Ọfọn Didie Ntem Ndidụk Kpukpru Ini!
1 Ke ediwak isua ke N̄kan̄ Edem Usiahautịn Europe, ẹma ẹkpan ediwak ndima nditọete nnyịn ndisop idem an̄wan̄wa. Kere nte mmọ ẹkekopde idatesịt ke ini ẹkemende mme ukpan oro ẹfep, mmọ ẹkenyụn̄ ẹkemede ndisop idem ọtọkiet ke ifụre!
2 Esenyịn circuit kiet ama ewet aban̄a edika oro enye akakade ekese kiet ke otu utọ esop oro, ete: “Ke mbubịteyo Tuesday, ke ata ntọn̄ọ ntọn̄ọ edika n̄kese mi, ndutịm unam ufọk ofiop ama abiara. Ke an̄wa, eyo ama ekpere ndibịt nte ice, ndien esịt ufọk okofiop ke n̄kpọ nte Celsius 5 kpọt. Nditọete ẹma ẹtie ẹsịne kod mmọ, ẹwan̄ ekpan̄ itọn̄, ẹsịne ikpa ubọk, ẹyara itam, ẹnyụn̄ ẹsịne ikpọ ikpaukot mmọ. Baba owo kiet ikekemeke ndikụbọde Bible, sia owo mîkekemeke ndiwọn̄ọde mme ikọn̄ n̄wed. Ke mbot utịn̄ikọ oro n̄kesịnede suit nda, tuep ama anam mi n̄kpere n̄kpa, ndien kpukpru ini oro n̄ketịn̄de ikọ, mma n̄keme ndikụt uye oro ọkọwọrọde mi ke inua. Edi se ikotụkde mi ekedi nte ke ami n̄kokopke baba ikọ n̄kụni kiet. Nditọete ẹma ẹtịn̄ nte ekenemde onyụn̄ ọfọnde ndidu ke otu!” Nditọete oro ikakam ikereke-kere iban̄a editaba mbono esop oro!
3 Ndi Esitie Nnyịn Ntre ke Idem? Nte nnyịn imama ifet edisop idem ifụre ifụre ke mme mbono esop nnyịn eke urua ke urua? Mîdịghe nte nnyịn isida mme mbono esop didie didie ke ini mme idaha ẹfọnde? Ndidụk mme mbono esop kpukpru ini ekeme nditre ndidi mmemmem n̄kpọ, ndien mme ini ẹkeme ndidu ẹmi nnyịn inyenede eti ntak nditre ndidụk. Nte ededi, kûdede ufre nte ke odu mbon oro ẹdude ke otu nnyịn ẹmi edide kpa ye usọn̄, n̄kpọsọn̄ mfịna unana nsọn̄idem, ndo ikpọkidem, mfafaha ndutịm utom, ye ikpọ mbiomo eken ẹkụtde mme ufọn mbono esop ndien ẹsikpere ndidụk kpukpru ini. Nso nti uwụtn̄kpọ ke nnyịn inyene ntem ndikpebe!—Men Luke 2:37 domo.
4 Ẹyak nnyịn inam edi ido nnyịn ndinọ utuakibuot akpanikọ ibetedem ebe ke ndidụk kpukpru mbono esop Christian nnyịn, ọtọn̄ọde ke ekpri otu ukpepn̄kpọ n̄wed esịm akamba mbono. Ntak emi nnyịn ikpadade edidụk mme mboho ẹmi ke akpan n̄kpọ ntre? Koro enye edi ewụhọ Abasi ete nnyịn isisop idem ọtọkiet. Edi mme akpan ntak efen ẹdu. Kpukpru nnyịn imoyom mme ufọn ẹtode ukpepn̄kpọ Abasi ye un̄wam edisana spirit, ẹmi ẹsibọde ke mme mbono esop. (Matt. 18:20) Nsịnudọn̄ edem mbiba ke ini isopde idem ye nditọete nnyịn esibọp nnyịn.—Heb. 10:24, 25.
5 Ke ini edikpụhọde mbiet oro, Peter ọkọdọhọ ete, “Andikpep, ọfọn nnyịn ndidu mi.” (Luke 9:33) Ekpenyene nditie nnyịn ukem ntre ke idem kaban̄a kpukpru mbono esop Christian nnyịn. Ke akpanikọ, ọfọn didie ntem ndidụk kpukpru ini!