Di Eti Andikpan̄ Utọn̄
1 Oyom ntụnọ man ẹnọ ọyọhọ n̄kpan̄utọn̄. Oyom andikpan̄ utọn̄ enyene udọn̄ n̄ko ndikpep nnyụn̄ mbọ ufọn nto se okopde. Ntem, Jesus ama ọsọn̄ọ owụt ufọn ‘editịn̄ enyịn n̄kpeme adan̄a nte mbufo ẹkopde.’—Luke 8:18.
2 Emi abuana akpan akpan ke ini nnyịn idụkde mme mbono esop, n̄kpri, ye ikpọ mbono. Mmọ emi ẹdi mme ini emi anade nnyịn itịm inọ n̄kpan̄utọn̄. (Heb. 2:1) Mmọ emi ẹdi ndusụk n̄kpọ emi ẹdin̄wamde fi ndidi eti andikpan̄ utọn̄ ke mme mboho Christian emi.
◼ Wụt esịtekọm ban̄a ufọn mme mbono esop. Mmọ ẹdi akpan usụn̄ oro ‘Jehovah etemede’ nnyịn ebe ke “akama-ukpọhọde, emi anamde akpanikọ.”—Isa. 54:13; Luke 12:42.
◼ Bem iso tịm idem. Dụn̄ọde ibuotikọ oro ẹdinemede, nyụn̄ kụt ete ke imakama Bible ye ọkpọkpọ n̄wed oro ẹkpepde.
◼ Ke mme mbono esop, nen̄ede domo ukeme ndiwụk ntịn̄enyịn. Ekpenyene ndifep nditịn̄ ikọ ye mbon oro ẹtiede ye afo ye edise se mbon efen ke otuowo ẹnamde. Sịn ukeme mbak ekikere aban̄ade se afo edinamde ke mbono esop asuanade m̀mê mme ọkpọkpọ mbubehe eken ẹdiwọn̄ọde ntịn̄enyịn fo.
◼ Dụn̄ọde se ẹnemede. Bụp idemfo: ‘Didie ke emi ebehe mi? Ini ewe ke ami ndida enye nsịn ke edinam?’
◼ Wet mbio mbio akpan n̄kpọ ye mme itien̄wed Abasi. Emi an̄wam fi ndiwụk ntịn̄enyịn fo ke se ẹnemede onyụn̄ etịp n̄kpọ esịn ke afo nditi mme akpan n̄kpọ emi edidade anam n̄kpọ nte ini akade.
3 Kpep Nditọ Fo Ndikpan̄ Utọn̄: Nditọwọn̄ ẹyom ukpep eke spirit. (Deut. 31:12) Ke eset “kpukpru owo eke ẹnyenede ibuot ndikop” ke otu ikọt Abasi ẹkenyene ndinọ n̄kpan̄utọn̄ nte ẹkekotde Ibet ẹnọ mmọ. (Neh. 8:1-3) Edieke mme ete ye eka ẹbuanade ke mme mbono esop ẹnyụn̄ ẹnọde ọyọhọ n̄kpan̄utọn̄, eyedi nditọ mmọ ẹyenam ukem oro. Iwụtke eti ibuot ndimen mme n̄kpọmbre m̀mê mme n̄wed ndise ndi man ẹmụm ntịn̄enyịn nditọwọn̄. Ndika itie uken̄idem nte mîdotke n̄ko ọbiọn̄ọ mmọ ndinọ n̄kpan̄utọn̄. Sia ‘ndisịme ido ẹyịrede ke esịt eyenọwọn̄,’ mme ete ye eka ẹkpenyene ndisịn ọkpọsọn̄ ukeme man ẹkụt ẹte kẹ nditọ mmimọ ẹtie sụn̄ ẹnyụn̄ ẹkpan̄ utọn̄ ẹnọ mme mbono esop.—N̄ke 22:15.
4 Ebede ke ndidi nti andikpan̄ utọn̄, nnyịn iwụt ite ke idi mme enyene-ibuot owo inyụn̄ iyom ‘ndikọri ke se ikpepde.’—N̄ke 1:5.