“Ndisuan N̄kpasịp Obio Ubọn̄” ke Mme Afan̄ Magazine
1 Ibuotikọ Ikwọ 133 ke Sing Praises to Jehovah edi “Sowing Kingdom Seed” (Ndisuan N̄kpasịp Obio Ubọn̄). Enye ọkọn̄ọ ke n̄ke Jesus oro emende utom unam mbet odomo ye edisuan n̄kpasịp. (Matt. 13:4-8, 19-23) Mme ikọ ikwọ oro ẹkot ẹte: “Udomo n̄kpasịp fo ẹmi ẹduọn̄ọde ke eti isọn̄/Ediwak ini ekeme ndikọn̄ọ ke afo.” Didie ke nnyịn ikeme ndinam uforo oro inyenede ke utom ukwọrọikọ awak? Usụn̄ kiet edi ke ndisiak afan̄ magazine nnyụn̄ nnam aka iso odu.
2 Ẹkeme ndiyọhọ ediwak uduak ebe ke afan̄ magazine. (1) Ediwaha ofụri ini ke kpukpru urua iba an̄wam fi ndikọri ufan ufan itie ebuana ye owo oro enyenede udọn̄. (2) Afo aka iso ndinọ owo oro etop oro anyan̄ade uwem emi esịnede ke Enyọn̄-Ukpeme ye Awake! kpukpru ini. (3) Ebede ke nneme fo afo emekeme ndin̄wam owo oro enyene udọn̄ ọnọ akpanikọ eke N̄wed Abasi, emi ekemede ndida n̄kesịm ukpepn̄kpọ Bible.—1 Pet. 2:2.
3 Nte Ẹkemede Nditọn̄ọ Afan̄ Magazine: Ini ekededi oro owo owụtde udọn̄ ke mme magazine, nam an̄wan̄a nte ke mme n̄wọrọnda ibuotikọ ẹdu ke kpukpru nsiondi ye nte ke afo ayama ndida mmọ nsọk enye kpukpru ini ke urua iba ẹbede. Ke ọkpọn̄de do, wet enyịn̄ ye adres owo oro, usenọfiọn̄ akawahade, usenọfiọn̄ mme nsiondi ẹmi enịmde, ibuotikọ oro okowụtde, ye ibuot nneme oro owo oro ekenen̄erede enyene udọn̄.
4 Afo emekeme nditọn̄ọ afan̄ magazine emi ibat ibat owo kpọt ẹdude. Ekem domo nditat enye ebe ke ndidian mbon efen oro afo ọnọde mme magazine. Nte afan̄ fo atarade, afo emekeme nditịm enye ntiene efakutom man otodo edi mmemmem ndikụre. Tịm nịm n̄wetnnịm n̄kpọ ban̄a mme nsiondi ekenịmde ke ediwaha kiet kiet ye ini ekenịmde. Wet n̄kpọ dian ban̄a nneme fo ye nte akpakade iso ofori udọn̄ owo oro ke akpanikọ ke ediwaha efen.
5 Sịn Mbon Mbubehe ye Mme Enyene-Ubọkọkọ: Ifiọk n̄kpọntịbe owụt nte ke eyedi mme enyene ufọkurua ye mme enyene-ubọkọkọ eken ẹkeme ndibọ mme magazine nnyịn kpukpru ini. Ebiowo kiet ama akam enyene ọbọn̄ obio mmọ ke afan̄ magazine esie. Asuanetop kiet ama ọtọn̄ọ ukpepn̄kpọ ye anyam n̄kpọ ubọpufọk emi edide isua 80 ke ama ekesida mme magazine ọsọk enye ke ofụri isua duop!
