Nte Mme Esenyịn Ukpepn̄kpọ N̄wed Esop Ẹwụtde Ọkpọkpọ Udọn̄
1 Ẹtịm Ukpepn̄kpọ N̄wed Esop man “ẹkeme ndinọ ọkpọkpọ ntịn̄enyịn efen efen ke n̄kọri owo kiet kiet ke n̄kan̄ eke spirit. . . . Emi edi ediwụt ima-mfọnido Jehovah ye ima ima edikere mban̄a oro enye ekerede aban̄a ikọt esie.” (om-EF p. 75; Isa. 40:11) Esenyịn ukpepn̄kpọ n̄wed enyene akpan utom ndinọ utọ ọkpọkpọ ntịn̄enyịn oro.
2 Ke Ukpepn̄kpọ N̄wed: Sia ẹnamde mme otu ukpepn̄kpọ n̄wed ẹdi n̄kpri n̄kpri, esenyịn ukpepn̄kpọ n̄wed ekeme ndinen̄ede ndiọn̄ọ mme andibuana ke otu esie. (N̄ke 27:23) Nte ido edide, mme ifet ẹdu ke urua kiet kiet ndinyene nneme mbemiso m̀mê ke ukpepn̄kpọ asuanade. Ke ufan̄ ọfiọn̄ kiet, enye ekeme ndinyene nneme ke ekperede ndidi ye kpukpru owo ke otu. Emi ayan̄wam mme andibuana ke ukpepn̄kpọ n̄wed ẹnyene ifụre ndisan̄a n̄kpere enye ke ini mmọ ẹsobode mme idomo m̀mê ke ini ẹyomde nsịnudọn̄.—Isa. 32:2.
3 Esenyịn ukpepn̄kpọ n̄wed oyodomo ndisịn udọn̄ nnọ kpukpru owo ke otu ndibuana ke ukpepn̄kpọ. Usụn̄ kiet oro enye ekemede ndinam emi edi ke ndinịm ukpepn̄kpọ emi ke mmemmem usụn̄ oro owụtde mfọnido. (1 Thess. 2:7, 8) Enye oyom usụn̄ ndinam kpukpru owo, esịnede n̄kpri owo, ẹtiene ẹbuana ke nneme emi. Edieke ndusụk owo ẹsikopde bụt ndibọrọ mbụme, enye ekeme ndinọ ọkpọkpọ un̄wam ebe ke ndibabak ndọhọ mmọ ẹtịm idem ẹnọ edikot itie N̄wed Abasi m̀mê ndinọ ibọrọ ke akpan ikpehe ekikere. Mîdịghe enye ekeme ndiwụt mmọ nte ẹkpenọde ibọrọ ke ikọ idem mmọ.
4 Edieke udiana esenyịn ukpepn̄kpọ n̄wed edide asan̄autom unamutom, esenyịn ayanam ndutịm man enye enịm ukpepn̄kpọ ini kiet ke kpukpru ọfiọn̄ iba. Emi ayanam esenyịn ese nte udiana esie enịmde ukpepn̄kpọ onyụn̄ ọnọ nti ekikere. Nso eti ndutịm ke emi edi ntem ndin̄wam nditọete ẹnam n̄kọri ke usọ unọ ukpep mmọ!—Titus 1:9.
5 Ke An̄wautom: Kiet ke otu akpan mbiomo esenyịn ukpepn̄kpọ n̄wed edi ndida usụn̄ ke utom ukwọrọikọ. (Num. 27:16, 17) Enye ayanam eti ndutịm ọnọ unọ ikọ ntiense otu onyụn̄ odomo ndin̄wam kpukpru owo ke otu ẹnyene idatesịt ke utom ukwọrọikọ. (Eph. 4:11, 12) Man anam emi, enye ayanam edi utịtmbuba esie ndisan̄a ye owo kiet kiet ke otu emi. Enye n̄ko asan̄a ye esenyịn utom man anam ndutịm ọnọ mbon oro ẹkpemade ndinam n̄kọri ke ndusụk ikpehe ke utom ukwọrọikọ mmọ ndibọ un̄wam nto asuanetop oro enen̄erede enyene ifiọk.
6 Nte Ima Ima Ekpemerọn̄: Esenyịn ukpepn̄kpọ n̄wed enyene udọn̄ ke idem mbon oro ẹnyenede esisịt ebuana ke utom ukwọrọikọ ke ntak mme idaha mmọ. Enye okụt ete ke mbon oro ẹnyenede esisịt ukeme ke ntak usọn̄ m̀mê ke ntak mîkemeke ndiwọrọ an̄wa ye mbon oro mînyeneke ukeme ke ibio ini ke ntak ọkpọsọn̄ udọn̄ọ m̀mê ẹdade unan ẹdiọn̄ọ ẹban̄a ndutịm oro enyịmede mmọ ẹtọt ibatutom mmọ oro ẹdide ke iduọk minit 15 (oro edi, n̄kpọ nte minit 15, 30, ye 45) edieke mmọ mîkemeke nditọt ofụri hour ke ọfiọn̄. (Kọmiti Utom Esop edibiere m̀mê anie odot ndibọ ufọn nto ndutịm emi.) Enye n̄ko enyene udọn̄ ke idem mbon oro ẹdude ke otu emi mîwọrọke an̄wautom aba, odomode ndin̄wam mmọ ẹfiak ẹtọn̄ọ ndinam utom ye esop.—Luke 15:4-7.
7 Nnyịn iwut esịtekọm didie ntem ke ima ima udọn̄ oro mme esenyịn ukpepn̄kpọ n̄wed ẹwụtde! Ọkpọkpọ ntịn̄enyịn oro mmọ ẹnọde an̄wam “kpukpru nnyịn ikabade idi kiet ke mbuọtidem . . . , isịm ofụri idaha uyọhọ Christ.”—Eph. 4:13.