Sịm Esịt Eyen Ukpepn̄kpọ Fo
1 Mbemiso ọkọdọkde aka heaven, Jesus ama ọdọhọ mme mbet esie ete ẹkpep mme owo “ẹnam” kpukpru n̄kpọ eke imọ iketemede. (Matt. 28:19, 20) Edieke anade owo ‘anam’ se Christ eketemede, mme n̄kpọ emi ẹnyene ndisịm esịt esie. (Ps. 119:112) Didie ke afo ekeme ndisịm esịt owo emi afo ekpepde Bible?
2 Bọn̄ Akam Ben̄e Ndausụn̄ Jehovah: Edinam mme mbet edi utom Abasi. Man ikụt unen, edidiọn̄ esie, idịghe mme ukeme nnyịn, ẹdi akpan n̄kpọ. (Utom 16:14; 1 Cor. 3:7) Ntem, oyom ẹbọn̄ akam ẹben̄e un̄wam Jehovah ke ndikpep mbon efen akpanikọ.—Isa. 50:4.
3 Fiọk Se Eyen Ukpepn̄kpọ Enịmde ke Akpanikọ: Ndifiọk se mme owo ẹnịmde ke akpanikọ ye ntak emi mmọ ẹnịmde ekeme ndinọ nnyịn ikike ke se ikpetịn̄de man isịm esịt mmọ. Ntak emi eyen ukpepn̄kpọ enyenede udọn̄ ke akpan ukpepn̄kpọ kiet? Nso inam enye enyịme nte ke ukpepn̄kpọ emi edi se ẹkpenịmde? Utọ ifiọk oro ekeme ndin̄wam nnyịn ndida mbufiọk ntịn̄ ikọ.—Utom 17:22, 23.
4 Nọ Ntak N̄wed Abasi Oro Esịnede Ifiọk: Eyen ukpepn̄kpọ enyene ndikụt ke akpanikọ esịne ifiọk. (Utom 17:24-31) Nnyịn inyene ndinọ eti ntak kaban̄a idotenyịn nnyịn. (1 Pet. 3:15) Nte ededi, da eti ido ye ime nam ntre kpukpru ini.
5 Da Mme Uwụtn̄kpọ Sọn̄ọ Enye: Mme uwụtn̄kpọ inamke edi mmemmem n̄kpọ kpọt inọ eyen ukpepn̄kpọ ndifiọk se n̄kpọ ọwọrọde edi mmọ n̄ko ẹdemede mme ntụk. Mmọ ẹbuan esịt ye ekikere. Jesus ama esiwak ndida mmọ nnam n̄kpọ. (Mark 4:33, 34) Nte ededi, man ẹnyene uforo, uwụtn̄kpọ oro ẹdade ẹnyene ndikem ye se ẹnemede, ndien enye ekpenyene ndinyene ebuana ye uwem eyen ukpepn̄kpọ.
6 Wụt Mme Ufọn Edinyịme Akpanikọ: Mme owo ẹyom ndifiọk mme ufọn edinam se mmọ ẹkpepde. N̄wam eyen ukpepn̄kpọ fo okụt ọniọn̄ oro odude ke ikọ Paul ke 2 Timothy 3:14-17.
7 Kûyak idem emem fi edieke ndusụk owo mîkpan̄ke utọn̄ inọ ukpepn̄kpọ fo. Idịghe kpukpru owo ẹdinyịme. (Matt. 13:15) Nte ededi, ndusụk mme owo ẹsikabade ẹdi mme andinịm ke akpanikọ. (Utom 17:32-34) Ukeme oro mbufo ẹsịnde man ẹda eti mbụk ẹsịm esịt mme owo akpakam an̄wam ediwak owo efen efen ndinyịme nnyụn̄ ‘nnam’ se Jesus eketemede.