Nso ke Afo Editịn̄ ye Owo Oro Mînịmke Edidu Abasi ke Akpanikọ?
1 Prọfesọ kiet otode Poland ọkọdọhọ isụn̄utom kiet ke Africa ete: “Ami ndi owo oro mînịmke edidu Abasi ke akpanikọ.” Nte ededi, eyenete an̄wan emi ama ekeme ndinyene nneme ye n̄wan oro onyụn̄ ọnọ enye n̄wed oro Life—How Did It Get Here? By Evolution or by Creation? Ke ini isụn̄utom emi akafiakde aka ke urua oro eketienede, prọfesọ oro ama ọdọhọ enye ete: “Ami ndịghe aba owo oro mînịmke edidu Abasi ke akpanikọ!” Enye ama okot n̄wed Creation ama onyụn̄ oyom ukpepn̄kpọ Bible. Nso ke afo ekeme ndinam man okụt unen ke ndinọ mbon ẹmi ẹdọhọde ke mmimọ inịmke edidu Abasi ke akpanikọ ikọ ntiense? Akpa kan̄a, kere ban̄a nsio nsio ntak ẹmi ẹnamde mme owo ẹdọhọ ntem.
2 Mme N̄kpọ Ẹtịpde Ẹsịn ke Unana Edinịm ke Akpanikọ: Idịghe kpukpru mbon oro mînịmke edidu Abasi ke akpanikọ ke ẹkebọk ntre. Ẹma ẹwụt ediwak mmọ orụk ido ukpono kiet ndien ini kiet ko mmọ ẹma ẹnịm edidu Abasi ke akpanikọ. Nte ededi, n̄kpọsọn̄ mfịna unana nsọn̄idem m̀mê eke ubon m̀mê ndusụk ukwan̄ikpe ẹmi mmọ ẹkesobode ẹma ẹnam mbuọtidem mmọ emem. Ye mbon eken, ukpepn̄kpọ ẹkpepde ke mme ufọkn̄wed ntaifiọk ẹma ẹtịmede ekikere mmọ kaban̄a Abasi. Tịm fiọk mme uwụtn̄kpọ mbon oro mîkenịmke edidu Abasi ke akpanikọ ẹtienede mi oro nte ini akade ẹkenen̄erede ẹnịm Jehovah Abasi ke akpanikọ ẹnyụn̄ ẹkabarede ẹdi Mme Ntiense esie.
3 N̄wan kiet ke Paris akamana ye udọn̄ọ mmeme ọkpọ. Okposụkedi akanade baptism nte owo Catholic, enye ọkọdọhọ ke imọ idi owo oro mînịmke edidu Abasi ke akpanikọ. Ke ini enye okobụpde mme nun ntak emi Abasi akayakde imọ imana ye utọ ndo oro, ibọrọ mmọ ekedi: “Koro enye amade fi.” Enye ama esịn ndinyịme utọ ndisịme ekikere oro. N̄ko, kere ban̄a akparawa otode Finland oro ẹkedụn̄ọrede ẹfiọk nte enyenede udọn̄ọ esịp emi mînyeneke usọbọ emi ẹkenyụn̄ ẹsịnde ke n̄kpọitie mbon n̄kpọnnam. Eka esie ama emen enye ebịne owo Pentecostal oro ọkọdọhọde nte ikọkde mme owo udọn̄ọ. Edi owo ikọkọkke udọn̄ọ esie ke utịbe utịbe usụn̄. Nte utịp, akparawa emi ama anana udọn̄ ke Abasi onyụn̄ akabade edi owo oro mînịmke edidu Abasi ke akpanikọ.
4 Ẹkebọk eren kiet ke Honduras nte Catholic edi enye ama ekpep ukpepn̄kpọ akwaifiọk ukara n̄kaowo ye unana edinịm edidu Abasi ke akpanikọ. Sia enịmde ukpepn̄kpọ ufọkn̄wed ntaifiọk oro nte ke ubonowo oforo oto unam, enye ama etre ndinịm Abasi ke akpanikọ. Ukem ntre, ẹkebọk n̄wan kiet ke United States nte owo Methodist. Ke akamba ufọkn̄wed, enye ekesikpep ukpepn̄kpọ aban̄ade ekikere. Didie ke emi okotụk edinịm ke akpanikọ esie? Enye ọkọdọhọ ete: “Ke ndaeyo kiet ẹma ẹbiat ofụri mbuọtidem oro n̄kenyenede ke ido ukpono.”
