Bọ Ufọn to Ndutịm Unọ Ukpep Jehovah
1 Akparawa kiet ke United States ama enyene utom oro enyenede uku—anamde utom ke usiakifia ẹbotde enyịmikan̄ ẹnyụn̄ ẹnamde n̄kpọ ẹban̄a edem ikpaenyọn̄. Nte ededi, nte enye ekekpepde Bible, enye ama ọfiọk ete ke ubọkọkọ oro enye ekemekde atuaha ye mme edumbet Bible. (Isa. 2:4) Ubieresịt esie ama afịna enye. Enye ama okụt in̄wan̄în̄wan̄ nte ke imọ ikemeke ndika iso nnam utom emi nnyụn̄ nnyene edisana ubieresịt ke ukem ini oro. (1 Pet. 3:21) Ediwak owo mfịn ẹbiat ukem ediwak isua ntre ẹbịne ubọkọkọ oro mmọ ẹdide ẹdifiọk ke ukperedem nte ke atuaha ye mme edumbet Bible. Didie ke nnyịn ikeme ndibiere usụn̄ uwem oro edidade nsinsi ufọn idi?
2 Eti Ndutịm Unọ Ukpep Jehovah: Jehovah ekpep nnyịn ata uduak ke uwem ye nte ikemede ndida uwem nnyịn nnam n̄kpọ man ibọ ata eti ufọn. Enye ekpep nnyịn ndinam eti utom. (Eph. 4:28) Enye ekpep nnyịn ndifori uduot uwem nnyịn ke n̄kan̄ eke ekikere, ido uwem, ye ke n̄kan̄ eke spirit. Enye ekpep nnyịn nte ikemede ndidu ke emem ye nditọete nnyịn, ubon nnyịn, ye mme ekemmọ owo. Enye anam emi ebe ke n̄wed ukpepn̄kpọ esie, kpa Bible, onyụn̄ ebe ke esop esie.
3 Mme mbono esop nnyịn ẹnyene akwa ufọn ke afan̄ emi. Nte nnyịn idụkde inyụn̄ ibuanade kpukpru ini ke mbono esop mbition, nnyịn ibọ ọyọhọ ukpep nte mme asan̄autom eti mbụk ye ukpep oro etịmde ada ukem ukem ke uwem Christian. (2 Tim. 3:16, 17) Akwa Anditeme nnyịn aka iso ọnọ ukpep ukara Abasi ebe ke n̄kpri ye ikpọ mbono. Utịtmbuba nnyịn ekpedi yak ikûdede itaba mbono esop kiet m̀mê ikpehe edinam kiet edieke nsọn̄idem ye mme idaha nnyịn ẹyakde nnyịn idụk.
4 Enye Edi Usụn̄ Eke Okụtde Unen: Ke Psalm 1:1-3 nnyịn ikot ite: “Ọfọfọn ọnọ owo eke mîsan̄ake ke item mme idiọk owo . . . Edi mbet Jehovah adat enye esịt . . . Kpukpru se enye anamde ọwọrọ usụn̄.” Ẹkụt ata unen ke ndinem Abasi esịt—esịnede edinịm ibet Jehovah nte ẹkụtde ke Bible ẹnyụn̄ ẹnamde an̄wan̄a ke mme mbono esop Christian.
5 Akparawa oro ẹkesiakde ke akpa ikpehe ekikere ama ọtọn̄ọ ndidụk mbono esop ye Mme Ntiense Jehovah onyụn̄ ada mme ukpepn̄kpọ Jehovah esịn ke edinam ke uwem esie. Enye ama ọkpọn̄ uforo uforo utom esie onyụn̄ anam obufa utom oro ọkọnọde enye ‘eti ubieresịt’ ye Jehovah. Enye ama ayak idemesie ọnọ Jehovah onyụn̄ anam utom nte asiakusụn̄. Enye ekeme ndidọhọ idahaemi ete: “Ini kiet ko, ofụri uwem mi ọkọyọhọ ye edibot mme enyene-ndịk n̄kpọekọn̄ ndida n̄wot mme ekemmọ owo. Nte ededi, ebede ke mfọnido esie oro owo mîdotke, Jehovah ama eberede usụn̄ ọnọ mi ye ubon mi ndikabade ndi mme asan̄autom esie oro ẹma ẹkeyak idem ẹnọ ndinyụn̄ nyak uwem nnyịn nsịn ke ndida eti mbụk nsinsi uwem eke paradise isọn̄ nsọk mme owo.”
6 Nnyịn ikpakam inen̄ede iyom ndibọ ukpep nto Jehovah, kpukpru emi kaban̄a itoro Esie ye kaban̄a nsinsi ufọn nnyịn!—Isa. 48:17.