“N̄wana Eti En̄wan Mbuọtidem”
1 Apostle Paul ọkọnọ Timothy item ete ‘an̄wana eti en̄wan mbuọtidem.’ (1 Tim. 6:12) Paul ke idemesie ama odu uwem ekekem ye mme ikọ oro. Ke utịt utịt uwem esie, enye ama etịn̄ ye nsọn̄ọ ete ke imọ ke idem imọ ima in̄wana eti en̄wan. (2 Tim. 4:6-8) Ke kpukpru usụn̄ enye ama anam utom ukwọrọikọ ye uko, ye ediyọ. Ke ndikpebe uwụtn̄kpọ esie, nnyịn imekeme ndinyene ukem nsọn̄ọ oro nte ke nnyịn ke inam ofụri se ikemede ke en̄wan oro in̄wanade iban̄a mbuọtidem Christian.
2 Sịn Ukeme Oro Oyomde: Paul ama anam utom ọkpọsọn̄ ke utom ukwọrọikọ. (1 Cor. 15:10) Kpa ntre ke edi ye nnyịn nte nnyịn iyomde kpukpru mbon oro ẹdotde ke efakutom nnyịn. (Matt. 10:11) Man isịm ndusụk mmọ, ekeme ndiyom nnyịn ibabak idemede man inọ mbon oro nnyịn isobode ke efak ikọ ntiense. Mîdịghe ekeme ndiyom inam utom ke ufọt uwemeyo m̀mê ke ntọn̄ọ ntọn̄ọ mbubịteyo man isobo ye mme owo ke mmọ ẹma ẹkenyọn̄ọ ẹsịm ufọk mmọ.
3 Oyom edinọ idem ntụnọ ye eti ndutịm man isịm ke eti ini ke ini isopde idem ye otu ukpepn̄kpọ n̄wed nnyịn kaban̄a an̄wautom. Ke uwụtn̄kpọ, ndusụk ke otu mme andibuana ke ubon Bethel ẹsisan̄a n̄kpọ nte minit 60 ke uka ye unyọn̄ọ man ẹkebuana ke utom ukwọrọikọ ke mme utịturua ye mme esop oro ẹdemede mmọ ẹdọn̄. N̄ko, nnyịn imekeme ndima ndusụk asuanetop ye mme ubon ke esop nnyịn oro ẹsisan̄ade ata anyan usụn̄ edi ẹdide ẹdisịm ke ini. Mme utọ uwụtn̄kpọ nsịnifịk ye ọkpọkpọ ndutịm oro ẹdot ẹkpebe.
4 Ekpenyene ndinụk nnyịn ndifiak ntiene kpukpru udọn̄ oro ikokụtde. Idem ke ini inịmde n̄wed ke efak m̀mê ke ini inọde ikọ ntiense ido nneme, oyom nnyịn isịn ukeme ndibọ adres m̀mê nọmba urụk ukopikọ owo oro. Ekem nnyịn imekeme ndisobo ye enye man inam udọn̄ oro ọkọri inyụn̄ idomo nditọn̄ọ ukpepn̄kpọ Bible.
5 Buana Kpukpru Ini ke Utom Ukwọrọikọ: Paul ama enyene iwụk onyụn̄ ọkwọrọ ikọ ọyọhọ ọyọhọ. (Rome 15:19) Nso kaban̄a fi? Nte afo emesibuana kpukpru ini ke utom ukwọrọikọ? Nte afo amabuana ke an̄wautom ọfiọn̄ emi? Mme ada Ukpepn̄kpọ N̄wed Esop ẹnyene udọn̄ ndikụt nte ke kpukpru owo ke otu mmọ ẹbuana ke utom ukwọrọikọ ke ọfiọn̄ August. Mmọ ẹyen̄wam fi ndinam ntre.
6 Ebede ke ndikpebe uwụtn̄kpọ Paul ke ndinọ eti mbụk ibetedem ọyọhọ ọyọhọ, nnyịn iyaka iso ‘ndin̄wana eti en̄wan mbuọtidem.’