“Mme Enọ ke Owo” Ẹkpeme Erọn̄ Abasi Ifịk Ifịk
1 Nso ima ima ndutịm ke Jehovah anam ntem ebe ke Eyen esie ke ndinọ “mme enọ ke owo”! (Eph. 4:8, 11, 12, NW) Mmọ ẹnyene ediwak mbiomo, esịnede ifịk ifịk edikpeme udịmerọn̄ Abasi. (1 Pet. 5:2, 3) Kpukpru nnyịn imọbọ ufọn ito mme ndutịm emi ẹnen̄erede ẹyom mi. Edide ndusụk owo ẹsobo mme mfịna, ẹdụk esop obufa, ẹnyene ndusụk mmemidem, m̀mê ẹyoyo ẹkpọn̄ akpanikọ, iren emi ẹnyene ọkpọkpọ udọn̄ ke mfọnọn̄kpọ eke spirit kpukpru owo.—Phil. 2:4; 1 Thess. 5:12-14.
2 Ke ini mme n̄kpọntịbe oro ẹtịmerede ererimbot ẹnamde ndịk odu, mme udiana ekpemerọn̄ emi ẹsiwụt nte idide “ọtọ udịbe ofụm, ye etehe ubọhọ edịm.” Ke ini nnyịn ikpade mba m̀mê ibiomde edidobi mbiomo inyụn̄ iyomde ndọn̄esịt, mmọ ẹsinam nnyịn ikop nsọn̄idem, “ẹbiet akpa mmọn̄ ke edisat isọn̄” mîdịghe “ẹbiet mfụt akwa itiat ke isọn̄ n̄kpa-mba.”—Isa. 32:2.
3 Ndisịn Udọn̄ nnọ Mbon Oro Mînamke Utom Aba: Mbiowo ẹsịn akpan ukeme ndisịn udọn̄ nnọ mbon oro mînamke utom kpukpru ini m̀mê oro mînamke utom aba, ẹn̄wamde mmọ ndifiak mbuana ofụri ini ke kpukpru edinam ke esop. Ima ima utom ubọkerọn̄ an̄wam ediwak owo ndidụk mme mbono esop kpukpru ini onyụn̄ ọsọn̄ọ mmọ idem ke n̄kan̄ eke spirit tutu esịm idaha oro mmọ ẹfiakde ẹbuana ke an̄wautom. Kpukpru utọ ukeme oro mbiowo ẹsịnde do ẹwụt ima ima ukpeme Jehovah ye ifịk ifịk ndausụn̄ Jesus Christ. Enye enịm uwụtn̄kpọ ke ediwụt utọ edikere mban̄a oro nnọ ekededi ke otuerọn̄ esie oro oyode ọkpọn̄ usụn̄ m̀mê osopde.—Matt. 18:12-14; John 10:16, 27-29.
4 Mme udiana ekpemerọn̄ ẹsiyom mme idiọn̄ọ oro ẹwụtde ke ekeme ndidi ndusụk erọn̄ ke ẹkop mmemidem ke n̄kan̄ eke spirit. Eyedi owo ekededi oro owụtde idiọn̄ọ unana udọn̄, oro mîdụkke mme mbono esop kpukpru ini aba, m̀mê etekde ke ifịk ke utom an̄wautom oyom un̄wam ke n̄kan̄ eke spirit. Mbiowo ẹnyene ọkpọsọn̄ udọn̄ ndin̄wam owo ekededi oro ọtọn̄ọde ndinyene ntụhọ usịnen̄kpọ ye ukamaidem ererimbot m̀mê oro enyenede edu edikụt ndudue nnọ esop. Ye ata udọn̄ ye ima, mme esenyịn oro ẹwụtde edikere mban̄a ẹnyịme ‘ndiyak ukpọn̄ mmọ’ nnọ man ẹkeme ndin̄wam utọ mbon emi ndifiak ndemede ima mmọ nnọ Jehovah.—1 Thess. 2:8.
5 Ke ini edem, ndusụk mme Christian oro ẹma ẹkeyak idem ẹnọ ẹma ẹtre ndibuana ye esop, ẹtrede ndinam utom ke n̄kan̄ eke spirit koro mmọ ẹyakde mme mfịna unana nsọn̄idem, edikpu ke n̄kan̄ ndutịm uforo, m̀mê mme mfịghe ubon ẹkan mmọ ubọk. Ndusụk mmọ ẹwọrọ ẹka obufa ebietidụn̄ ẹnyụn̄ ẹtre ndiyom esop oro ekperede. Ye unana edikụt ndudue nnọ mmọ, mbiowo emi ke mfọnido ẹsinọ nsọn̄ọ nte ke Jehovah ekere aban̄a kpukpru mme erọn̄ esie ke oyonyụn̄ omụm mmọ akama ke n̄kpọsọn̄ ini. (Ps. 55:22; 1 Pet. 5:7) Mme ekpemerọn̄ oro ẹdude ke edidemede ẹkeme ndin̄wam mmọ ẹdiọn̄ọ nte ke edieke mmimọ ‘isan̄ade ikpere Abasi, enye ayasan̄a ekpere mmimọ,’ ọnọde ndọn̄esịt ye nduọkodudu.—Jas. 4:8; Ps. 23:3, 4.
6 Ndida Mbon N̄kpọnnam ke Ọsọn̄urua: Ima ima mme udiana ekpemerọn̄ emi ẹkere n̄ko ẹban̄a mbon oro mme owo ẹkemede ndifụmi. Kpukpru esop ẹnyene mbon n̄kpọnnam oro mîkemeke ndikpọn̄ ufọk, m̀mê mbon oro ẹbiomode ndo. Nte an̄wan̄ade, mmọ ẹnyene esisịt udeme ke nditan̄a etop Obio Ubọn̄ ke ntak mme idaha mmọ. Ekeme ndidi ifet mmọ ndinọ ikọ ntiense edi n̄kukụre ye isenowo, mme andisan̄a mbe, m̀mê mme andikpeme mmọ. Kpa ye oro, ẹnyene ndida se ededi oro mmọ ẹkemede ndinam nte ntịpnsịn oro enyenede ufọn ọnọ ofụri utom ukwọrọikọ. (Matt. 25:15) Idem ọkpọkọm mmọ ẹnọ ikọ ntiense ke minit 15 kpọt, mmọ ẹkpenyene nditọt oro, ndien ẹnyene ndika iso mbat mmọ nte mme asuanetop Obio Ubọn̄ ofụri ini.
7 “Mme enọ ke owo” ẹnen̄ede ẹfiọk udọn̄ eke spirit nditọete mmọ ke ini ntem ke isua—ini Editi. Ini emi odot didie ntem ọnọ mbiowo ndisịn akpan ukeme ndin̄wam kpukpru mbon oro ẹsopde usụn̄ ndifiak nnyene idatesịt ye ifụre ekikere oro otode ufiop ufiop itie ebuana ke esop! Nnyịn imesidara ke ini nnyịn ikụtde utọ “mmọ emi ẹtode ke ufọk mme andinịm ke akpanikọ” mi ẹdụkde mme mbono esop ẹnyụn̄ ẹwọrọde an̄wautom, ẹfiakde ẹsọn̄ọ mbuọtidem mmọ ke uwa ufak.—Gal. 6:10; Luke 15:4-7; John 10:11, 14.