Ndifori Udọn̄ Oro Mbụk Obio Ubọn̄ Nọ. 36 Edemerede
1 Nte afo omokụre ndisuan Mbụk Obio Ubọn̄ Nọ. 36 oro ẹkedemede ẹnọ fi? Enye obụp mbụme oro edide ekemini ọnọ kpukpru owo ndikere mban̄a: “Obufa Tọsịn Isua—Nso ke Ini Iso Akama Ọnọ Fi?” Nte isua 2000 akasan̄ade ekpere, idotenyịn ke se obufa tọsịn isua edidade edi okpụhọde akamba akamba. Mbụk Obio Ubọn̄ Nọ. 36 owụt ndusụk idotenyịn emi onyụn̄ eti nnyịn ete ke mme idaha ererimbot inọhọ isọn̄ ndinyene idotenyịn mfọnọn̄kpọ. N̄kukụre tọsịn isua oro edidade emem ye ifụre oro ediwak owo ẹyomde edi edi Tọsịn Isua Ukara Christ Jesus. Mbuọtidem nnyịn ke nte Obio Ubọn̄ esie edide ata idem n̄kpọ omonụk nnyịn ndisuan Mbụk Obio Ubọn̄ Nọ. 36 nnọ kpukpru owo oro ikemede.
2 Nte Ẹnamde N̄kpọ Ẹban̄a Mbụk Obio Ubọn̄: Mbụk Obio Ubọn̄ oro ẹkesuande ke mbemiso ẹkedi nti n̄kpọ udọn̄ ẹnọ utom nnyịn. Kaban̄a Mbụk Obio Ubọn̄ Nọ. 35, n̄kọk itieutom Canada ekewet ete: “Mme asuanetop ye asiakusụn̄ ẹma ẹnọ san̄asan̄a ubịnikọt emi ibetedem ke an̄wautom ye ifiopesịt, ẹma ẹnyụn̄ ẹnyene mme akama-nsịnudọn̄ ifiọkutom.” Eyịghe idụhe nte ke afo emenyene ukem ifiopesịt oro ke ndisuan Mbụk Obio Ubọn̄ Nọ. 36.
3 Ẹdiomi Ubịnikọt Mbụk Obio Ubọn̄ oro osụk akade iso idahaemi nditre ke November 17, 2000. Ndi ẹkụre kpukpru efakutom oro ẹdemede ẹnọ esop mbufo? Edieke mîkụreke, mbiowo ẹkeme ndidọhọ mbufo ẹka iso ke ubịnikọt oro tutu utịt November.
4 Didie ke mme owo ẹnam n̄kpọ ẹban̄a Mbụk Obio Ubọn̄ Nọ. 36 oro ẹsuande ke n̄kann̄kụk mbufo kan̄a ke emi? Ibat ibat owo ẹdiwet n̄kpọ ẹyọhọ babru oro ẹnyụn̄ ẹben̄e idem ediye uduot ekpri n̄wed Oyom kiet ye/m̀mê ukpepn̄kpọ Bible. Nte ededi, eyedi ata ediwak mbon oro ẹwụtde udọn̄ ke akpa ke ibuotikọ aban̄ade tọsịn isua idinamke n̄kpọ iban̄a oro tutu kiet ke otu Mme Ntiense Jehovah afiak aka ebịne mmọ. Ẹkpenyene ndifiak n̄kese kpukpru mbon oro ẹkewụtde udọn̄. Ọkpọfọn ẹnam emi ini ewe? Ẹkpenyene ndifiak n̄ka usọp usọp nte ẹkekeme.
5 Tịm fiọk mme ifiọkutom emi ẹkesụn̄ọde ẹto edifiak mbịne owo oro ẹkenọde Mbụk Obio Ubọn̄ Nọ. 35. Asiakusụn̄ kiet ke Ireland ama ọnọ andinyene itie unyamudia kiet Mbụk Obio Ubọn̄. Etop emi ama otụk n̄wan oro ndien enye ama ọdọhọ eyenete an̄wan oro ete afiak edi. Eyenete an̄wan oro ama afiak aka ke usen iba ẹbede, ndien ukpepn̄kpọ Bible ama ọtọn̄ọ. Ke Denmark, ẹma ẹnịm Mbụk Obio Ubọn̄ kiet ke ufọk oro owo mîkodụhe. Kpa usen oro, n̄wan oro odụn̄de do ama ọnọ babru eben̄e n̄wed oro ẹsọk ọfis n̄kọk itieutom, ẹmi ẹkenọde ẹsọk esop n̄kann̄kụk oro. Mbemiso urua oro ekebede, nditọete iban iba ẹma ẹka do, ẹma ẹnam ndutịm ukpepn̄kpọ, ndien n̄wan oro ama odụk akpa mbono esop ke Ufọkmbono Obio Ubọn̄!
