“Kûsịn” Ndinam Mmọ Ẹdiọn̄ọ
1 Nnyịn iwụt unenikpe Abasi ke ini ibuanade ifịk ifịk ke utom ukwọrọikọ. Jehovah eteme nnyịn ete: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ekemede ndinam.” (N̄ke 3:27) Ana ẹtan̄a ọnọ-uwem ifiọk emi Jehovah enen̄erede ọnọ nnyịn ke ntatubọk mi. Ini kiet efen, ke ọfiọn̄ December ye January, nnyịn imenyene ifet ndin̄wam mbon efen ẹbọ ọnọ-uwem ifiọk ebe ke ndinọ mme otu n̄wed ke ata usụhọde etịbe.
2 Wụt Esịtekọm nọ Mme N̄wed: Mme n̄wed ẹmi ẹdọn̄ọ akpan ntọt oro mme owo ẹyomde usọp usọp. Mmọ ẹma ẹwụt udọn̄ ke enye in̄wan̄în̄wan̄ ke nte ẹkenamde n̄kpọ ke ini nnyịn ikọnọde mme n̄wed ẹmi akpa ini ke isua emi. Ọtọn̄ọde ke June esịm August, ẹma ẹnịm n̄wed 169,925 ke Nigeria ke ini san̄asan̄a ubịnikọt emi! Obufa n̄wakn̄kan ibat n̄wed 73,375 oro ẹkenịmde ke August ekedi n̄wakn̄kan tọn̄ọ ke 1982. Esịtekọm ekpenyene ndinụk nnyịn ndinyene ifiopesịt ke ndinọ mme n̄wed ẹmi inikiet efen.
3 Ekikere Ẹnọde ke se Ẹkpetịn̄de: “Ndi afo emenyịme nte ke kpa ye ido uwem okpụhọrede usọp usọp ntre mfịn, eyịghe onyụn̄ odude aban̄a ini iso nnyịn, ke nnyịn imoyom ndausụn̄ oro ẹkemede ndiberi edem ke uwem? [Bet ibọrọ.] Okposụkedi enye edide n̄wed oro ebịghide akan, Bible ọnọ eti item aban̄a udu uwem eyomfịn ye uwem ubon oro enemde.” Ekem kûbọde ka ibuot ye ikpehe ekikere oro odotde ke n̄wed oro ọnọde, nyụn̄ kot ikpehe ekikere kiet m̀mê iba. Kot 2 Timothy 3:16, 17. Nọ n̄wed, nam ndutịm ukpepn̄kpọ Bible mfọn nnyịn an̄wan̄a, nyụn̄ dọhọ ke imọn̄ inam iwụt nte ẹnịmde ukpepn̄kpọ edieke ini ayakde. Edieke okụtde ke ọyọfọn nditọn̄ọ ukpepn̄kpọ ke ediye uduot ekpri n̄wed Oyom, emekeme ndinam emi. Afo oyokụt mme ntọn̄ọikọ efen efen ẹmi ẹdotde ke page 8 ke mme nsiondi Utom Obio Ubọn̄ Nnyịn eke June ye July.
4 Ibat ibat owo ẹkot Bible, ndien ikam ifiọkke-fiọk mme edumbet esie kaban̄a uwem eke usen ke usen. Oyom mmọ ẹfiọk nte Ikọ Abasi ekemede ndinyene eti odudu ke uwem mmọ ye nte ke nditiene item oro enye ọnọde kaban̄a edinam akpanikọ, eti ido uwem, ye uwem ubon ekeme ndin̄wam mmọ ndiyọ mme mfịna eyomfịn. Nnyịn imekeme ndin̄wam mbon efen ndikpep mme akpanikọ ẹmi, edieke nnyịn mîsịnke ndida eti n̄kpọ nnọ mmọ eke ẹkpenyenede enye. Ẹyak nnyịn iwụt esịtekọm oro inyenede inọ utịbe utịbe ifet emi ebe ke ndinọ mme n̄wed emi ifịk ifịk ke December.