‘Mmọ Ẹdinam Didie Ẹkop?’
1 Jesus ama ọsọn̄ọ etịn̄ ete: “Ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Kpa ye ifịk ifịk ukeme nnyịn, ediwak miliọn owo ke mme itie ikie ke ẹsụk ẹdodu oro mîbọhọ ikọ ntiense ke idem mmọ. Ndusụk ukara ẹkpan utom nnyịn. Ediwak idụt ẹnyene ekese ibatowo oro akade iso ndikọri usọp usọp. Ntem, ‘mmọ ẹdinam didie ẹkop?’—Rome 10:14.
2 Nyene Mbuọtidem ke Jehovah: Ana nnyịn iti nte ke Jehovah ọfiọk ekikere kpukpru owo. Inamke n̄kpọ m̀mê idaha owo oro etie didie, edieke enye oyomde akpanikọ aban̄ade Abasi ke ofụri esịt, enye oyokụt enye.—1 Chron. 28:9.
3 Abraham ama enyene ọkpọsọn̄ udọn̄ aban̄a mme andidụn̄ Sodom ye Gomorrah. Edi Abasi ama ọnọ enye nsọn̄ọ nte ke owo idisoboke Sodom idem ọkpọkọm ẹkụt ndinen owo duop kpọt do. (Gen. 18:20, 23, 25, 32) Akananam Jehovah isoboke ndinen owo ikọrọ ye mme idiọkowo, nte okowụtde ke ndinyan̄a Lot ye nditọ esie iban.—2 Pet. 2:6-9.
4 Ini kiet Elijah ama ekere ke imọ ikpọn̄ ikanam n̄kpọ inọ ata Abasi. Nte ededi, Jehovah ama ọnọ enye nsọn̄ọ nte ke ikedịghe enye ikpọn̄ ye nte ke enye oyokụre utom oro enye ọkọtọn̄ọde. (1 Ndi. 19:14-18) Mme idaha ẹtie didie ke eyo nnyịn?
5 Yọhọ ye Utom Abasi: Nnyịn ifiọkke nte utom edinọ ikọ ntiense oro osụhọde ndinam okponde. Jehovah edi andise mban̄a utom emi onyụn̄ ada mme angel esie ndise mban̄a enye. (Edi. 14:6, 7) Edi enye edibiere udomo oro ẹnyenede ndinọ kpukpru idụt ikọ ntiense. Edieke Jehovah emekde, enye ekeme ndikụt nte ke ẹsuan etop Obio Ubọn̄ ke mme usụn̄ oro nnyịn mîkam ikereke man ediwak owo efen efen “ẹkpekop ikọ gospel, ẹnyụn̄ ẹnịm ke akpanikọ.” (Utom 15:7) Se Jehovah anamde edidu ke ọyọhọ n̄kemuyo ye orụk owo emi enye edide—ima ima, enyene-ọniọn̄, ye nnennen Abasi.
6 Edi ifet nnyịn ndinam utom ke n̄kemuyo ye uduak Jehovah, isịnde ofụri ukeme nnyịn ndinam kpukpru owo ẹkop eti mbụk.—1 Cor. 9:16.