Utom Oro Oyomde Nsụhọdeidem
1 Ikọ Abasi eteme nnyịn ete ‘isụhọde idem, ikûda idiọk isio owo usiene idiọk edi ikam idiọn̄ mme owo.’ (1 Pet. 3:8, 9) Item oro enen̄ede enyene ebuana ye utom ukwọrọikọ. Ke akpanikọ, utom ukwọrọikọ Christian ekeme ndidomo nsụhọdeidem nnyịn.
2 Nsụhọdeidem edi edu oro an̄wamde nnyịn ndiyọ n̄kpọsọn̄ idaha. Ke ini ikwọrọde ikọ, nnyịn imesika ibịne mbon oro nnyịn mîdiọn̄ọke ke ini mmọ mîkotke nnyịn, ifiọkde ite ke ndusụk mmọ ẹyetịn̄ ikọ ye nnyịn ke usụn̄ oro mîfọnke. Oyom nsụhọdeidem man ikeme ndika iso n̄kwọrọ ikọ ke utọ mme idaha oro. Ke efakutom oro owo mîsikpan̄ke utọn̄, nditọete iban iba emi ẹdide mme asiakusụn̄ ẹma ẹsan̄a to ke enyịnusụn̄ sịm enyịnusụn̄ kpukpru usen ke isua iba ye unana owo ndomokiet ndinọ n̄kpan̄utọn̄! Edi mmọ ikakpaha mba, ndien mfịn, esop iba ẹdu ke ikpehe oro.
3 Ndinam N̄kpọ Mban̄a Emiom: Nsụhọdeidem ayanam nnyịn ikpebe Jesus ke ini mbon efen ẹsọn̄de ido ye nnyịn. (1 Pet. 2:21-23) N̄wan kiet ama osụn̄i eyenete an̄wan ke ufọk kiet ndien ekem ebe esie ama adiana ye enye, ọdọhọde eyenete an̄wan oro ọsọsọp ọwọrọ ke okụre oro. Eyenete emi n̄kukụre ama atuak inua imam onyụn̄ ọdọhọ ete ke imodori enyịn ndinyene nneme ye mmọ ini efen. Emi ama enen̄ede otụk ebe ye n̄wan oro tutu mmọ ẹnyịme ndikpan̄ utọn̄ nnọ Ntiense efen oro akawahade, ẹnyụn̄ ẹnyịme ikot oro ẹkenọde mmọ ndidụk mbono esop ke Ufọkmbono Obio Ubọn̄. Eyenete an̄wan oro mmọ ẹkesuenede ke mbemiso ama odu do onyụn̄ ọkọm mmọ, ọnọde mmọ ikọ ntiense efen efen. Nnyịn n̄ko imekeme ndinam esịt mbon oro mîyomke ndikpan̄ utọn̄ nnọ nnyịn emem ebe ke ndiwụt ‘sụn̄-sụn̄ ido ye ido uten̄e.’—1 Pet. 3:15; N̄ke 25:15.
4 Fep Ntan̄idem: Ifiọk Bible oro nnyịn inyenede inọhọ nnyịn isọn̄ ndomokiet ndise mme owo ke usụhọde m̀mê nditịn̄ ikọ mbiat mmọ. (John 7:49) Utu ke oro, Ikọ Abasi ọnọ nnyịn item ete ‘ikûsụn̄i baba owo kiet.’ (Titus 3:2) Ke ini nnyịn isụhọrede idem ke esịt nte Jesus okosụhọrede, nnyịn imekeme ndinọ mbon efen nduọkodudu. (Matt. 11:28, 29) Ẹdu nsụhọdeidem anam etop nnyịn edemede mme owo udọn̄.
5 Ih, nsụhọdeidem an̄wam nnyịn ndika iso nnam utom ke efakutom oro owo mîsikpan̄ke utọn̄. Enye ekeme ndinam esịt mbon oro mîsikpan̄ke utọn̄ inọ nnyịn emem, onyụn̄ anam mbon efen ẹkpan̄ utọn̄ ke etop Obio Ubọn̄. Ke akande kpukpru, emi enem Jehovah emi ‘ọfọnde ido ye mbon nsụkidem,’ esịt.—1 Pet. 5:5.