Kpebe Unana Asari Jehovah
1 Jehovah ekere aban̄a mme owo. Enye ke unana asari eyenyịme owo ekededi emi anamde uduak esie. (Utom 10:34, 35) Ke ini Jesus ọkọkwọrọde ikọ ọnọ mme owo, enye n̄ko ikanamke asari. (Luke 20:21) Oyom nnyịn ikpebe uwụtn̄kpọ mmọ, ukem nte Paul, emi ekewetde ete: “Koro Ọbọn̄ kiet edide Ọbọn̄ mmọ kpukpru, onyụn̄ enyene ọyọhọ mfọnido ye kpukpru mmọ eke ẹsemede ẹkot enye.”—Rome 10:12.
2 Nditan̄a eti mbụk Obio Ubọn̄ Abasi nnọ kpukpru owo ẹmi isobode ọnọ Abasi ubọn̄. Ana nnyịn ika iso ndibuana utịbe utịbe etop emi ye mbon en̄wen, inamke n̄kpọ m̀mê nso idi orụk, idaha eke uwem, ifiọkn̄wed, m̀mê idaha eke okụk mmọ. (Rome 10:11-13) Emi ọwọrọ ndikwọrọ ikọ nnọ mbon oro ẹdikpan̄de utọn̄—irenowo, iban, n̄kparawa, ye mbonusọn̄. Oyom nnyịn iwaha kpukpru enyịnusụn̄ man inọ enyeneufọk kiet kiet ifet ndikop akpanikọ.
3 Nyene Udọn̄ ke Idem Kpukpru Owo: Utịtmbuba nnyịn edi ndisobo ye kpukpru owo ẹmi nnyịn ikemede. Ye emi ke ekikere, ndusụk asuanetop ẹmekụt unen ke ndinọ mme owo ikọ ntiense ke mme ọfis abiaibọk, mme ufọkibọk, mme ufọk ukpeme mbonusọn̄, mme ọfis ẹsede ẹban̄a mfọnọn̄kpọ owo, ye mme itie unam ukpụhọde. Adianade do, mme asuanetop ẹmekwọrọ ikọ ẹnọ mme anamutom itie unịm okpo, mme esenyịn ye ọnọitem ufọkn̄wed, ye mme ebiereikpe. Ke ini osobode ikpọ owo ukara, odot ndiwụt esịtekọm mban̄a nti utom ẹmi mmọ ẹnamde ke obio. Wụt ukpono, nyụn̄ sat mme ekemini ibuotikọ ẹmi ẹnyenede ebuana akpan akpan ye orụk utom mmọ ye mme mfịna ẹbuanade.
4 Ke idaha kiet, eyenete an̄wan ama odomo ndinyene nneme ye ebiereikpe kiet ke ọfis. Ke ẹma ẹkekụre inem inem nneme, enye ama etịn̄ ke idemesie ete: “Nte afo ọmọfiọk se inamde mma Mme Ntiense Jehovah? Mmọ ẹnyene mme edumbet oro ẹnyenede isọn̄ ẹmi mmọ mîwọn̄ọkede ikpọn̄.” Ẹma ẹnọ akwa owo ukara emi eti ikọ ntiense.
5 Nnyịn ikemeke ndifiọk se idude ke esịt mme owo. Nte ededi, ebede ke nditịn̄ ikọ ye kpukpru owo ẹmi nnyịn isobode, nnyịn iwụt mbuọtidem ke ukeme Abasi ndinọ utom nnyịn ndausụn̄. Ke adianade do, emi ọnọ mme owo ifet ndikop nnyụn̄ nnam n̄kpọ mban̄a etop idotenyịn oro. (1 Tim. 2:3, 4) Ẹyak nnyịn ida ini nnyịn inam n̄kpọ ye eti ibuot inyụn̄ idomo ndikpebe edu unana asari Jehovah ebe ke ndida eti mbụk nsọk kpukpru owo oro ikemede.—Rome 2:11; Eph. 5:1, 2.