6 Eyenete an̄wan edide asiakusụn̄ ama odụk ufọkurua okosobo ebe ye n̄wan oro mîketịmke idara enye. Nte ededi, sia mmọ ẹma ẹkebọ mme magazine, enye ama ebiere ndisịn ebe ye n̄wan oro ke afan̄ magazine esie. Nte ini akade, eyenete an̄wan oro ama oyom nditre ndiwaha n̄kese mmọ koro mmọ ẹketiede ata nsọn̄ido nsọn̄ido ndien akananam ikenyeneke ekese nditịn̄, idem ke ini enye ekesibụpde mme mbụme ndifiọk ekikere mmọ. Edi eyenete an̄wan oro ama ọbọn̄ akam aban̄a n̄kpọ oro ndien ke akpatre ebe ye n̄wan oro ẹma ẹbọ n̄wed Ndidu Uwem ke Nsinsi. Ke ama okokot enye, n̄wanndọ oro ama ọdọhọ ete: “Ke akpatre, mmokụt akpanikọ!” Ẹma ẹtọn̄ọ ukpepn̄kpọ Bible, ndien ekem ebe ye n̄wan oro ẹma ẹna baptism. Nsịnifịk asiakusụn̄ oro ke akpanikọ ama on̄wụm eti mfri.
7 Ndinam Mme Mfiakn̄ka: Ke ini ọbọde obufa magazine, kot kpukpru ibuotikọ. Yom mme akpan n̄kpọ oro ẹdidemede udọn̄ owo kiet kiet emi odude ke afan̄ fo. Ekem ke ini afiakde aka, afo emekeme ndidọhọ: “Nte n̄kokotde ibuotikọ emi, mma n̄kere mban̄a fi ye nte ke afo emekeme ndinyene udọn̄ ke enye.” Mme asuanetop ẹdude ke kpukpru isua emana ẹkeme ndidara ndinyene afan̄ magazine. Idem ekpri eyen ekeme ndidọhọ: “Mmenem esịt ndifiak n̄kụt fi. Enyọn̄-Ukpeme ye Awake! fo eke ndondo emi ẹdisịm. Mmekere ke afo ayama ibuotikọ emi ọdọhọde . . .”
8 Demede udọn̄ nọ mme ibuotikọ oro ẹdidide ebe ke ndidụri ntịn̄enyịn n̄ka ekebe ẹkotde “Ke Nsiondi Nnyịn Efen.” Ke ini mme ibuotikọ ẹsan̄ade ke udịm ke udịm, sio emi wụt nyụn̄ sịn udọn̄ nọ andikot ete enye okûtaba ikpehe ndomokiet. Kûfre nte ke ini kiet kiet oro afo adade mme magazine ọsọk owo emi odude ke afan̄ magazine fo, emekeme ndibat mfiakn̄ka. Ndien ke akande kpukpru, ti ete ke utịtmbuba nnyịn edi ndinam mme ediwaha ẹmi ẹkabade ẹdi mme ukpepn̄kpọ Bible.
9 Waha Tiene Mme Owo Ẹdude ke Afan̄ Fo Ndien Ndien: Afo emekeme ndikụre afan̄ magazine fo ke ini ekededi oro odotde—ke usenubọk ufọturua, ke ufọt uwemeyo, ke ntọn̄ọ ntọn̄ọ mbubịteyo, m̀mê ke utịturua ke ama akanam utom eke ufọk ke ufọk ama. Edieke mûkemeke ndikụre afan̄ magazine fo ke ntak udọn̄ọ m̀mê ke ntak akade nduọkodudu, dọhọ asuanetop efen ke ubon fo m̀mê ke esop mbufo ada mme magazine ọsọk mme owo oro ọnọ fi. Ke usụn̄ oro, mbon oro ẹdude ke afan̄ fo iditreke ndinyene mme magazine mmọ ke ini.
10 Usụn̄ kiet ndisuan n̄kpasịp Obio Ubọn̄ edi ndida Enyọn̄-Ukpeme ye Awake! kpukpru ini nsọk kpukpru mbon oro ẹdude ke afan̄ magazine fo. Nte afo ekpepde mmọ akpanikọ N̄wed Abasi, mmọ ẹkeme ndifiọk se ikọ Obio Ubọn̄ ọwọrọde ndien ke akpatre ẹtiene fi ẹsion̄o mfri Obio Ubọn̄.—Matt. 13:8, 23.