Buana ke Ubịnikọt Editobo Oro Okụtde Unen

¹ Okposụkedi ediwak owo ẹnanade udọn̄ ẹban̄a etop Obio Ubọn̄ ẹnyụn̄ ẹkopde inemesịt ke mme edinam ererimbot mmọ, mme ifiọk n̄kpọntịbe ẹwụt nte ke nnyịn imekeme ndida etop Bible oro ẹmịn̄de-mịn̄ n̄kan unana udọn̄. Usụn̄ kiet edi ke ndinọ mme editobo ke kpukpru ifet. Nte ededi, man ikeme ndinyene uforo, oyom owo enyene in̄wan̄în̄wan̄ edu, enịm ọkpọkpọ utịtmbuba, eneme mme nneme oro ẹnyenede ufọn, ada kpukpru ifet anam n̄kpọ nte ọfọnde, onyụn̄ enyene mme babru editobo.

² Nyene In̄wan̄în̄wan̄ Edu: Bible ọdọhọ ke Ecclesiastes 11:4 ete: “Owo eke ekpemede ofụm idisuanke n̄kpasịp, ndien owo eke esede ikpa-enyọn̄ idikpen̄eke.” Nnyịn ikpenyeneke ndibiere nte ke nnyịn idikemeke ndinọ editobo. Enye oyom ndinyene in̄wan̄în̄wan̄ edu ye nditiene nti ekikere ẹmi otu asan̄autom ọnọde. (Men Luke 5:4-6; Matthew 24:45-47 domo.) Eyenete emi okokopde nte mbiowo ẹsịnde udọn̄ ẹnọ edidụk utom usiakusụn̄ ama esịn n̄wed eben̄e. Enye ama enen̄ede okop inem utom tutu akaiso ndinam enye ke ọfiọn̄ oro eketienede. Ke ufan̄ ọfiọn̄ iba enye ama ọbọ editobo 79.

³ Nịm Utịtmbuba Oro Owụtde Eti Ibuot nọ Idemfo: Ediwak mbon oro ẹkekụtde unen akamba akamba ke ndinọ editobo ẹdọhọ ẹte ke ndinịm utịtmbuba oro owụtde eti ibuot ama enyene udeme ke mmọ ndikụt unen. Nnyịn imesịn udọn̄ inọ kpukpru owo ndinịm ọkpọkpọ utịtmbuba nnyụn̄ ndomo ndisịm enye.

⁴ Da Usụn̄ Nneme Oro Enyenede Ufọn: Ikụreke ke ndidọhọ mme owo nte ke mmọ ẹkeme ndibọ mme magazine ke ufọk mmọ ebe ke ukpeusụn̄. Demede udọn̄ mmọ kaban̄a se mmọ ẹkpedoride enyịn ndikụt. Nam nneme fo ekem ye mmọ. Ndusụk ekikere oro ẹnọde ẹdi ẹmi:

⁵ Ke ini ọnọde ikọ ntiense eke ufọk ke ufọk, afo ẹmekeme nditọn̄ọ nneme fo ke usụn̄ emi:

◼ “Mmọkọm-o, ami n̄kere _________________________. Ami nsan̄a nse mbọhọidụn̄ mi mfịn koro mmọfiọk nte ke ediwak mmọ ẹma ndikpan̄ utọn̄ nnọ mbụk n̄kpọntịbe. Ndusụk ekeme ndidi edi man ẹkpep n̄kpọ ẹto mmọ mîdịghe man ẹdu ke edidemede ẹban̄a n̄kpọndịk ekededi oro edide. Ndi afo ekere ntre? [Bet ibọrọ.] Mme magazine ẹmi ẹdọn̄ọ ekese mbụk n̄kpọntịbe ẹtode nsio nsio itie ke ererimbot ẹnyụn̄ ẹn̄wam nnyịn ndikpep mme n̄kpọ oro ẹnyenede ufọn nto mmọ. [Dụri ntịn̄enyịn enyeneufọk wụt n̄kpọ oro odotde emi ekemede ndidemede owo udọn̄ ndien ekem ka iso.] Edieke afo edimade, ami nyadara ndinam ndutịm man ẹsinọ fi mme nsiondi magazine emi efen kpukpru ọfiọn̄ ke ofụri isua kiet en̄wen.” Edieke ibọrọ ọfọnde, nọ editobo ke etịbe oro ẹsinọde.

⁶ Edieke afo osobode ye owo ke akpa ini, afo emekeme ndidọhọ ete:

◼ “Mmadara ndisobo ye afo. Ami n̄kere _________________________. Mmokụt nte ke nnanenyịn odu ke idụt nnyịn ye ediwak mme itie efen ke ererimbot. Emi anam ediwak owo ẹkere m̀mê usọbọ ekededi ekeme ndidu nnọ mme mfịna nnyịn tutu amama. Nte akanam afo emekere aban̄a emi? [Bet ibọrọ.] Mme magazine ẹmi ẹwụt ata eti usụn̄ ndikọk mme mfịna oro owo mîkekemeke ndikọk ke isua ikie ẹmi ẹbede. Ami nyadara ndinam ndutịm man ẹsinọ fi mbufa nsiondi kpukpru ọfiọn̄ ke ofụri isua kiet en̄wen ke etịbe edide ₦320.00. Mîdịghe, edieke afo oyomde ke ukpeusụn̄, ọyọbọ ke etịbe edide ₦450.00.” Diomi mfiakn̄ka.

