Ekebe Mbụme

◼ Mme n̄wed ewe ke nnyịn ikpekpep mbufa owo mbemiso mmọ ẹnade baptism?

Mbemiso owo ekemede ndiyak uwem esie nnọ Jehovah nnyụn̄ nna baptism, ana enye enyene nnennen ifiọk. (John 17:3) Enye edinyene ntọt oro enye oyomde ebe ke ndikpep ediye uduot ekpri n̄wed Nso ke Abasi Oyom Oto Nnyịn? ye n̄wed Ifiọk Oro Adade Osịm Nsinsi Uwem. Ke ata ediwak idaha ẹdibem iso ẹkpep ediye uduot ekpri n̄wed Oyom. Nte ededi, edieke ẹketọn̄ọde ukpepn̄kpọ ke n̄wed Ifiọk, ẹkpenyene ndikpep ediye uduot ekpri n̄wed Oyom ke ẹma ẹkekpep n̄wed oro ẹkụre. Ntak ẹyomde ẹmi?

Ediye uduot ekpri n̄wed Oyom ọnọ mme akpan ukpepn̄kpọ Bible ke mbio mbio usụn̄. Edieke ẹbemde iso ẹkpep, enye ọyọnọ eyen ukpepn̄kpọ akpan ifiọk aban̄ade se ẹyomde man ẹnem Jehovah esịt. Edieke ẹkpepde akpatre, enye ayanam ẹfiak ẹdụn̄ọde se ẹkekpepde ke n̄wed Ifiọk. Ke ekededi, sịn udọn̄ nọ eyen ukpepn̄kpọ ndikot mme itien̄wed oro ẹnọde nsọn̄ọ nnyụn̄ ntie n̄kere mmọ. Kụt ete ke imosio akpan n̄kpọ ẹdude ke mme ndise iwụt, nte mmọ ẹdide mme n̄kpọ un̄wam ukpepn̄kpọ oro ẹtịmde ẹkụt unen.—Se Enyọn̄-Ukpeme eke January 15, 1997, page 16-17.

Ke ndondo oro eyen ukpepn̄kpọ Bible okụrede ndikpep n̄wed iba ẹmi, enye ekeme ndibọrọ kpukpru mbụme oro mbiowo ẹdidụn̄ọde ye enye ke ntịmidem nnọ baptism. Ke edide ntre, idiyomke ẹnịm ukpepn̄kpọ ye enye ke n̄wed efen ekededi, okposụkedi ada ukpepn̄kpọ oro akpakade iso ndinyene ufiop ufiop udọn̄ ke n̄kọri esie.—Se Enyọn̄-Ukpeme eke January 15, 1996, page 14, 17.

Ke n̄kan̄ eken, ẹkeme ndiyak eyen ukpepn̄kpọ enyenede esisịt ifiọkn̄wed ana baptism ke ama okokụre ediye uduot ekpri n̄wed Oyom, idem ọkpọkọm enye ikpepke n̄wed Ifiọk ikụre. Nte ededi, enye ekpenyene ndinyene eti ifiọk akpanikọ man ọfiọk onyụn̄ ekeme ndibọrọ mme mbụme ẹdude ke akpatre utịt utịt n̄wed Utom Nnyịn ẹnyenede mbon oro ẹyomde ndina baptism. Ke edide ntre, ẹkpenyene ndika iso n̄kpep n̄wed Ifiọk n̄kụre idem ke enye ama akana baptism.