Obufa Ndutịm Mbono Circuit

Nso nti ufọn ke afo ọbọ idahaemi oto ndisan̄a ye Jehovah? Didie ke afo ekeme ndibiọn̄ọ idomo edibịne mme n̄kpọ ẹmi mîdịghe eke ukara Abasi ẹnụk mme udọn̄ n̄kpọ Obio Ubọn̄ ẹsio ke akpa itie ke uwem fo? (Matt. 6:33) Nte ọsọn̄ fi ndifiọk se inende ye se ikwan̄ade ke ererimbot emi anamde ukwan̄ etie nte se inende? (Heb. 5:14) Ẹyeneme mme n̄kpọ ẹmi ke mbono circuit “Bọ Ufọn Idahaemi Ebe ke Ndisan̄a ke Usụn̄ Abasi,” editọn̄ọde ke January 2000.—Ps. 128:1.

Obufa ikpehe eke Saturday mbono circuit emi edidi edinam n̄wụt nte ẹkpenịmde Esoputom. Esenyịn circuit mbufo eyetịn̄ se ẹdiomide ọnọ mme esop man kpukpru owo ẹkeme ndidi ye mben̄eidem ndikop inem ndutịm oro ọyọhọ ọyọhọ.

Ikpehe emi ọdọhọde “Mme Asiakusụn̄—Ẹtịn̄ Enyịn Ẹkpeme Nte Ẹsan̄ade” oyowụt nnyịn nte ikemede ndinyene ọniọn̄ ye eti ibuot man ikeme ndidep ifet nnọ utom usiakusụn̄. (Eph. 5:15-17) Ibuot nneme emi “Ẹkpeme Idem ye Mme Usụn̄ Oro Ẹtiede Nte Ẹnen” eyekpep nnyịn nte ikemede ndifiọk se Abasi enyịmede ke kpukpru ikpehe uwem. Utịn̄ikọ oro “Nte Mme Ntịn̄nnịm Ikọ Oro Ẹsude Ẹtụkde Nnyịn” ayan̄wam ekikere ye esịt nnyịn ẹyọhọ ye ima ẹnyenede ẹnọ Ikọ Abasi. Utịn̄ikọ an̄wa “Usụn̄ Abasi—Ẹnyene Ufọn Adan̄a Didie!” ọyọsọn̄ọ etịn̄ mme ufọn oro ẹbọde idahaemi ẹto ndinam n̄kpọ n̄kekem ye ndinen n̄kpọ ẹmi Jehovah oyomde.

Nte edi udọn̄ fo ndiwụt an̄wan̄wa ke baptism mmọn̄ nte ke afo oyom ndisan̄a ke usụn̄ Abasi nte kiet ke otu mme asan̄autom esie ẹmi ẹyakde idem ẹnọ? Do neme ye esenyịn oro etiede ibuot man ẹkeme ndinam ndutịm oro ẹyomde.

Biere nditre nditaba ekemini mbono circuit emi. Dụk ofụri ndutịm usen iba oro, koro “ọfọfọn ọnọ kpukpru owo eke ẹbakde Jehovah; eke ẹsan̄ade ke usụn̄ esie.”—Ps. 128:1.