5 Ndisịm Esịt Mbon Oro Ẹnyenede Esịt Akpanikọ: Ediwak owo ẹmi ẹdọhọde ke mmimọ inịmke Abasi ke akpanikọ ẹkpema ndifiọk m̀mê usọbọ odu ọnọ mme mfịna unana nsọn̄idem, mfịna ke ubon, ukwan̄ikpe, ye ntre ntre eken. Mmọ ẹnen̄ede ẹnyene udọn̄ ndinyene ibọrọ nnọ mme utọ mbụme nte: ‘Ntak emi idiọkido odude?’ ‘Ntak emi ndiọi n̄kpọ ẹsitịbede ẹnọ nti owo?’ ye ‘Nso ke uwem ọwọrọ?’
6 Ẹkebọk ebe ye n̄wan ẹmi ẹdụn̄de ke Switzerland nte mbon oro mînịmke edidu Abasi ke akpanikọ. Ke akpa ini oro ẹkedade akpanikọ ẹsọk mmọ, mmọ ẹkenam n̄kpọ etikwo etikwo. Edi mmọ ẹma ẹnyene n̄kpọsọn̄ mfịna ke ubon ndien ke ẹkekere ẹban̄a usiondọ. Ke ini Ntiense oro akafiakde awaha, enye ama owụt n̄wan ye ebe oro ke Bible nte ẹkpekande mme mfịna mmọ. Idem ama akpa ebe ye n̄wan oro aban̄a nti item ẹmi ẹsịnede ke N̄wed Abasi, ndien mmọ ẹma ẹnyịme ukpepn̄kpọ Bible. Ẹma ẹsọn̄ọ ndọ mmọ, mmọ ẹma ẹkọri ke n̄kan̄ eke spirit, ẹnyụn̄ ẹna baptism.
7 Se Ekemede Nditịn̄ ye Owo Emi Mînịmke Edidu Abasi ke Akpanikọ: Ke ini owo ọdọhọde fi ke imọ inịmke edidu Abasi ke akpanikọ, domo ndifiọk ntak emi enye etịn̄de ntre. Nte edi ke ntak ukpep emi enye ọbọde, mfịna ẹmi enye osobode, m̀mê mbubịk ido ukpono ye nsunsu ukpepn̄kpo oro enye okụtde? Afo emekeme ndibụp enye: “Nte afo esisụk ekere ntre kpukpru ini?” mîdịghe “Ntak emi afo ebierede ntre?” Ibọrọ esie ayan̄wam fi ndibiere se editịn̄de. Ke ini ẹyomde edinam an̄wan̄a oro okopde odudu, n̄wed oro Is There a Creator Who Cares About You? ekeme ndidi nnennen n̄wed oro ẹyomde.
8 Afo emekeme ndika iso ke nneme ye owo oro mînịmke edidu Abasi ke akpanikọ ebe ke ndibụp:
◼ “Nte akanam afo emekere ete: ‘Edieke Abasi odude, ntak emi ndutụhọ ye ukwan̄ikpe ẹyọhọde ntem ke ererimbot?’ [Bet ibọrọ] Nte mmekeme ndiwụt fi ekikere Bible ke ibuot nneme emi?” Kot Jeremiah 10:23. Ke ama okokot ama, bụp ekikere esie kaban̄a itien̄wed oro. Ekem wụt enye page 16 ye 17 ke ediye uduot ekpri n̄wed oro Will There Ever Be a World Without War? Mîdịghe afo emekeme ndida ibuot 10 eke n̄wed Creator. Dọhọ enye ọbọ n̄wed oro onyụn̄ okot enye.—Ke oyomde mme ekikere efen efen, se n̄wed Reasoning, page 150-151.
9 Nte ẹnyịmede, idịghe kpukpru owo oro mînịmke edidu Abasi ke akpanikọ ẹdinyịme akpanikọ. Edi odu ediwak ẹmi ẹdimade ekikere en̄wen. Da mbufiọk, mbukpek ye, ke akande kpukpru odudu ikọ Abasi ndin̄wam mme owo ẹkụt akpanikọ.—Utom 28:23, 24; Heb. 4:12.