Mfịghe Ubọkn̄ka ye Ifet Fo Ndikwọrọ Ikọ
1 Mfịghe ubọkn̄ka enyene ọkpọsọn̄ odudu—edide ke eti m̀mê ke idiọk. Mme ekemmọ asan̄autom Jehovah ẹnyene eti odudu oro edemerede nnyịn ọnọ nti utom Christian. (Heb. 10:24) Nte ededi, mbonubon oro mîdịghe Mme Ntiense, mme nsan̄autom, mme nsan̄a ufọkn̄wed, mme mbọhọidụn̄, m̀mê mme ọdiọn̄ọ eken ẹkeme ndinyịk nnyịn nditiene usụn̄ uwem oro atuahade ye mme edumbet Christian. Mmọ ẹkeme ‘nditịn̄ n̄kpọ ndian eti uwem nnyịn ke Christ.’ (1 Pet. 3:16) Didie ke nnyịn ikeme ndisọn̄ọ ubiere nnyịn ndika iso n̄kwọrọ ikọ kpa ye idiọk mfịghe ubọkn̄ka oro nnyịn ikemede ndisobo?
2 Mbonubon: Ke ndusụk idaha, ekeme ndidi ebe onyụn̄ edide ete oro mîdịghe kiet ke otu Mme Ntiense Jehovah idiyomke n̄wan ye nditọ esie ẹbuana ke an̄wan̄wa utom ukwọrọikọ. Emi edi se iketịbede ke ufọk kiet ke Mexico. N̄wan ete kiet ye nditọ itiaba ẹma ẹbọ akpanikọ. Ke akpa ebe ama ọbiọn̄ọ sia enye mîkoyomke ubon esie ẹkwọrọ ikọ ke ufọk ke ufọk ẹnyụn̄ ẹnọ mme n̄wed Bible. Enye ekekere ke emi osụhọde uku mmọ. Nte ededi, n̄wan ye nditọ esie ẹma ẹsọn̄ọ ẹda ke ubiere mmọ ndinam n̄kpọ Jehovah nnyụn̄ mbuana ke utom ukwọrọikọ kpukpru ini. Nte ini akade, ete emi ama ọtọn̄ọ ndikụt ufọn oro odude ke ndinyịme ndutịm Abasi kaban̄a utom ukwọrọikọ, ndien enye n̄ko ama ayak idem esie ọnọ Jehovah. Akada enye isua 15 ndibọ akpanikọ, edi nte enye akpakanam oro tutu amama edieke ubon esie mîkpọkọsọn̄ọke ida ke ifet mmọ ndikwọrọ ikọ?—Luke 1:74; 1 Cor. 7:16.
3 Mme Nsan̄autom: Ekeme ndidi ndusụk owo iditịmke ima mme ukeme fo ndinọ mme nsan̄autom ikọ ntiense. Eyenete an̄wan kiet ama obụk nte ke ini nneme aban̄ade utịt ererimbot ekedemerede ke itieutom, ke ẹma ẹsak imọ nsahi sia imọ ikọnọde ekikere ite mmọ ẹkot Matthew ibuot 24. Nte ededi, usen ifan̄ ke ukperedem, kiet ke otu mme nsan̄autom esie ama ọdọhọ enye ete ke imọ ima ikot itien̄wed oro ima inyụn̄ ikop inemesịt. Ẹma ẹnịm n̄wed, ndien ẹma ẹnam ndutịm ukpepn̄kpọ Bible ye enye ye ebe esie. Akpa ukpepn̄kpọ ama ebịghi tutu esịm n̄kanika iba usenubọk. Ke ọyọhọ ukpepn̄kpọ ita ama okokụre, mmọ ẹma ẹtọn̄ọ ndidụk mme mbono esop, ndien ikebịghike ke oro ebede mmọ ẹma ẹtre ndida un̄wọn̄ ẹnyụn̄ ẹtọn̄ọ ndibuana ke utom ukwọrọikọ. Nte emi ekpeketịbe edieke eyenete nnyịn an̄wan mîkpekesịnke ukeme ndibuana idotenyịn esie ye mbon efen?
