Mbon Oro Ẹkopde Inemesịt Ẹkan ke Isọn̄
1 “Ọfọfọn ọnọ [“inemesịt enyene,” NW] mbon eke Jehovah edide Abasi mmọ”! (Ps. 144:15) Mme ikọ oro ẹtịn̄ ẹban̄a Mme Ntiense Jehovah nte mbon oro ẹkopde inemesịt ẹkan ke isọn̄. Idụhe inemesịt eke okponde akan enye oro otode edinam n̄kpọ ata odu-uwem ye Abasi kierakiet, kpa Jehovah. Sia enye edide “Abasi inemesịt,” mbon oro ẹtuakde ibuot ẹnọ enye ẹkop inemesịt nte enye. (1 Tim. 1:11, NW) Nso idi ndusụk ikpehe utuakibuot nnyịn oro ẹtịpde ẹsịn ke nnyịn ndikop inemesịt ntre?
2 Mme Ntak Ndikop Inemesịt: Jesus ama ọsọn̄ọ ọnọ nnyịn ete ke inemesịt oto nnyịn ‘ndinyene udọn̄ ke n̄kpọ eke spirit nnyịn.’ (Matt. 5:3, NW) Edika iso n̄kpep Bible nnyụn̄ ndụk kpukpru mbono esop Christian nnyịn oyụhọ udọn̄ oro. Edikpep akpanikọ Ikọ Abasi osio nnyịn ke ufụn nsu ido ukpono ye editụn usụn̄. (John 8:32) N̄wed Abasi ekpep nnyịn mfọnn̄kan usụn̄ udu uwem n̄ko. (Isa. 48:17) Ke ntak oro, nnyịn imenyene nti nsan̄a Christian ye inem inem itie ebuana nditọete.—1 Thess. 2:19, 20; 1 Pet. 2:17.
3 Nnyịn imenen̄ede ikop uyụhọ ke ndinịm mme n̄kokon̄ idaha ido uwem Abasi, koro nnyịn imọfiọk ite ke emi ekpeme nnyịn onyụn̄ adat Jehovah esịt. (N̄ke 27:11) Ewetmbụk n̄kpọntịbe kiet ọkọdọhọ ete: “Kpa ye kpukpru ukpan ukpan idaha mmọ, Mme Ntiense Jehovah itiehe nte mbon oro ẹnanade inemesịt. Baba, idịghe ntre. Etie nte n̄kparawa ọkọrọ ye ikpọ owo [ke otu mmọ] ẹnen̄ede ẹkop idatesịt ẹnyụn̄ ẹda ukem ukem.” Didie ke nnyịn ikeme ndin̄wam mbon en̄wen ẹtiene ẹbuana ke usụn̄ uwem inemesịt nnyịn?
4 N̄wam Mbon En̄wen Ẹkop Inemesịt: Ererimbot ọyọhọ ye unana inemesịt, ndien mme owo ke ofụri ofụri ẹnyene mfụhọ mfụho ini iso. Nte ededi, nnyịn imenyene nyayama idotenyịn, ifiọkde ite ke usen kiet kpukpru mfụhọ ẹdidi n̄kpọ eset. (Edi. 21:3, 4) Ke ntre, nnyịn imabuana ifịk ifịk ke utom ukwọrọikọ, iyomde mbon esịt akpanikọ man ibuana idotenyịn ye mme edinịm ke akpanikọ nnyịn ẹban̄ade Jehovah ye mmọ.—Ezek. 9:4.
5 Eyenete an̄wan kiet edide asiakusụn̄ ọkọdọhọ ete: “Idụhe n̄kpọ oro ọnọde uyụhọ akan edin̄wam mme owo ẹdi ẹdifiọk Jehovah ye akpanikọ esie.” Ẹyak nnyịn inam kpukpru se ikemede man isịn udọn̄ inọ ediwak owo efen efen ndinyịme ukpepn̄kpọ Bible. Ndinam n̄kpọ Jehovah nnyụn̄ nsịn idem ke ndin̄wam mbon en̄wen ẹnam n̄kpọ esie ada n̄kponn̄kan inemesịt edi.—Utom 20:35.