N̄wam Esenyịn Ukpepn̄kpọ N̄wed Esop Mbufo
1 Nnyịn owo kiet kiet imesibọ ediwak ufọn ito Ukpepn̄kpọ N̄wed Esop. Ọfiọn̄ oko nnyịn ima ineme iban̄a nte esenyịn Ukpepn̄kpọ N̄wed Esop anamde utom esie. Edi nso ke nnyịn ikeme ndinam man in̄wam enye, nnyịn ke idem nnyịn ye mbon efen inyụn̄ ibọ ufọn?
2 Dụk Kpukpru Urua: Sia ibat mbon oro ẹdude ke otu ukpepn̄kpọ n̄wed mîwakke, afo ndibuana edi akpan n̄kpọ. Nam edi utịtmbuba fo ndidụk kpukpru urua. Afo emekeme n̄ko ndin̄wam ebe ke ndika ke ini, man an̄wam esenyịn ọtọn̄ọ ukpepn̄kpọ nte odotde.—1 Cor. 14:40.
3 Mme Ibọrọ Oro Ẹbọpde-Bọp: Usụn̄ efen oro afo ekemede ndin̄wam edi ke ndinam ntịmidem nte ọfọnde nnyụn̄ nnọ mme ibọrọ oro ẹbọpde-bọp. Mfọnn̄kan ibọrọ edi enye oro owụkde ntịn̄enyịn ke akpan n̄kpọ kiet kpọt, emi n̄ko esisịn udọn̄ ọnọ mbon efen nditiene nnọ ibọrọ. Fep ndinọ kpukpru ibọrọ oro ẹdude ke ikpehe ekikere kiet. Edieke n̄kpọ otụkde fi esịt ke se ekpepde, nam nneme oro enyene inem ke ndibuana ekikere fo ye mbon eken.—1 Pet. 4:10.
4 Edieke enyenede ifet ndikot mme ikpehe ekikere nnọ otu, nọ ntịn̄enyịn ke ini okotde. Ndikot n̄wed ọfọn etịp esịn ke ukpepn̄kpọ oro okụtde unen.—1 Tim. 4:13.
5 Unọ Ikọ Ntiense Otu: Ẹnịm mme mbono an̄wautom ke ediwak itie ukpepn̄kpọ n̄wed, ndien afo ndinọ mme ndutịm emi ibetedem an̄wam esenyịn ndinọ ndausụn̄ ke utom ukwọrọikọ. Da mme ndutịm emi nte mme ifet ndisịk n̄kpere nditọete fo nnyụn̄ nsịn udọn̄ nnọ mmọ.
6 Ibatutom An̄wautom: Usụn̄ efen oro ekemede ndin̄wam esenyịn emi edi ndinọ ibatutom an̄wautom fo ke eti ini ke utịtọfiọn̄. Afo emekeme ndinọ enye ibatutom an̄wautom fo ke ubọk mîdịghe esịn enye ke ekebe oro ẹnịmde ẹnọ ibatutom an̄wautom ke Ufọkmbono Obio Ubọn̄. Ewetn̄wed ekeme ndika do n̄kosion̄o ibatutom an̄wautom oro mme esenyịn ukpepn̄kpọ n̄wed ẹkedọn̄de.
7 Ẹyedara afo ndidiana kiet ye esenyịn Ukpepn̄kpọ N̄wed Esop fo. Ke akande kpukpru, afo emekeme ndinyene nsọn̄ọ nte ke Jehovah ‘oyodu ye afo.’—Phil. 4:23.