Jehovah Ọnọ Nnyịn Ukpep
1 Ke idak ndausụn̄ Abasi, ndutịm unọ ukpep eke ofụri ererimbot ke aka iso idahaemi ke idụt 233. Idụhe n̄kpọ ndomokiet oro ererimbot emi enyenede ndinọ oro ẹkemede ndimen ndomo ye emi. Akwa Anditeme nnyịn, Jehovah, ke ekpep nnyịn usụn̄ udori idahaemi nte enye ọnọde nnyịn ukpep n̄ko eben̄e nsinsi uwem.—Isa. 30:20; 48:17.
2 Mme Ufọkn̄wed Ukpepn̄kpọ Abasi: Kere ban̄a mme ufọkn̄wed oro ẹnịmde idahaemi ke ufọn ikọt Jehovah. Ufọkn̄wed Utom Ukara Abasi, ẹnịmde ke urua ke urua ke n̄kpọ nte esop 87,000, ekpep ediwak miliọn mme asuanetop Obio Ubọn̄ ndidi mme asan̄autom eti mbụk ẹmi ẹnyenede uforo. Nte afo ama esịn enyịn̄ ke enye? Nte afo esịne ke otu ediwak tọsịn owo oro ẹkekade Ufọkn̄wed Utom Usiakusụn̄ oro ẹsinịmde ke urua iba? Iso-ọfọn usụhọde ibat hour oro ẹyomde ẹto mme asiakusụn̄ ofụri ini ayan̄wam ediwak owo ndisiak usụn̄ nnyụn̄ ndot ndika ufọkn̄wed emi. Ufọkn̄wed Unọ Mme Asan̄autom Ukpep oro ẹsinịmde ke ọfiọn̄ iba, oro ẹnịmde idahaemi ke mme akpan usem ke ofụri ererimbot, ke etịm mbiowo ye mme asan̄autom unamutom ẹmi mîdọhọ ndọ idem ndibiom mme mbiomo ukara Abasi ẹmi ẹkponde ẹkan. Ke ini ke ini, kpukpru mbiowo ye mme asan̄autom unamutom ẹsibọ san̄asan̄a ukpep ke Ufọkn̄wed Utom Obio Ubọn̄.
3 Ẹda mme ufọk oro ẹdude ke Itie Unọ Ukpep Enyọn̄-Ukpeme ke Patterson, New York, ndinịm mme san̄asan̄a ufọkn̄wed, ẹmi ẹnọde n̄kokon̄ ukpep ukara Abasi. Ukpepn̄kpọ ọfiọn̄ ition ke Ufọkn̄wed Enyọn̄-Ukpeme Ukpep Bible eke Gilead etịm mme asan̄autom idem ọnọ utom isụn̄utom ke esenidụt. Mme andibuana ke Kọmiti N̄kọk Itieutom ke ofụri ererimbot ẹsidụk ukpepn̄kpọ ọfiọn̄ iba kaban̄a ndutịm n̄kọk itieutom. Kpukpru asan̄autom Jehovah ke akpatre ẹsibọ eti ufọn ẹto ukpep oro Jehovah ọnọde ebe ke nsio nsio ufọkn̄wed ẹmi.
4 Ẹnọ Ukpep Kaban̄a Nso Uduak? Owo Otu Ukara kiet ọkọdọhọ ete: “Ẹdiomi ndutịm unọ ukpep nnyịn emi odude ke emi man anam ofụri ikọt Jehovah ke kpukpru ebiet ẹdisịm eti idaha edikọri nsịm ọyọhọ idaha oro ẹtịn̄de ẹban̄a ke Mme N̄ke 1:1-4.” Jehovah akpakam aka iso ndinọ nnyịn owo kiet kiet “edeme mmọ eke ẹkpepde n̄kpọ.”—Isa. 50:4.