“Obufa Tọsịn Isua—Nso ke Ini Iso Akama ọnọ Fi?”
1 Mbụme oro odu ke ekikere mme owo ke ofụri isọn̄. Okposụkedi ubonowo anamde ekese ke ediwak isua ikie oro ẹbede, mme owo ẹmeduọk idotenyịn koro mme akpan mfịna oro ẹnọmọde owo ke ediwak tọsịn isua ẹsụk ẹdodu. (Job 14:1; Ps. 90:10) M̀mọ̀n̄ ke ubonowo ekeme ndikụt nduọkodudu?
2 Ke ọfiọn̄ October ye November, nnyịn iyenyene san̄asan̄a ifet ndinọ mme mbọhọidụn̄ nnyịn ibọrọ mbụme emi. Didie? Ebe ke ndisuan Mbụk Obio Ubọn̄ Nọ. 36. Ibuotikọ esie edi “Obufa Tọsịn Isua—Nso ke Ini Iso Akama ọnọ Fi?” Ke akpa urua iba ke October, nnyịn idinọ magazine Enyọn̄-Ukpeme ye Awake! Ekem ọtọn̄ọde ke Monday, October 16, esịm Friday, November 17, nnyịn iyabuana ke ifịk ifịk edisuan Mbụk Obio Ubọn̄ Nọ. 36. Ke ini ubịnikọt emi, nnyịn iyowụk ntịn̄enyịn ke ndisuan Mbụk Obio Ubọn̄ Nọ. 36 ke ufọturua. Ke utịturua, nnyịn iyọnọ enye ọkọrọ ye mme magazine ndondo emi.
3 Nte Afo Eyenyene Ọyọhọ Ebuana? Mbiowo, mme asan̄autom unamutom, ye mme asiakusụn̄ ẹdida usụn̄ ke ubịnikọt emi, sia mmọ ẹdade iso ke utom emi. Ediwak mme asuanetop ẹmenam ukpụhọde ke mme idaha mmọ ndinam usiakusụn̄ unọ un̄wam ke ọfiọn̄ kiet m̀mê iba oro ẹdinamde ubịnikọt emi. Mbon efen ẹdiomi ndisịn ini efen efen ke utom ukwọrọikọ n̄kan nte ẹsinamde.
4 Mme ada Ukpepn̄kpọ N̄wed Esop ẹkeme ndin̄wam ke ndisịn udọn̄ nnọ andibuana kiet kiet ke otu mmọ ndinyene ọyọhọ ebuana ke ndisuan Mbụk Obio Ubọn̄ Nọ. 36. Ekeme ndidi odu ndusụk asuanetop oro mînamke aba utom ukwọrọikọ. Mbiowo ẹkpenyene ndika n̄kese mmọ emi man ẹse se ẹkemede ndinam ndin̄wam mmọ. Ndusụk ẹkeme ndinam ndutịm asuanetop emi enyenede mbufiọk ndisan̄a ye owo kiet kiet oro mînamke aba utom ke an̄wautom ke mme ọfiọn̄ emi. Mmemmem nneme Mbụk Obio Ubọn̄ Nọ. 36 ekeme ndidi n̄kukụre se ẹyomde man ẹn̄wam mme asuanetop emi ẹfiak ẹtọn̄ọ utom.
5 Emi n̄ko eyedi eti ifet ọnọ nditọ ukpepn̄kpọ Bible oro ẹkperede ndikụre n̄wed Ifiọk oro ẹnyụn̄ ẹdotde nte mme asuanetop oro mînaha baptism nditọn̄ọ ndibuana ke utom ukwọrọikọ. Idem n̄kpri owo ẹkeme ndinyene eti ebuana ke aduai-owo-idem utom emi.