⁷ Edieke afo ọfiọkde idaha uwem owo, afo emekeme ndida mbufiọk nnam etop fo okpụhọde ekekem man an̄wam enye okụt nte mme magazine ẹmi ẹnyenede ufọn. Afo emekeme ndiwụt enye mme n̄kpọ oro ẹdidemerede enye udọn̄ ke magazine oro. Ekem sian enye nte enye ye mbon ima esie ẹkemede ndidara mme utịbe utịbe edidiọn̄ ẹtode Abasi. Edieke enyeneufọk esemede aban̄a unana okụk, afo emekeme ndinọ enye mme idem magazine kiet kiet.

⁸ Da Kpukpru Ifet Oro Ẹbererede Nam N̄kpọ Nte Ọfọnde: Da kpukpru ifet oro ẹbererede nọ editobo. Kụt ete ke amabuana ke ubịnikọt editobo nte ubak edinam esop ke ọfiọn̄ emi. Ti ndinam n̄kpọ mban̄a mme ntọt edifiak ntobo ẹnọde ke mme editobo ẹkụrede. Afo emekeme ndinam ndutịm nditobo nnọ owo nte enọ. Emi enyene ufọn oro ebịghide akan mme enọ n̄kpọ obụkidem. Etop emi esịnede ke enye edi etop unyan̄a uwem. Emekeme ndinọ mbon oro ẹdude ke afan̄ magazine fo ye nditọ ukpepn̄kpọ Bible fo mme editobo n̄ko. Kụt ete imọnọ esop ibetedem ke ndutịm ẹnamde ẹnọ Usen Magazine (kpukpru Saturday).

⁹ Kûfụmi mme ifet edinọ mme editobo ke ini unọ ikọ ntiense ido nneme n̄ko. (Eccl. 11:6) Ubon eyenan̄wan edide isua inan̄ ama enyene esenowo. Usen kiet, ama ọdọn̄ esenowo oro ndikot n̄wed enye onyụn̄ eseme ete, “Nte n̄kpọ ndomokiet idụhe se ẹkotde ke ufọk emi?” Ekpri Ntiense emi, ọtọde ubọk ke ekikoi esie, ama ọsọsọp ọbọrọ ete, “Ọdọhọ, m̀mê n̄kpọ ndomokiet idụhe ndikot ke ufọk emi? Kam bet esisịt.” Enye ama efehe odụk ubet eka esie, ada akpakaha ọdọk onyụn̄ odorode eboho magazine eka esie, Enyọn̄-Ukpeme ye Awake! Enye ama ada mmọ ọsọk esenowo oro onyụn̄ ọdọhọ ete, “Se idahaemi m̀mê n̄kpọ ndomokiet idụhe ndikot!” Esenowo emi ama okop inem mme magazine ẹmi eti eti tutu eyen emi ọdọhọ ete: “Edieke afo oyomde, afo emekeme ndibọ mmọ ke ufọk fo ebe ke ukpeusụn̄.” Nso ikedi utịp? Enye ama ọbọ editobo iba!

¹⁰ Nọ Mme Editobo Ẹka ye Unana Ubiatini: Ẹkeme ndinam mme anditobo ẹnana udọn̄ edieke mmọ mîbọhọ n̄wed oro mmọ ẹketobode ke ata anyan ini. Nte ido edide, mbufa editobo oro ẹnọde ẹsọk N̄ka ididaha ediwak ọfiọn̄ mbemiso mme anditobo ẹtọn̄ọde ndibọ mme nsiondi. Edi ini ekeme ndinen̄ede nniọn̄ edieke ẹnọde mme editobo ẹsọk N̄ka ke idiọk ini. Ntak edi oro oyomde ẹyak mme babru editobo oro ẹma ẹkewet n̄kpọ ẹyọhọ ẹnọ esop ke mbono esop oro etienede. Eyenete oro esede n̄kpọ aban̄a editobo ekpenyene ndiwet n̄kpọ nyọhọ Weekly Subscriptions onyụn̄ ayak enye ọnọ ewetn̄wed emi edidụn̄ọrede ye ntịn̄enyịn, esịn ubọk, onyụn̄ ọnọ enye ẹsọk N̄ka kpa ke urua oro.

¹¹ Ke ini nnyịn owo kiet kiet inamde udeme nnyịn ke ubịnikọt editobo emi, nnyịn imenịm ke akpanikọ ite ke Jehovah ọyọdiọn̄ mme ukeme nnyịn.