4 Mme Nsan̄a Ufọkn̄wed: Idịghe esen n̄kpọ mme uyen Ntiense ndisobo mfịghe ubọkn̄ka ke ufọkn̄wed nnyụn̄ n̄kop ndịk nte ke mme uyen eken ẹdise mmimọ ke usụhọde ke ntak edibuana ke utom ukwọrọikọ. Uyen Christian kiet ke United States ọkọdọhọ ete: “Mma n̄kop ndịk ndinọ mme uyen eken ikọ ntiense koro n̄kefehede owo ndida mi nnam mbubru.” Ke ntre enye ama efep mme ifet edinọ ubọkn̄ka esie ikọ ntiense ke ufọkn̄wed ye ke efakutom. Didie ke afo ekeme ndikọri ukeme ndisọn̄ọ nda mbiọn̄ọ mfịghe ubọkn̄ka? Buọt idem ye Jehovah, oyomde unyịme esie. (N̄ke 29:25) Kop idatesịt ke ukeme fo ndida Ikọ Abasi nnam n̄kpọ ke utom ukwọrọikọ fo. (2 Tim. 2:15) Uyen oro ẹsụk ẹtịn̄de ẹban̄a mi ama ọtọn̄ọ ndibọn̄ akam nnọ Jehovah, eben̄ede enye an̄wam imọ ikọri udọn̄ nditịn̄ ikọ nnọ mme nsan̄a ufọkn̄wed imọ. Enye ama ọtọn̄ọ ndinọ ikọ ntiense ido nneme ke ufọkn̄wed, enyene nti utịp, ndien ke mîbịghike enye ama ọtọn̄ọ nditịn̄ ikọ nnọ kpukpru owo oro enye ọkọfiọkde. Enye ama eberi ete: “Mme uyen oro ẹyom idotenyịn kaban̄a ini iso, ndien Jehovah ada nnyịn ndin̄wam mmọ.”
5 Mme Mbọhọidụn̄: Nnyịn imekeme ndinyene mme mbọhọidụn̄ m̀mê mme ọdiọn̄ọ efen oro mîmaha nnyịn ke ntak se nnyịn idide ye se nnyịn inịmde ke akpanikọ. Edieke okopde ndịk aban̄a se mmọ ẹkerede, bụp idemfo: ‘Nte mmọ ẹfiọk akpanikọ oro adade esịm nsinsi uwem? Nso ke n̄keme ndinam man nsịm esịt mmọ?’ Esenyịn circuit kiet ama okụt nte ke ẹsinyene nti utịp ke ini ẹnọde mme mbọhọidụn̄ ikọ ntiense nsịtnsịt kpukpru ini. Ben̄e Jehovah ukeme ye ọniọn̄ oro ẹyomde man aka iso oyom mbon esịt akpanikọ.—Phil. 4:13.
6 Nnyịn ndiyak idem nnọ idiọk mfịghe ubọkn̄ka ekeme ndinem mme andibiọn̄ọ esịt, edi nte ndinam ntre edidi ke ufọn mmọ—m̀mê eke nnyịn? Jesus ama osobo ubiọn̄ọ ke ubọk mbon obio esie. Enye ama akam ọyọ uyat uyat ikọ nditọeka esie. Enye ama ọfiọk ete ke imọ ikeme ndin̄wam mmọ n̄kukụre ebe ke nditịm nsọn̄ọ nda ke usụn̄ oro Abasi ekenịmde ọnọ enye. Ke ntre, Jesus “[ama obiom] orụk idiọk ndutịn̄ oro mme idiọk owo ẹtịn̄de ẹdian Idem Esie.” (Heb. 12:2, 3) Nnyịn inyene ndinam ukem ntre. Biere ndida ifet fo nnam kpukpru se ekekeme ndikwọrọ etop Obio Ubọn̄. Ke ndinam ntre, “afo ayanyan̄a idem fo ye mmọ emi ẹkopde uyo fo.”—1 Tim. 4:16.