Wụt Ima Ima Udọn̄ ke Idem “Nditọ-Akpa”
1 Jehovah edi “ete nditọ-akpa.” (Ps. 68:5) Ẹkụt udọn̄ oro enye enyenede aban̄a mfọnọn̄kpọ mmọ ke ewụhọ emi enye ọkọnọde idụt Israel eset ete: “Ẹkûfịk baba ebe-akpa, ye eyen-akpa. Edieke afo efịkde enye, enye onyụn̄ eseme ọnọ mi, nditreke ndikop eseme esie.” (Ex. 22:22, 23) Ibet Abasi ama esịne n̄ko ndutịm ẹkenamde ndin̄wam utọ mbon oro ke unana mmọ. (Deut. 24:19-21) Ke idak ndutịm Christian, ẹsịn udọn̄ ẹnọ ata mme andituak ibuot “ndisan̄a nse nditọ-akpa ye mme ebe-akpa ke ukụt mmọ.” (Jas. 1:27) Didie ke nnyịn ikeme ndikpebe ima ima udọn̄ Jehovah ke idem mbon oro ẹkọride ke mme ubon oro ete m̀mê eka kpọt esede enyịn m̀mê ubon oro abaharede ke n̄kan̄ ido ukpono?
2 Unọ Ukpep eke Spirit: Edieke afo edide ete m̀mê eka oro ọbọkde nditọ ikpọn̄ m̀mê enyenede nsan̄a ndọ oro mînịmke ke akpanikọ, ndinịm ukpepn̄kpọ Bible ofụri ini ye nditọ fo ekeme ndikama n̄kpọ-ata. Edi oyom enịm ukpepn̄kpọ Bible ofụri ini oro enyenede ufọn edieke anade mmọ ẹkọri ẹwọrọ owo, ẹnyụn̄ ẹnyene iwụk. (N̄ke 22:6) Ndinyene nneme ye mmọ ke usen ke usen mban̄a mme n̄kpọ eke spirit edi akpan n̄kpọ n̄ko. (Deut. 6:6-9) Idem ekeme ndimem fi ndusụk ini, edi kûkpa mba. Ka bịne Jehovah koyom odudu ye ndausụn̄ nte afo ‘akamade nditọ fo ke ntụnọ ye item Ọbọn̄.’—Eph. 6:4.
3 Edieke afo oyomde ndusụk un̄wam ke ndibiom mme mbiomo N̄wed Abasi fo, nam mbiowo ẹdiọn̄ọ. Mmọ ẹkeme ndinọ nti ekikere mîdịghe ẹn̄wam fi ndinam ndutịm eke spirit oro ọfọnde nnọ ufọk fo.
4 Nte Mbon En̄wen Ẹkemede Ndin̄wam: Ke akpa isua ikie, Timothy ama akabade edi ifịk ifịk asan̄autom Jehovah kpa ye oro ọkọkọride okpon ke ubon oro abaharede ke n̄kan̄ ido ukpono. Nte eyịghe mîdụhe, ifịk ifịk ukeme emi eka ye eka eka esie ẹkesịnde ndikpep enye Edisana N̄wed Abasi toto ke uyen ama enen̄ede etịp esịn ke emi. (Utom 16:1, 2; 2 Tim. 1:5; 3:15) Nte ededi, enye ama ọbọ ufọn n̄ko oto edidiana ye mme Christian eken, esịnede apostle Paul, oro akadade Timothy nte ‘edima eyen esie, emi anamde akpanikọ ke Ọbọn̄.’—1 Cor. 4:17.
5 Kpasụk ntre mfịn, ọfọn didie ntem ke ini nditọete oro ẹkọride ẹsịm ọyọhọ idaha ke n̄kan̄ eke spirit ẹwụtde ima ima udọn̄ ke idem nditọakpa ke esop! Nte ọmọfiọk mmọ kiet kiet ke enyịn̄? Nte emesinyene nneme ye mmọ ke mme mbono esop Christian ye ke mme ini eken? Dọhọ mmọ ẹsan̄a ye afo ke an̄wautom. Ke ndusụk idaha afo emekeme ndikot mmọ ye ete m̀mê eka oro ọbọkde mmọ ikpọn̄ m̀mê oro enịmde ke akpanikọ ẹdibuana ke ukpepn̄kpọ ubon fo m̀mê ke ini anamde ndutịm kaban̄a eti unọ idem nduọkodudu. Ke ini n̄kpri owo emi ẹdade fi nte ufan mmọ, mmọ ẹyesọsọp ẹkpebe uwụtn̄kpọ fo ẹnyụn̄ ẹnyịme nsịnudọn̄ fo.—Phil. 2:4.
6 Jehovah enen̄ede enyene udọn̄ aban̄a nditọakpa, ndien enye ke ọdiọn̄ ima ima ukeme nnyịn ndin̄wam mmọ ẹnam akpanikọ edi eke mmọ. Ediwak mbon oro ẹkekọride ke ubon oro ete m̀mê eka ọbọkde nditọ ikpọn̄ m̀mê ubon oro abaharede ke n̄kan̄ ido ukpono ẹma ẹbọ uto nsịnudọn̄ oro, ndien ke ẹsọn̄ọ ẹda ẹnam utom idahaemi nte mme asiakusụn̄, mme asan̄autom unamutom, mbiowo, mme esenyịn oro ẹsan̄ade-san̄a, mme isụn̄utom, m̀mê mme andibuana ke ubon Bethel. Kpukpru nnyịn ikpakam iyom mme usụn̄ ndinyene “in̄wan̄-in̄wan̄ esịt” ke ima oro inyenede inọ nditọakpa, ke ndikpebe Ete nnyịn eke heaven.—2 Cor. 6:11-13.