‘Nso ke Ami N̄keme Ndinam?’
1 ‘Nso ke ami n̄keme ndinam?’ Eyịghe idụhe nte ke mbụme oro ama odu ke ekikere mme andibuana ke ekpri otu ukpepn̄kpọ Bible oro Charles Taze Russell eketịmde ke mme iduọk isua 1870. Nte mmọ ẹkekọride ke ifiọk uduak Abasi, anaedi akpa nditọ ukpepn̄kpọ oro ẹma ẹkere se mmọ ẹkpenamde ndin̄wam mbon en̄wen ẹkpep uduak Abasi. Ndinam ifiọk oro mmọ ẹkenyenede esịm ofụri ererimbot ekenen̄ede edi akamba utom.
2 Ke mfọniso nnyịn, mmọ ẹma ẹkan n̄kpọ-ata oro. Didie? Owo kiet kiet ama anam udeme esie oro eketiede nte ata ekpri, ke ntak oro ẹdiọn̄ọ Mme Ntiense Jehovah mfịn ke ofụri ererimbot—kpa esop emi enyenede se ikperede ndisịm mme anditan̄a Obio Ubọn̄ miliọn itiokiet, ẹnamde utom ke n̄kpọ nte esop 90,000 ke idụt ye isuo inyan̄ibom 234!—Isa. 60:22.
3 Nọ Ọyọhọ Ibetedem Fo: Edi akpan n̄kpọ owo nnyịn kiet kiet ndinyene ndusụk ebuana ke akwa utom oro Jesus ekebemde iso etịn̄ nte ẹdinamde ke ukperedem ini emi. (Mark 13:10) Ke akpanikọ owo ikemeke ndiyak utom emi ofụri ofụri nnọ mbiowo ẹmi mîwakke; inyụn̄ idịghe mme asiakusụn̄ ikpọn̄ ẹbiom mbiomo utom ukwọrọikọ. Ke nditịm ntịn̄, kpukpru Christian oro ẹma ẹkeyak idem ẹnọ ẹnyene akpan udeme ke utom emi. Kpukpru nnyịn imekeme ndibuana ke ndusụk orụk utom ukwọrọikọ. (1 Tim. 1:12) Adan̄a nte nnyịn inamde emi, ntre ke nnyịn ida ufọn isọk idem nnyịn ye mbon en̄wen.—1 Tim. 4:16.
4 Owo kiet kiet n̄ko ekeme ndinọ itie nditọete Christian ọyọhọ ibetedem ke mme n̄wọrọnda usụn̄ efen. Nnyịn imekeme ndinọ mme mbono esop ibetedem ebe ke ndidụk kpukpru ini nnyụn̄ ntiene mbuana ufiop ufiop. (Ps. 122:1, 8, 9) Nnyịn imekeme ndinam udeme nnyịn ndinịm esop asana ke n̄kan̄ ido uwem. Nnyịn imekeme ndinọ utom ofụri ererimbot ibetedem ke n̄kan̄ okụk, nte ekemde ye ukeme nnyịn. Nnyịn imekeme ndibuana ke ndinam Ufọkmbono Obio Ubọn̄ asana. Kpukpru owo ẹkeme ndisịn udọn̄ nnọ ufiop ufiop edu ima ye edidianakiet ke esop ebe ke ndin̄wam mbufa owo, n̄kpri owo, ye ikpọ owo.—Col. 3:12, 14.
5 Ntre afo emekeme ndibụp ete, ‘Nso ke ami n̄keme ndinam?’ Okposụkedi ọkpọkpọ ukeme fo ekemede nditie nte ikponke, ebede ke ndinam udeme fo, afo emetịp esịn ke ndinam esop ọsọn̄ idem, okop odudu, onyụn̄ enyene ifịk. Ntem kpukpru nnyịn imenyene udeme ke ndikpono enyịn̄ Jehovah!