Mbono District “Mme Andikpep Ikọ Abasi” eke Mme Ntiense Jehovah eke 2001

¹ Prọfet Isaiah ama etịn̄ aban̄a Jehovah nte Akwa Anditeme (NW), oro nte ete, eketemede ete: “Emi edi ọkpọusụn̄, mbufo ẹsan̄a ke esịt.” (Isa. 30:20, 21) Edi didie ke nnyịn ikop uyo Jehovah emi etịn̄de ikọ ke ufọn nnyịn? Jehovah etịn̄ ikọ ọnọ ikọt esie ebe ke Bible ọkọrọ ye mme n̄wed ẹkọn̄ọde ke Bible, mme mbono esop, mme mbono circuit, mme mbono district emi “asan̄autom emi anamde akpanikọ, onyụn̄ enyenede ọniọn̄” odiomide. (Matt. 24:45) Nnyịn imekeme ndikọm Jehovah ke nte enye akade iso ndiwụt nnyịn usụn̄ oro nnyịn ikpenyenede ndisan̄a.

² Ke isua kiet kiet, mbono district ọnọ nnyịn ifet ndisobo ye ekemmọ mme andinịm ke akpanikọ ndinyụn̄ nnọ ọyọhọ n̄kpan̄utọn̄ ke mme item Jehovah. Isua oko, owo 576,874 ẹkedụk Mme Mbono District “Mme Anam Ikọ Abasi,” emi ọkọnọde uyụhọ ke n̄kan̄ eke spirit. Ke 2001 emi, ẹyenịm Mme Mbono District “Mme Andikpep Ikọ Abasi” ke usen ita ke ofụri idụt emi. Nnyịn imọfiọk ke afo ke odori enyịn ndinam ndutịm man abuana, ntre nnyịn imọnọ mme item ẹtienede mi man ẹn̄wam fi.

³ Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nte enende ẹyọhọ babru Room Request kiet kiet oro ẹyakde ẹnọ. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon emi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ọsọn̄ ndinam ndutịm nnọ itieidụn̄ oro ekemde. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono. Ẹkpenyene ndibak nnọ babru emi mbemiso mbono.

⁴ Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ mbono. Ke nsụhọde n̄kaha nditiene ndausụn̄ emi ọyọhọ n̄kpọ iba:

⁵ Afam Okụk nditọete nnyịn: Ke ini nnyịn idianade kiet ye ndutịm N̄ka, okụk ufọk esisụhọde ọnọ nditọete nnyịn. Utu ke okụk nnyịn ndika mbịne mme enyene ebiet, ẹkeme ndida mmọ nnam n̄kpọ nte ọfọnde ndida n̄n̄wam mme ubon nditọete nnyịn ye utom ofụri ererimbot. Idem ọkpọkọm nnyịn ke idem nnyịn imekeme ndibọ itieidụn̄ oro ọsọn̄de urua, nnyịn ikpenyene ndinọ ukeme oro Itieutom Unọ Ufọkidụn̄ esịnde ibetedem. Ẹtịn̄ ẹban̄a edu edikere mban̄a mbon efen emi ke 1 John 3:17, enye onyụn̄ edi edumbet emi odude ke 1 Corinth 10:24.

⁶ Owụt Nsụkibuot ọnọ ndausụn̄ N̄ka: N̄kpọ emi ekpenyene ndidi kiet ke otu n̄kpọ emi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ emi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm ẹnọ mbono district nnyịn, nnyịn iyom ndinam mmọ ẹfiọk nte ke nnyịn imọnọ mmọ ọyọhọ ibetedem. Sia ẹyomde edidianakiet nnyịn ke n̄kpọ emi ke usen iba m̀mê ita kpọt ke isua kiet kiet, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyesịn udọn̄ ọnọ edu ima, edidianakiet, ye ibetedem.—Phil. 2:1-4.

⁷ San̄asan̄a Un̄wam: Ẹnam ndutịm emi ẹnọ sụk mbon oro ẹyomde san̄asan̄a un̄wam ẹto mbon en̄wen ke ndinam ndutịm mbono mmọ, akpan akpan ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Edi mme asuanetop ye mme asiakusụn̄ emi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, emi ẹyomde san̄asan̄a un̄wam, emi Kọmiti Utom Esop onyụn̄ ọnọde unyịme ẹdot ndibọ un̄wam ke idak ndutịm San̄asan̄a Un̄wam. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi nnọ ndutịm mbono. Mbiowo ye mbon en̄wen emi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.

