Kpep Mbon En̄wen Edisana Usem
1 Okposụkedi Mme Ntiense Jehovah ẹtode nsio nsio ‘obio, esien, idụt, ye usem,’ mmọ ẹdi mbon oro ẹdianade kiet, kpa ata otu nditọete ofụri ererimbot. (Edi. 7:9) Emi edi n̄wọrọnda ke ererimbot oro abaharede mfịn. Emi ekeme didie nditịbe? Koro ẹma ẹnọ nnyịn “edisana usem.”—Zeph. 3:9, NW.
2 Akwa Utịp: Nso idi edisana usem emi? Enye edi nnennen ifiọk akpanikọ N̄wed Abasi oro aban̄ade Jehovah ye mme uduak esie, akpan-akpan akpanikọ aban̄ade Obio Ubọn̄ Abasi. Nte Jesus ekebemde iso etịn̄, ẹda usụn̄ emi ẹkemede ndikụt ke isọn̄, kpa “asan̄autom emi anamde akpanikọ, onyụn̄ enyenede ọniọn̄,” ẹkpep akpanikọ emi ndien utịp edi nte ke mme owo “ke kpukpru usem mme idụt” ke ẹnyịme utuakibuot akpanikọ.—Matt. 24:45; Zech. 8:23.
3 Nte mme owo ẹkpepde edisana usem, emi onụk mmọ ndidu uwem ekekem ye mme idaha Jehovah. Mmọ ẹkpep “[ndinyene] esịt kiet ye ekikere kiet.” (1 Cor. 1:10) Ukpepn̄kpọ Abasi n̄ko anam mmọ ẹnyene nti edu, ẹtịn̄ akpanikọ, akpan akpan ke se iban̄ade edikwọrọ eti mbụk nnọ mbon efen. (Titus 2:7, 8; Heb. 13:15) Ikpọ ukpụhọde emi ẹnọ Jehovah ubọn̄.
4 Ke uwụtn̄kpọ, eren kiet oro ẹkekwọrọde eti mbụk ẹnọ ama enyene ediwak mbụme, ndien ẹma ẹda Bible ẹbọrọ kpukpru. Se enye okokopde ama otụk enye tutu enye ọtọn̄ọ ndibọ ukpep ikaba ke urua nnyụn̄ mbuana ke mme mbono esop. Idem ama akpa enye nte ẹkedarade enye ufiop ufiop ke Ufọkmbono Obio Ubọn̄, sia ediwak owo oro ẹkedụkde mbono esop ẹketode nsio nsio orụk. Ke ekpri ini ebede, enye ye n̄wan esie ẹma ẹnam ukpụhọde ke uwem mmọ ẹnyụn̄ ẹna baptism. Ọtọn̄ọde ke ini oro, enye an̄wam n̄kpọ nte owo 40 ndinam n̄kpọ Jehovah, esịnede ediwak mbonubon esie. Kpa ye unana nsọn̄idem esie, enye ama ọtọn̄ọ ndondo emi ndinam utom nte asiakusụn̄.
5 Ndikpep Mbon Efen N̄kpọ: Mme n̄kpọntịbe ererimbot ẹnam ediwak mbon oro ẹnyenede esịt akpanikọ ẹfiak ẹdụn̄ọde ekikere ye uwem mmọ. Ukem nte Jesus, udọn̄ nnyịn ekpedi ndin̄wam mmọ. Mme mfiakn̄ka ye ukpepn̄kpọ Bible oro ẹnyenede uforo ẹdi usụn̄ ndin̄wam mbon esịt akpanikọ ẹkpep edisana usem.
6 Usụn̄ unyene nneme oro ọfọnde ye mbon oro mînyeneke ini edi ndinịm mbio mbio ukpepn̄kpọ Bible ke enyịnusụn̄ mmọ. (km-EF 5/02 p. 1) Ndi ama odomo emi ese? Ke ini etịmde idem ndinam mfiakn̄ka, mek mme nneme oro ẹkemde ye enyeneufọk ke esịne-esịt Utom Obio Ubọn̄ Nnyịn eke January 2002. Ẹtịm ediwak nneme ke esịne-esịt emi man ada owo nnennen nnennen aka ediye uduot ekpri n̄wed Oyom m̀mê n̄wed Ifiọk. Nam ndomonse ke nneme emi man afo ekeme nditọn̄ọ nneme udọn udọn nnyụn̄ nda n̄keyịri ye ikpehe ekikere kiet ke n̄wed oro. Mek itie N̄wed Abasi kiet m̀mê iba oro edikotde onyụn̄ etịn̄ n̄kpọ aban̄a ke ikpehe ekikere oro, nyụn̄ tịm mbụme oro edidade eberi. Oro ayada ekesịm ikpehe ekikere oro afo odiomide ndineme ke mfiakn̄ka efen.
7 Ikọt Jehovah ke ẹbọ ediwak edidiọn̄ ẹto edikpep edisana usem. Nnyịn ikpakam itịn̄ enyịn in̄wam mbon en̄wen nditiene nnyịn ‘n̄kot enyịn̄ Jehovah’ nnyụn̄ ‘nnam n̄kpọ nnọ enye ke esịt kiet.’—Zeph. 3:9.