6 Se Editịn̄de ke Afiakde Aka: Ndinam mme mfiakn̄ka ke ebiet ẹkenọde Mbụk Obio Ubọn̄ emem ke ndusụk udomo onyụn̄ edi ubak utom ukwọrọikọ nnyịn oro ọnọde inemesịt. Ke ini anamde oro, ọyọfọn afo akama idem Mbụk Obio Ubọn̄ Nọ. 36 kiet, sia ekeme ndidi enyeneufọk idinyeneke esiemmọ. Afo emekeme ndidomo mme ekikere emi nse.
7 Ke ama eketi enyeneufọk owo emi afo edide, afo emekeme ndidọhọ:
◼ “Mma nnọ fi tract ẹkotde ‘Obufa Tọsịn Isua—Nso ke Ini Iso Akama Ọnọ Fi?’ Nte ikedịghe n̄kpọ nsịnudọn̄ ndikot nte ke mîbịghike Tọsịn Isua Ukara Christ Jesus ọyọtọn̄ọ, adade mme idaha Paradise edi isọn̄? [Wụt mme ndise Paradise ke Mbụk Obio Ubọn̄ Nọ. 36.] Ke edem tract emi, ẹsịn udọn̄ ẹnọ fi ndiyom ediye uduot ekpri n̄wed Nso ke Abasi Oyom Oto Nnyịn?” Wụt ediye uduot ekpri n̄wed oro, kụbọde ka ukpepn̄kpọ 5, kot akpa mbụme ye ikpehe ekikere 1 ye 2, nyụn̄ dọhọ enyeneufọk ọnọ ibọrọ. Kot nyụn̄ neme itien̄wed kiet m̀mê iba. Edieke ekemede, neme mbụme ye ikpehe ekikere efen, ekem nam ndutịm ndifiak n̄ka nnyụn̄ n̄ka iso ke nneme oro.
8 Sia N̄wed oro ẹdinọde ke November edide ediye uduot ekpri n̄wed “Oyom” ye n̄wed “Ifiọk,” afo emekeme ndidọhọ:
◼ “Ke ini n̄kawahade ndise fi ke ndondo emi, mma nnọ fi ‘Obufa Tọsịn Isua—Nso ke Ini Iso Akama Ọnọ Fi?’ Enye esịne enọ ukpepn̄kpọ Bible mfọn. Mfiak ndi man n̄wụt fi n̄wed un̄wam ukpepn̄kpọ oro nnyịn idade inam n̄kpọ. [Wụt ediye uduot ekpri n̄wed Oyom, nyụn̄ kụbọde ka ikpaedem esie; mîdịghe wụt n̄wed Ifiọk, nyụn̄ kụbọde ka page 188-189.] Tọsịn Isua oro ẹtịn̄de ẹban̄a ke Bible ayada mme utọ idaha emi afo okụtde ke ndise emi edi. Man idot ndidu uwem ke Paradise, oyom nnyịn inyene nnennen ifiọk Abasi. Mbọk yak n̄wụt fi ibio ibio nte nnyịn isikpepde Bible.”
9 Edisuan Mbụk Obio Ubọn̄ Nọ. 36 onụk nnyịn ndinen̄ede mbuana ke utom ukwọrọikọ, inọde akwa ikọ ntiense. Eyedi emi edemede udọn̄ ediwak owo ke efakutom. Ye un̄wam Jehovah, ukeme oro nnyịn idiande kiet ndifori udọn̄ mi, ayada ekesịm nnyịn ndikụt mbon mbieterọn̄ efen efen ye idatesịt.—Matt. 10:11; Utom 13:48, 49, 52.