⁸ Nte ededi, Itieutom Unọ Ufọkidụn̄ oyodomo ndinọ mme asuanetop oro ẹyomde san̄asan̄a un̄wam mme ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop emi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ese m̀mê esop eyekeme ndin̄wam mme owo emi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye ewetde mme ikọ emi “SAN̄ASAN̄A UN̄WAM,” in̄wan̄-in̄wan̄ ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ san̄asan̄a babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede m̀mê ẹwet n̄kpọ ẹyọhọ, m̀mê enen, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Ewetn̄wed ekpenyene ndinam mme idaha oro ẸN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru emi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a itieidụn̄.

⁹ Mbon oro ẹyomde san̄asan̄a un̄wam IKPENYENEKE ndika itie mbono n̄koyom ufọkidụn̄ ke ini mmọ ẹsịmde, koro ana Itieutom Unọ Ufọkidụn̄ enyene unyịme otode Kọmiti Utom Esop.

¹⁰ Ediwak owo ẹmewụt esịtekọm ẹban̄a mme ndutịm emi ẹnamde ẹban̄a itieidụn̄ ke mme mbono. Ndi afo n̄ko omowụt esịtekọm aban̄a ediwak ndutịm oro ẹnamde ke ufọn fo? N̄ka enem esịt ndinọ mme itieidụn̄ oro ẹnemde owo ke idem ẹnyụn̄ ẹmemde urua ke mme ini mbono, ẹyakde kpukpru nnyịn iwụk ntịn̄enyịn ke mme ufọn n̄kpọ eke spirit ke mbono ye ke ndutịm.

¹¹ Ndidụk Mbono Efen: Ẹdeme esop kiet kiet ẹsịn ke mbono oro ekperede akan. Ọkọn̄ọde ke ibat asuanetop oro ẹdemede ẹdọn̄ ke mbono kiet kiet, N̄ka esikere ibat mme andidụk man ẹnam ndutịm ẹnọ n̄kpọitie, ufọkidụn̄, mme n̄wed oro ẹkemde, ye ntre ntre eken. Nte ededi, edieke enyenede eti ntak ndidụk mbono efen ọwọrọde ọkpọn̄ enye oro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ nnyụn̄ nnọ ewetn̄wed esịn ubọk mbemiso ọnọde enye ẹsọk itie mbono oro aduakde ndidụk.

¹² Usem Idiọn̄ọ Mbon Inan: Ẹyenam ndutịm man nditọete oro ẹdotde ẹkabade ofụri ndutịm ẹsịn ke Usem Idiọn̄ọ Mbon America ke mme mbono oro ẹtienede mi: Ota 2, November 2-4, 2001; North 4, November 16-18, 2001; Uli 7, December 7-9, 2001; ye Ubogo 10, January 11-13, 2002. Ẹsịn udọn̄ ẹnọ mbon inan ke kpukpru esop ke Nigeria nditọn̄ọ ndinam ndutịm ndidụk ke nsụhọde n̄kaha kiet ke otu mbono emi. Mbiowo ẹkpenyene nditịm ndụn̄ọde ye owo kiet kiet edide inan ke esop mmọ emi ọdiọn̄ọde Usem Idiọn̄ọ Mbon America man ẹtịm ẹkụt ẹte ke mmọ ẹdiọn̄ọ ẹban̄a ndutịm emi ẹnyụn̄ ẹbiere m̀mê mmọ ẹyeyom un̄wam ekededi man mmọ ẹkeme ndidụk.

¹³ Mme mbono emi kpọt ẹdinyene san̄asan̄a ikpehe n̄kpọitie oro ẹnịmde ẹnọ mbon inan emi ẹdikabarede ndutịm inọ mmọ ke usem idiọn̄ọ. Owo idinamke ndutịm inọ edikabade usem idiọn̄ọ ke mme mbono efen ekededi. Edieke inan asan̄ade ye anam-idiọn̄ọ aka mbono efen ekededi, ẹnyịme owo kiet akabade ọnọ owo enye eken mmọ mbiba ẹtiede ẹkpere kiet eken, idịghe owo kiet nditie nsak iso nse owo eken m̀mê awakde akan oro.

