹma ẹnọ ubieresịt esie ukpep ye nte ke enye ekeme “ndidiọn̄ọ se ifọnde ye se idiọkde.” (Heb. 5:14) Ekem, eka eyeneren emi ama edi edise andikpep emi, ẹma ẹnyụn̄ ẹtọn̄ọ ukpepn̄kpọ Bible. Nte ini akade, andikpep oro ama ana baptism ekem akabade edi asiakusụn̄ ofụri ini!
4 Eti edu uwem Ntiense kiet ama otụk akparawa kiet ke ufọkn̄wed esie. Enye ekenen̄ede edi isio—ọfọn ido, esịn ifịk ekpep n̄kpọ, onyụn̄ esịne n̄kpọ nte ọfọnde kpukpru ini; n̄ko, ke mîbietke nditọiban eken, enye akanam ifụmke ke ima ye n̄kparawa. Enye ama ekeme ndikụt ke eyenan̄wan emi akada mme edumbet Bible odu uwem. Akparawa emi ama obụp enye mbụme aban̄a mme edinịm ke akpanikọ ido ukpono esie ndien se ekekpepde ama otụk enye. Enye ama ọtọn̄ọ ndikpep n̄kpọ, ana baptism ke mîbịghike, ndien ke akpatre abuana ke utom usiakusụn̄ ye ke utom Bethel.
5 Edieke afo edide uyen Christian emi oyomde ndinọ mbon efen eti ikọ ntiense, kpeme edu uwem fo ke kpukpru usụn̄. Kûdede utre ndidu ke ukpeme ebe ke ndima mme anana-ukpan edu, ekikere, m̀mê mme usụn̄ uwem ererimbot. Nịm edikon̄ uwụtn̄kpọ ke ikọ inua, usịnen̄kpọ, ye ukamaidem fo, idịghe n̄kukụre ke ini abuanade ke utom an̄wautom ye ke mme mbono esop Christian edi n̄ko ke ini odude ke ufọkn̄wed ye ke ini abuanade ke unọ idem nduọkodudu. (1 Tim. 4:12) Afo eyenyene ata idatesịt ke ini owo enyenede udọn̄ ke akpanikọ koro afo ‘esiyakde un̄wana fo ayama’ ebe ke eti edu uwem fo.—Matt. 5:16.