Nte Mme Andibuana ke Ubon Ẹdianade Kiet Man Ẹnyene Ọyọhọ Ebuana—Ke Mme Mbono Esop
1 Ana mme ubon Christian ẹnam ewụhọ eke edisop idem ọtọkiet ke mme mbono esop. (Heb. 10:24, 25) Ye eti edidianakiet, kpukpru owo ẹkeme ndikụt unen ke nditịm idem nnọ, ndidụk, ye ndibuana ke mme mbono esop. Mme idaha ubon ẹkpụhọde, edi mme n̄kpọ ẹdu oro ebe edide Christian, n̄wanndọ oro enịmde ke akpanikọ, m̀mê ete m̀mê eka oro ọbọkde nditọ ikpọn̄ ekemede ndinam man esịn udọn̄ ọnọ ubon ndinam mme n̄kpọ eke spirit ọtọkiet, inamke n̄kpọ m̀mê nso idi ibat nditọwọn̄ ke ufọk ye isua emana mmọ.—N̄ke 1:8.
2 Da Ini Tịm Idem: Mme andibuana ke ubon ẹdiana kiet ndikụt nte ke owo kiet kiet etịm idem nte odotde ọnọ mme mbono esop. Ediwak ubon ẹsikpep ibuotikọ Ukpepn̄kpọ Enyọn̄-Ukpeme eke urua ke urua ọtọkiet. Ndusụk ubon ẹsitịm idem ẹnọ Ukpepn̄kpọ N̄wed Esop mîdịghe ẹkot edikot Bible eke urua ke urua nte ubon. Uduak edi ndinyene mme akpan n̄kpọ ke ekikere mbemiso ẹdụkde mme mbono esop. Ke usụn̄ emi, kpukpru owo ẹyetịm ẹbọ ufọn ẹto se ẹkopde ẹyenyụn̄ ẹdu ke ntịmidem ndibuana ke ini ifet eberede ọnọ mmọ.—1 Tim. 4:15.
3 Nam Ndutịm Ndibuana: Kpukpru owo ke ubon ẹkpenyene ndinịm utịtmbuba ndinam mbon eken ẹdiọn̄ọ idotenyịn esie ebe ke ndinọ ibọrọ ke mme mbono esop. (Heb. 10:23) Ndi andibuana ke ubon oyom un̄wam m̀mê nsịnudọn̄ man anam emi? Nso un̄wam ke owo kiet kiet oyom man etịm se ẹnọde ẹnam ke Ufọkn̄wed Utom Ukara Abasi? Ibanndọ ẹsiwụt esịtekọm ke ini mme ebe mmọ ẹnyenede udọn̄, ndien ndusụk ẹnọde ekikere ẹban̄a uwụtn̄kpọ oro odotde m̀mê nte ẹkpetịmde. Iyomke mme ete ye eka ẹkere ke akpana itịm mme ikpehe edinam inọ n̄kpri nditọ mmimọ. Ndinam ntre idiyakke nditọwọn̄ ẹtịm se ẹnọde mmọ ẹnam ke idemmọ. Edi mme ete ye eka ẹkeme ndin̄wam n̄kpri owo mmọ ẹnyụn̄ ẹkpan̄ utọn̄ ke ini mmọ ẹnamde ndomonse uyo ọwọrọ.—Eph. 6:4.
4 Diomi Ndidụk: Ẹkeme ndinọ nditọ ukpep toto ke uyen ndisịne ọfọn̄ nnyụn̄ mben̄e idem ndika mbono esop ke ini oro ẹnịmde. Mme andibuana ke ubon ẹkpenyene ndidiana kiet ke ndinam mme utom esịtufọk man ubiatini okûdu.—Se mme ekikere oro ẹnọde ke n̄wed Inemesịt Ubon, page 112.
5 Mme ete ye eka ye nditọ ẹkeme nditie n̄kere mme ikọ Joshua eke eset, emi ọkọdọhọde ete: “Ama edi ami ye ufọk mi, nnyịn iyanam n̄kpọ Jehovah.” Biere ndien ndidiana kiet man ẹnyene ọyọhọ ebuana ke mme mbono esop.—Josh. 24:15.