¹⁴ Fam Okụk Nịm nọ Mbono Oro: Ke adianade ye mme ndutịm eken, IDAHAEMI edi ini nditọn̄ọ mfam okụk nnịm nnọ mbono district emi. Ndusụk owo ẹdu oyom usụn̄ esisịt ọkpọn̄ itie mbono. N̄ko, ndusụk owo ẹnyene ikpọ ubon. Kaban̄a mmọ emi ye kpukpru nnyịn, oyom okụk kaban̄a mme etịbe, ukpeusụn̄, udia ke ini mbono, ye mme mbabuat n̄kpọ eken. Oyom mbon oro ẹnyenede akamba ubon ẹbabak ẹnam ndutịm ẹnyụn̄ ẹfam okụk oro ekemde ẹnịm man ofụri ubon ekeme ndidụk mbono. Eti edinam ekeme ndidi ndibiere ofụri okụk emi ẹyomde. Owụt ifiọk ndinịm ufan̄ nnọ ekọmurua n̄kpọ ndidọk ke adan̄aemi anamde ubiere fo. Bahade ibatokụk oro ebierede sịn ke ofụri ibat ọfiọn̄ oro ẹdude ọtọn̄ọde ke idahaemi esịm usenọfiọn̄ mbono district mbufo. Emi edi ibatokụk oro oyomde afo enịm ke ọfiọn̄ kiet kiet. Ke ọfiọn̄ kiet kiet, sịn ofụri ukeme ndibem iso nsio okụk emi nnịm nte okụk mbono. Ẹkeme ndisịn emi ke ekpri ekebe m̀mê ke efọkn̄wed. Nte ededi, ẹkeme ndibahade okụk emi ẹfamde ẹnịm ke ọfiọn̄ ke ọfiọn̄ mi ke itie inan̄ ẹnyụn̄ ẹsio ẹnịm ke urua ke urua. Akpan n̄kpọ edi nte ke afo ukpunyeneke ndibet tutu osụhọ ọfiọn̄ kiet m̀mê iba ndisịm ini mbono mbemiso afo ọtọn̄ọ ndifam okụk uka isan̄ ofụri ini eke isua ke isua emi.—N̄ke 21:5.

¹⁵ Utịtikọ: Nte ini edidụk mbono district fo asan̄ade ekpere, bọn̄ akam nọ Jehovah ete afo ekeme ndidụk kpukpru ikpehe edinam ke ofụri usen ita onyụn̄ ọbọ ekese ufọn oto ndutịm emi. Nte ama esesịn eben̄e ini nduọkodudu ke itieutom aban̄a mbono usen ita oro afo aduakde ndidụk? Edieke mûsịnke, nam ntre usọp usọp nte ekekeme. Owo isiwakke ndinyịme eben̄e ini nduọkodudu ke idiọk ini. Asan̄autom emi anamde akpanikọ, onyụn̄ enyenede ọniọn̄ etịm Mbono District “Mme Andikpep Ikọ Abasi” ke isua emi ndinọ nnyịn item eke spirit ndinyụn̄ nsọn̄ọ mbuọtidem nnyịn. Ntre tọn̄ọ ndinam ndutịm fo idahaemi ndibuana, anamde item andiwet psalm oro: “Mbufo ẹkọm Abasi ke otu mbon-esop”!—Ps. 68:26.

[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ebiet ye mme usenọfiọn̄ emi N̄ka edemede esop mbufo esịn ke Esoputom efen ye ke Ukpepn̄kpọ Enyọn̄-Ukpeme oro etienede. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn nnyụn̄ ndian ikpehe esịne-esịt emi ke obukpọk ntọt.

Ewetn̄wed esop ekpenyene ndise mban̄a n̄kpọ aban̄ade mme mbono ye mme ntọt mbono oro ẹdinọde ke mme mbono esop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a n̄kpọ aban̄ade mbono usọp usọp, ke usụn̄ emi esịnede ufiop, ifịk, ye nte ọfọnde.]

[Ekebe ke page 3]

Mme Ini Edinam

Friday

9:20 a.m. – 4:40 p.m.

Saturday

9:00 a.m. – 4:20 p.m.

Sunday

9:00 a.m. – 3:20 p.m.