Ima Onụk Nnyịn Ndikwọrọ Ikọ
1 Nte Mme Ntiense Jehovah, ẹtịm ẹdiọn̄ọ nnyịn nte ifịk ifịk mme ọkwọrọ etop Obio Ubọn̄. (Matt. 24:14) Se iwakde ibe owo miliọn itiokiet ẹsịn ifịk ke ofụri ererimbot; ẹdian mbufa owo ke adan̄aemi mmọ ẹdianade ye nnyịn ndikwọrọ ikọ. Ẹdian ibat emi ẹtiene edibuana ke utom emi.
2 Nso inụk nnyịn ndinyịme utọ utom emi akamade n̄kpọ-ata do? Owo inyịkke-nyịk nnyịn, idaha udori n̄kpọ obụkidem itap nnyịn, m̀mê ndinọ nnyịn san̄asan̄a ukpono. Ke ntọn̄ọ, ediwak nnyịn ima isikop ndịk sia ikekerede ke nnyịn idotke, ndien mme owo ke an̄wa ẹma ẹsiwụt unana edinyịme. (Matt. 24:9) Ediwak mme andida nse ikemeke ndifiọk se inụkde nnyịn. Ana eti ntak odu oro onụkde nnyịn ndisịn ifịk.
3 Odudu Emi Ima Enyenede: Jesus ama anam ẹdiọn̄ọ n̄kponn̄kan ke otu kpukpru ibet ke ini enye ọkọdọhọde ete ke ana nnyịn ‘ima Jehovah ke ofụri esịt, ukpọn̄, ekikere, ye odudu nnyịn.’ (Mark 12:30) Ima emi inyenede inọ Jehovah ọkọn̄ọ ke ntotụn̄ọ ekikere esịtekọm kaban̄a owo emi enye edide—Akakan Andikara, Andibot kpukpru n̄kpọ, emi ‘odotde ndibọ ubọn̄ ye ukpono ye odudu.’ (Edi. 4:10b) Idụhe se ẹkemede ndida ndomo ye mme utịbe utịbe edu esie.—Ex. 34:6, 7.
4 Ndidiọn̄ọ nnyụn̄ mma Jehovah onụk nnyịn ndiyak un̄wana nnyịn ayama ke iso owo. (Matthew 5:16) Un̄wana nnyịn ayama ke ini nnyịn itorode enye an̄wa an̄wa, itịn̄de ikọ iban̄a mme utịbe utom esie, inyụn̄ isuande etop Obio Ubọn̄ esie. Ukem nte angel oro ke ufọt enyọn̄, nnyịn imenyene ‘nsinsi gospel ndikwọrọ nnọ kpukpru idụt ye esien ye usem ye obio.’ (Edi. 14:6) Ima oro nnyịn inyenede edi akpan ntak utom ukwọrọikọ eke ofụri ererimbot.
5 Ererimbot ese ukwọrọikọ nnyịn nte “ndisịme ikọ” oro ẹkpefụmide. (1 Cor. 1:18) Ẹsịn ntatara ukeme ndikpan utom nnyịn. Ima oro nnyịn imade akpanikọ ọmọsọn̄ọ nnyịn idem ndidọhọ, nte mme apostle ẹkedọhọde, ẹte: ‘Nnyịn ikemeke nditre nditịn̄ se nnyịn ikokụtde inyụn̄ ikopde. . . . Nnyịn inyene ndikop uyo Abasi n̄kan uyo owo.’ (Utom 4:20; 5:29) Utom ukwọrọikọ aka iso nditara ke kpukpru ikpehe isọn̄ kpa ye ubiọn̄ọ.
6 Ima oro inyenede inọ Jehovah etie nte ikan̄ eke asakde oro onụkde nnyịn nditan̄a mme utịbe utịbe edinam esie. (Jer. 20:9; 1 Pet. 2:9) Nnyịn iyaka iso ‘ndimen se enye anamde ntan̄a nnọ mme idụt koro enye anamde ikpọ n̄kpọ’!—Isa. 12:4, 5.