“Ẹme Ime”

¹ Nte nnyịn ikụtde utịt akani editịm n̄kpọ Satan etịmde asan̄a ekpere akan nte akanam edide, edi akpan n̄kpọ nnyịn ‘ndime ime’ ke adan̄aemi ibetde usen edinyan̄a Jehovah. Akpan akpan ke utịt ini emi, ndiọi odudu asua ẹbiere ndiwọn̄ọde ntịn̄enyịn nnyịn n̄kpọn̄ ata akpan eneni aban̄ade itie edikara Jehovah ẹnyụn̄ ẹda uwak ọkpọkpọ udọn̄ nnyịn ẹdomo nnyịn man ẹtịmerede nnyịn. Ke usụn̄ emi, Satan ayabian̄a nnyịn ikpa mba m̀mê itek ubọk ke utom ukwọrọikọ Obio Ubọn̄. (Jas. 5:7, 8; Matt. 24:13, 14) Ke nso mme usụn̄ ke nnyịn ikeme ndiwụt utọ ime oro ẹyomde mi?

² Ebe ke Ndifara ke Idem: Ke ini isobode unana udọn̄ m̀mê ubiọn̄ọ ke utom ukwọrọikọ nnyịn, mfara ke idem ayan̄wam nnyịn ndiyọ ke edikwọrọ ikọ. Nnyịn idisọpke ndikop ndịk m̀mê ndiyat esịt edieke isobode ye mme owo oro ẹtiede iyatesịt iyatesịt m̀mê oro mîwụtke mfọnido. (1 Pet. 2:23) Odudu esịtidem emi ekeme ndikpan nnyịn nditịn̄ idiọk ikọ mban̄a mme owo ke efakutom nnyịn ẹmi ẹwụtde unana udọn̄ m̀mê usua ẹban̄a utom nnyịn, idiọn̄ọde ite ke utọ ikọ oro ayanam idem emem nnyịn ye mbon oro ẹnamde utom ye nnyịn ke utom ukwọrọikọ.

³ Ebe ke Ndiyọ ke Ime: Ekeme ndinen̄ede nyom ime nto nnyịn ke ima ikenyene eti nneme ye owo ke an̄wautom, edieke nnyịn mîkemeke ndikụt owo oro ekenyenede udọn̄ ke ufọk aba. Edi ukem ntre edieke mbon oro nnyịn ikpepde n̄kpọ ye mmọ mîsọpke ndinam n̄kọri m̀mê ndida nnọ akpanikọ. Nte ededi, ọkpọsọn̄ ime emi esiwak ndinyene eti utịp. (Gal. 6:9) Eyenete an̄wan kiet ama anam mfiakn̄ka ediwak ini ọnọ n̄kaiferi kiet mbemiso ẹkenen̄erede ẹtọn̄ọ ukpepn̄kpọ Bible. Ke akpa mfiakn̄ka ition oro enye akanamde, n̄wan oro ọkọyọhọ ye mme utom efen. Ke ini enye akakade ọyọhọ ikotiokiet, akamba edịm ama ọbọn̄ enye ekesịm, ye unana enye ndikụt owo ndomokiet ke ufọk. Nte ededi, ke ebierede ndifiak nnọ n̄wan oro ifet inikiet efen, eyenete an̄wan oro ama afiak aka onyụn̄ okụt ete ke n̄wan oro ama odu ke mben̄eidem ndikpep n̄kpọ. Ke oro ebede, eyen ukpepn̄kpọ oro ama anam n̄kaiso n̄kọri ndien ke esisịt ini ayak uwem esie ọnọ Jehovah.

⁴ Nnyịn imọdiọn̄ọ ite ke usen Jehovah idibehe ini. Ntre nnyịn ibet mme edisu un̄wọn̄ọ esie, idiọn̄ọde ite ke ime Abasi oyon̄wụm eti mfri. (Hab. 2:3; 2 Pet. 3:9-15) Ana nnyịn inyene ime nte Jehovah enyenede inyụn̄ inaha ikpa mba ke utom ukwọrọikọ. Ke ẹsan̄ade “ke mbuọtidem ye ime,” ẹdori enyịn ke Jehovah ndinọ mbufo utịp ke ọkpọsọn̄ utom mbufo.—Heb. 6:10-12.