6 Mmemmem nneme edi n̄kukụre se ẹyomde. Afo emekeme ndidọhọ:
◼ “Mmenyịme ndida ini mi n̄n̄wam ndisuan ata akpan etop emi nnọ kpukpru ubon ke [siak enyịn̄ obio]. Okwo edi emi. Mbọk kot enye.” Ndusụk owo ẹkeme ndimek nditre ndikama ekpat ukwọrọikọ ke ini ẹsuande Mbụk Obio Ubọn̄ Nọ. 36.
7 Mme Mbono An̄wautom Oro Ẹnen̄erede Ẹtịm: Ana mbiowo ẹkụt ẹte ke ndutịm an̄wautom edi se iferede owo ke idem inyụn̄ inyenede ufọn. Esenyịn utom akpan akpan ekpenyene ndikụt nte ke ediwak efakutom eke ufọk ke ufọk ye eke itie unam mbubehe odu man kpukpru owo ẹkeme ndibuana ọyọhọ ọyọhọ ke utom emi. Ke ebiet ekededi oro ẹkemede, ẹkpenyene ndidiomi mme mbono an̄wautom ke usen ufọturua kiet kiet, ke mme utịturua, ye ke mbubịteyo. Ẹkeme ndinam ndutịm ndisobo ke utịt utịt uwemeyo ke ntak nditọ ufọkn̄wed, mme anamutom oro ẹkpụhọde-kpụhọ ini, ye mbon efen.
8 Se Ẹkpenamde Ẹban̄a Mme Ufọk Emi Owo Mîdụhe: Utịtmbuba nnyịn edi nditịn̄ ikọ nnọ adan̄a ediwak enyeneufọk nte ikekeme. Edieke owo ndomokiet mîdụhe ke ufọk ke ini akade, wet adres nịm nyụn̄ fiak ka ini en̄wen. Edieke mûkwe unen ke ndisobo mme enyeneufọk emi ke akpatre urua ubịnikọt emi, afo emekeme ndinịm idem Mbụk Obio Ubọn̄ Nọ. 36 kiet nnọ mmọ ke ebiet emi andisan̄a mbe mîdikwe. Mbiowo n̄kann̄kụk ẹkeme nditeme esop ndiyak idem Mbụk Obio Ubọn̄ Nọ. 36 kiet nnịm ke ufọk emi owo mîdụhe ke akpa ediwaha ke ini ẹnamde utom ke mme obio-in̄wan̄ ye mme ebiet emi efakutom okponde akan se ẹkemede ndikụre ke ini ubịnikọt oro.
9 Yak Iyọhọ ye Utom! Mme esop ẹkpenyene ndidomo ndikụre efakutom mmọ mbemiso ubịnikọt emi etrede ke November 17. Edieke efakutom mbufo enen̄erede okpon, ndusụk asuanetop ẹkeme ndinam utom ikpọn̄ ke ebiet emi ọfọnde onyụn̄ edide ifụre ifụre. Ndutịm emi ayanam edi mmemmem ndisịm ediwak mbon oro ẹdotde nte ẹkekeme. Kụt ete ke imenịm eti n̄wetnnịm n̄kpọ iban̄a kpukpru ebiet oro okokụtde udọn̄.
10 Mbiowo ẹkpenyene ndibem iso n̄kere m̀mê udiana ibat magazine ifan̄ ke esop ediyom ẹnyụn̄ ẹtobo nte ekemde. Ufọn idụhe nditobo Mbụk Obio Ubọn̄ Nọ. 36, sia edide ẹyenọ esop kiet kiet. Mme akpan asiakusụn̄, asiakusụn̄ ofụri ini, ye mme asiakusụn̄ unọ un̄wam ẹyebọ idem 128 ndideme, ke adan̄aemi ẹdinọde asuanetop kiet kiet idem 48. Ke ntre nte afo emeben̄e idem onyụn̄ enyene ọkpọsọn̄ udọn̄ ndiyọhọ ye akpan utom emi? Nso ifet ke nnyịn inyene ntem ndinam kpukpru mbọhọidụn̄ nnyịn ẹfiọk se Abasi ọn̄wọn̄ọde ke n̄kpet n̄kpet ini iso!