Ben̄e Un̄wam
1 Mme ikọ eke odudu spirit oro, “ẹsọn̄de ndise mban̄a,” ẹtịn̄ nte odotde ẹban̄a ndiọkeyo nnyịn. (2 Tim. 3:1, NW) Ntem, nso ke afo ekeme ndinam ke ini afo osobode n̄kpọsọn̄ n̄kpọ-ata eke spirit oro afo ekemede ndikere ke afo utịmke idem ọfọn ndise mban̄a?
2 Nte afo eyenyịme nditịn̄ nnọ andibuana ke esop oro ama ọkọkọri esịm ọyọhọ idaha ke n̄kan̄ eke spirit? Ndusụk owo ẹkeme ndimen̄e ndinam ntre ke ntak o-bụt, ke ntak mîyomke ndidori owo mbiomo, m̀mê ke ntak ẹyịkde nte ke owo ekededi ekeme ndin̄wam. Ke akpanikọ, nnyịn ikpenyene ndida ofụri ukeme nnyịn ndomo ndise mban̄a mme ọkpọkpọ mbiomo nnyịn, edi akpana nnyịn inyene ifụre ndiyom un̄wam ke mme n̄kpọ ẹbuanade mfọnọn̄kpọ eke spirit nnyịn.—Gal. 6:2, 5.
3 Ebiet Ẹkpetọn̄ọde: Afo emekeme ndika mbịne ada ukpepn̄kpọ n̄wed fo n̄keben̄e m̀mê afo emekeme ndisan̄a ye enye ke utom an̄wautom. Emi ọyọnọ fi ifet ndinam enye ọdiọn̄ọ udọn̄ fo ndikọri ke n̄kan̄ eke spirit. Edieke enye edide asan̄autom unamutom, nam enye ọfiọk un̄wam oro afo oyomde ke n̄kan̄ eke spirit ndien enye ọyọdọhọ mbiowo ẹn̄wam fi. Mîdịghe afo emekeme ndika mbịne ebiowo ekededi kaban̄a mme n̄kpọ ẹfịnade fi.
4 Nso utọ un̄wam ke afo oyom? Nte odu n̄kpọ oro anamde ifịk fo ebịt? Nte afo edi ete m̀mê eka oro ọbọkde nditọ ikpọn̄ oro odomode ndinam nditọ fo ẹsọn̄ọ ẹdu ke esop? Nte afo ọmọsọn̄ onyụn̄ oyom un̄wam? Mîdịghe nte odu ndusụk mfịna oro ẹnamde idem emem fi? Ndise mban̄a ndiọkeyo nnyịn ekeme ndisọn̄—edi isọn̄ke ikan owo. Un̄wam odu.
5 Nte Mbiowo Ẹn̄wamde: Mbiowo ẹnen̄ede ẹkere ẹban̄a. Mmọ ẹyekpan̄ utọn̄ ẹnọ mme mfịna fo. Edieke mme asuanetop en̄wen ẹsobode mme ukem n̄kpọ ubiọn̄ọ ẹmi, mbiowo ẹyese ẹban̄a ẹmi nte mmọ ẹbọkde erọn̄ ẹnyụn̄ ẹnọde esop ukpep. Nte mbon oro ẹdide ‘uwụtn̄kpọ ẹnọ otuerọn̄,’ mmọ ẹben̄e idem ndinam utom ye afo ke idatesịt. (1 Pet. 5:3) Ndikpan̄ utọn̄ nnọ nditọete ẹmi ẹnyenede mbufiọk mi, nte mmọ ẹkọkde ibuot ke mme edumbet Bible, ekeme ndifori utom ukwọrọikọ fo onyụn̄ an̄wam fi ke ọkpọkpọ uwem fo.—2 Tim. 3:16, 17.
6 Jesus ọmọnọ nnyịn ediwak “enọ ẹmi ẹdide mme owo.” (Eph. 4:8, ik. id. NW) Emi ọwọrọ ete ke mbiowo ẹnam utom ẹnọ fi. Mmọ ẹdu man ẹn̄wam fi. Ke nditịm ntịn̄, mmọ ‘ẹnyene fi.’ (1 Cor. 3:21-23) Ke ntre, utu ke ndidedịp, sio tịn̄. Ben̄e un̄wam oro afo oyomde.