Jehovah Ọnọ Odudu
1 Nso ke afo esikere aban̄a apostle Paul? Nte nnyịn ikotde n̄wed Utom, nnyịn imowụt esịtekọm iban̄a nte enye ekenyenede ifịk ke utom Jehovah. Didie ke Paul ekekeme ndinam kpukpru se enye akanamde? Enye ọkọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem [“andinọ mi odudu,” NW].” (Phil. 4:13) Nnyịn n̄ko imekeme ndibọ ufọn nto odudu emi Jehovah ọnọde. Didie? Ebe ke ndida n̄kpọ itiokiet oro enye ọnọde man nnyịn ifiak ikop odudu inyụn̄ isọn̄ idem ke n̄kan̄ eke spirit, nnam n̄kpọ.
2 Ikọ Abasi: Kpa nte anade nnyịn idia udia man ika iso inyene nsọn̄idem ikpọkidem, nnyịn inyene n̄ko ndida Ikọ Abasi mbọk idem nnyịn man ika iso idu uwem ke n̄kan̄ eke spirit. (Matt. 4:4) Bible ọnọ odudu oro omụmde nnyịn akama. Man imụm ifịk ye ifiopesịt oro inyenede inọ akpanikọ ikama, ana ibuana ke eti ukpepn̄kpọ idemowo ye editie n̄kere ke usen ke usen, edieke ikemede.—Ps. 1:2, 3.
3 Akam: Edi akpan n̄kpọ ndisan̄a n̄kpere Jehovah, akpan akpan ke mme ini nnanenyịn. Ebede ke spirit esie, enye ọnọ mbon oro ẹben̄ede enye odudu ebe ke akam. (Luke 11:13; Eph. 3:16) N̄wed Abasi esịn udọn̄ ọnọ nnyịn ete ‘ikọbọ ke edibọn̄ akam.’ (Rome 12:12) Nte afo ke anam oro?
4 Esop: Nnyịn imesibọ odudu ye nsịnudọn̄ n̄ko ito mme mbono esop ye ufiop ufiop itie ebuana oro nnyịn isinyenede ye nditọete nnyịn do. (Heb. 10:24, 25) Ke ini n̄kpọ etịmerede nnyịn ekikere, mmọ ẹn̄wam ndisịn udọn̄ nnọ nnyịn ẹnyụn̄ ẹn̄wam nnyịn ke ima.—N̄ke 17:17; Eccl. 4:10.
5 An̄wautom: Ndibuana ke an̄wautom kpukpru ini an̄wam nnyịn ndiwụk ntịn̄enyịn ke Obio Ubọn̄ ye mme edidiọn̄ esie. Esịt esinem nnyịn ke ini nnyịn in̄wamde mbon en̄wen ẹkpep n̄kpọ ẹban̄a Jehovah. (Utom 20:35) Idịghe kpukpru nnyịn ikeme ndiwọrọ n̄kanam utom ke ebiet oro udọn̄ okponde akan m̀mê ndibuana ke utom uyọhọ ini, edi nnyịn imekeme ndinyene akpan udeme ke utom ukwọrọikọ ke mme usụn̄ efen.—Heb. 6:10-12.
6 Mme Esenyịn Christian: Nnyịn imesibọ ufọn ito nsịnudọn̄ ye un̄wam emi mbiowo ẹnọde. Jehovah ọnọ mmọ utom edikpeme udịmerọn̄ Abasi emi odude ke otu mmọ. (1 Pet. 5:2) Mme esenyịn oro ẹsan̄ade-san̄a ẹsinam mme esop oro mmọ ẹnamde utom kpa nte Paul akanamde ke eyo esie, ẹkọri.—Rome 1:11, 12.
7 Uwụtn̄kpọ Mme Anam Akpanikọ: Esidemede udọn̄ ndikere mban̄a nti uwụtn̄kpọ ekemmọ mbonutom oro ẹnamde akpanikọ, eke eset ye eke eyomfịn. (Heb. 12:1) Ke ini afo oyomde ndifiak n̄kop odudu, ntak mûkotke kiet ke otu ọnọ-nsịnudọn̄ mbụk eyouwem ke mme magazine nnyịn, mbụkutom oro ọbọpde-bọp ke Yearbook, m̀mê ndusụk ke otu edemede-owo-udọn̄ mbụk Mme Ntiense Jehovah eyomfịn ke n̄wed Proclaimers?
8 Eyenete kiet, emi odude idahaemi ke ufọt ufọt iduọk isua 90 esie, ọkọbọ akpanikọ ke ini uyen. Ke adan̄aemi okosụk edide akparawa, ẹma ẹdomo mbuọtidem esie. Akpa kan̄a, mbon oro ẹkebuanade ifịk ifịk ye esop ẹma ẹkpọn̄ esop Jehovah. Ekem, utom eke ufọk ke ufọk ama ọsọn̄ enye ndinam. Kpa ye oro, enye ekeberi edem ke Jehovah kpukpru ini. Ke mîbịghike enye ama okop inem ndinam utom ukwọrọikọ. Ndien nso itịbe mfịn? Kpa ye mfịna unana nsọn̄idem, enye osụk edi andibuana ke ubon Bethel Brooklyn, anamde utom ke Otu Ukara. Enye ituaha n̄kpọfiọk ke ndikọsọn̄ọ nyịre ye esop Jehovah.
9 Eyenete an̄wan kiet emi edide andibuana ke ubon Bethel Britain akana baptism ke edide isua 13. Enye ama ọtọn̄ọ utom usiakusụn̄ ye eyeneka esie eren ke isua oro eketienede, ndien isua kiet efen ke oro ebede, ẹma ẹsịn ete esie ke ufọk-n̄kpọkọbi ke ntak edida san̄asan̄a esie ke ini Ekọn̄ Ererimbot II. Enye okosụk eberi edem ke Jehovah kaban̄a odudu, ndien enye ama aka iso ndinam n̄kpọ nnọ ata Abasi. Nte ini akakade, enye ama ọdọ anam-akpanikọ eyenete kiet, ndien mmọ ẹma ẹka iso ndinam uduak Jehovah ọtọkiet. Isua 35 ke mmọ ẹma ẹkedọ ndọ, ebe esie ama akpa ke mbuari. Enye ama afiak ọbọ odudu oto Jehovah, ndien enye ke osụk akaka iso tutu mfịn, odoride enyịn ndinam utom ke nsinsi nte andibuana ke ubon Jehovah eke isọn̄.
10 Jehovah esin̄wam onyụn̄ ọnọ mme anam-akpanikọ asan̄autom esie odudu. “Enye ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem.” Nnyịn imekeme ndibọ odudu oro mînyeneke adan̄a mi ebe ke ndida n̄kpọ itiokiet oro ẹsiakde ke enyọn̄ emi nnam n̄kpọ. Ti ete: “Mmọ eke ẹberede ye Jehovah ẹyekop obufa nsọn̄idem. . . . Ẹyefen̄e, ndien idikpọtke; ẹyesan̄a, edi idikpaha mba.” (Isa. 40:29-31) Paul ekeberi edem ofụri ofụri ndibọ odudu nto Jehovah, ndien ntre ke ana nnyịn inam.