Kọri ke N̄kan̄ eke Spirit ke Utom Ukwọrọikọ Fo
1 Jesus Christ okowụk mme anditiene enye ete ẹdi mme ọkwọrọ “gospel Ubọn̄ Abasi.” (Matt. 24:14) Ediwak mme asuanetop eti mbụk ẹdi mbufa, ndien itịmke inyene mbufiọk ke utom ukwọrọikọ. Nte afo edi kiet ke otu mmọ? Ndien didie ke afo ekeme ndinam n̄kọri man ‘anam utom fo ama’?—2 Tim. 4:5.
2 Kọri In̄wan̄-In̄wan̄ Edu: Da utom ukwọrọikọ nte “ọsọn̄-urua n̄kpọ,” akwa ifetutom. (2 Cor. 4:7) Ke ini ibuanade ke utom ukwọrọikọ, nnyịn iwụt ima, edinam akpanikọ ye nsọn̄ọnda nnyịn inọ Jehovah. Nnyịn iwụt n̄ko udọn̄ esịt akpanikọ oro nnyịn inyenede inọ mbọhọidụn̄ nnyịn. (Luke 10:27) Jesus Christ, kpa Uwụtn̄kpọ nnyịn, ama enyene in̄wan̄-in̄wan̄ edu aban̄a utom ukwọrọikọ. Enye ama atua mme owo mbọm onyụn̄ odu ke mben̄eidem kpukpru ini ndin̄wam. (Matt. 8:3) Ke ndikpebe Jesus Christ, ekpenyene ndinụk fi ndibuana ọyọhọ ọyọhọ ke utom emi nte nsọn̄idem ye mme idaha fo ẹyakde.
3 Ndikan Bụt: Ekeme ndidi ediwak n̄kparawa ye mbufa asuanetop eti mbụk ẹnyene ndin̄wana ye bụt. Edi ẹkeme ndikan bụt. Andibuana kiet ke Otu Ukara ama etịn̄ ini kiet aban̄a idemesie ete: “Ke ini n̄kodụkde ntọn̄ọ ntọn̄ọ ini uyen, n̄kedi eyen emi enen̄erede okop bụt nnyụn̄ ntie idop idop. Edu bụt emi ekedi akamba n̄kpọ ubiọn̄ọ ke ediwak usụn̄, edi akpan akpan ke ndiwụt mbuọtidem mi ebe ke ndikwọrọ eti mbụk Obio Ubọn̄.” Didie ke enye akakan mfịna emi? Enye ọkọdọhọ ete: “Akananam Jehovah idọhọke nnyịn inam n̄kpọ oro enye ọfiọkde ete ke nnyịn ikemeke ndinam. Nte ededi, edi n̄kukụre ke odudu esie ke nnyịn ikeme ndinam se enye ọdọn̄de nnyịn. N̄kpọ efen edi—edieke afo enen̄ede ama nditọete fo oro ẹnamde utom ye afo, mmọ ẹyen̄wam fi ẹnyụn̄ ẹbere ye afo.” Ke akpanikọ, ndinam utom kpukpru ini ye mme asuanetop emi ẹnyenede mbufiọk ke esop edi akwa n̄kpọ un̄wam ndikan bụt.
4 Fori Mme Usọ Ukwọrọikọ Fo: Ufọkn̄wed Utom Ukara Abasi ye Esoputom ẹnọ nti ukpep ke afan̄ emi. Ndida se afo ekpepde ke mme mbono esop emi nsịn ke edinam ekeme ndinam n̄kọri fo ke utom ukwọrọikọ ọsọp. Mme mbono esop emi ẹsiwak ndinọ ekikere ẹte nnyịn inyene mme ini ndomonse ke nditịm idem nnọ an̄wautom. Utọ ukpep oro ayanam afo etịn̄ ikọ ọdọnọ, anam fi aka iso enyene uforo ke ukwọrọikọ, onyụn̄ ọbọp mbuọtidem fo. Nte ido edide, nte nnyịn inyenede ukeme ikan ke utom ukwọrọikọ, ntre ke nnyịn idikop inem inyụn̄ inyene mme utịp.
5 Bọn̄ Akam nọ Jehovah: Ke ndondo oro ima ikanam se idide ofụri ukeme nnyịn ndikan mme n̄kpọ oro ẹbiọn̄ọde n̄kọri eke spirit, nnyịn ikpenyene ndibọn̄ akam mben̄e spirit Jehovah ndin̄wam nnyịn man ikụt unen. (1 John 5:14, 15) Enye ọnọ nnyịn akwa ubom odudu esie.—2 Cor. 4:7.
6 Ih, n̄kọri oro afo anamde ayan̄wam fi idịghe n̄kukụre ndimụm idatesịt n̄kama idahaemi edi n̄ko ndinyene ifụre ifụre itie ke obufa ererimbot Abasi, emi afo edikemede ndinam n̄kọri ke nsinsi ke idak Obio Ubọn̄ eke heaven esie.