Mbuọtidem Nnyịn Onụk Nnyịn Ndinam Nti Utom
1 Mbuọtidem okonụk Noah, Moses ye Rahab ndinam n̄kpọ. Noah ama ọkọn̄ ubom. Moses ama esịn inem uwem ibio ini ke okụre Pharaoh. Rahab ama edịp mbon uyep ndien ekem anam item mmọ, anyan̄ade ikọtufọk esie. (Heb. 11:7, 24-26, 31) Nti utom ewe ke mbuọtidem nnyịn onụk nnyịn ndinam mfịn?
2 Edinọ Ikọ Ntiense: Mbuọtidem onụk nnyịn nditịn̄ mban̄a utịbe utịbe Abasi nnyịn ye mme ndutịm oro enye anamde kaban̄a nsinsi inemesịt. (2 Cor. 4:13) Ke ndusụk idaha, nnyịn imesimen̄e ndinọ ikọ ntiense. Edi ke ini nnyịn ‘inịmde Jehovah ke iso nnyịn kpukpru ini,’ emi ọsọn̄ọ nnyịn idem onyụn̄ anam nnyịn ikûkop ndịk. (Ps. 16:8) Ekem mbuọtidem nnyịn oyonụk nnyịn ndibuana eti mbụk ye mme iman nnyịn, mbọhọidụn̄, nsan̄autom, nsan̄a ufọkn̄wed, ye mbon efen ke kpukpru idaha oro ẹdotde.—Rome 1:14-16.
3 Edisop Idem Ọtọkiet: Edidụk mbono esop ofụri ini edi eti utom efen oro mbuọtidem onụkde nnyịn ndinam. Didie ke edi ntre? Enye owụt ke nnyịn imenịm ke akpanikọ nte ke ini ibohode ke mme mbono esop Christian, Jesus odu ye nnyịn ebe ke edisana spirit Abasi. (Matt. 18:20) Enye owụt ke nnyịn imenyene udọn̄ ‘ndikop se spirit ọdọhọde mme ufọk Abasi.’ (Edi. 3:6) Nnyịn imesinam item oro ibọde koro nnyịn idade enyịn eke spirit nnyịn ikụt nte ke enye emi ekpepde nnyịn n̄kpọ edi Akwa Anditeme nnyịn, Jehovah.—Isa. 30:20, NW.
4 Mme Edimek Oro Nnyịn Inamde: Nditịm nnịm nte ke se idịbede owo ke enyịn ẹdu onụk nnyịn ndinịm mme n̄kpọ eke spirit akpa ke uwem nnyịn. (Heb. 11:1) Emi esiwak ndibuana ediyak mme n̄kpọ obụkidem ẹtak. Ke uwụtn̄kpọ, ebiowo kiet ama esịn utom oro ọnọde akamba udori koro emi ọkpọwọrọ ndifụmi mme mbono esop, ndiwọrọ n̄kpọn̄ ubon esie, ye ndikpọn̄ utom usiakusụn̄ esie. Kpasụk ntre, nnyịn ikpakam inyene ọyọhọ mbuọtidem ke un̄wọn̄ọ Bible nte ke Jehovah ọyọnọ mbon oro ‘ẹbemde iso ẹyom Obio Ubọn̄ Esie ye edinen ido Esie’ se ẹdade ẹdu uwem.—Matt. 6:33.
5 Mbon en̄wen ẹkụt ọkpọsọn̄ odudu oro mbuọtidem enyenede ke uwem nnyịn. Ke akpanikọ, etop mbuọtidem nnyịn asuana ke ofụri isọn̄. (Rome 1:8) Ke ntre, kpukpru nnyịn ikpakam ida nti utom nnyịn iwụt ke mbuọtidem nnyịn enyene uwem.—Jas. 2:26.