Ekebe Mbụme

◼ Mme item ewe ke oyom inam ke ini inọde mbon n̄kpọkọbi ikọ ntiense?

Ke nsụhọde n̄kaha n̄kpọ nte mbon n̄kpọkọbi miliọn itiaita ẹdu ke ofụri ererimbot, ndien ndusụk mmọ ẹwụt udọn̄ ke eti mbụk. (1 Tim. 2:4) N̄kọk itieutom kiet esibọ n̄kpọ nte leta 1,400 kpukpru ọfiọn̄ oto mbon n̄kpọkọbi ye mme iman mmọ emi ẹsiben̄ede ẹte ẹnọ mmimọ mme n̄wed m̀mê ẹdi ẹdise mmimọ. Ke adan̄aemi ediwak mbon n̄kpọkọbi ẹnyenede udọn̄ esịt akpanikọ, ifiọk n̄kpọntịbe owụt nte ke ndusụk mmọ ẹsinanam nte ke imenyene udọn̄ man ẹdia ufọn ẹto ikọt Abasi. Ke ikerede iban̄a emi, kpukpru owo ẹkpenyene ndinam mme item oro ẹtienede mi kaban̄a edinọ mbon n̄kpọkọbi ikọ ntiense.

Ke ediwak idaha ẹsida leta ẹnọ mbon n̄kpọkọbi ikọ ntiense. Ẹnen̄ede ẹteme ẹte nditọete iban ẹkûwet leta ẹnọ mbon n̄kpọkọbi ẹdide irenowo, idem ọkpọkọm uduak edi ndinọ un̄wam ke n̄kan̄ eke spirit. Nditọete oro ẹdotde kpọt ẹkpenam oro. Ẹkeme ndidọhọ nditọete iban oro ẹdotde ẹwet leta ẹnọ mbon n̄kpọkọbi ẹdide iban emi ẹwụtde ata udọn̄ ke akpanikọ Bible. Owo ikpenyeneke ndinọ okụk m̀mê ọkpọkpọ enọ ẹsọk mbon n̄kpọkọbi, idem okposụkedi ẹkemede ndiben̄e mme n̄kpọ emi.

Ke ini owo n̄kpọkọbi owụtde udọn̄, ẹkpenyene ndiyak enyịn̄ ye adres esie nnọ esop oro odude ke n̄kann̄kụk emi ufọk-n̄kpọkọbi oro odude. Nditọete iren oro ẹdotde emi ẹdude do ẹsifiọk nte ẹsede ẹban̄a nsio nsio idaha oro ẹkemede ndidemede. Edieke owo mîfiọkke esop, ẹkpenyene ndinọ ntọt emi ẹsọk n̄kọk itieutom.

Owo ikpanke nditọete oro ẹmekde ndisinịm mme mbono esop ye mbon n̄kpọkọbi man otodo ediwak mbon n̄kpọkọbi ẹkpekpep n̄kpọ ọtọkiet. Nte ededi, owo ikpenyeneke ndinam san̄asan̄a edinam ke ufọk-n̄kpọkọbi emi ekemede ndinam mme asuanetop ẹbuana ifụre ifụre ye mbon n̄kpọkọbi. N̄ko-n̄ko, ifọnke mme asuanetop ndika ufọk-n̄kpọkọbi nte ẹmama nnyụn̄ ndụk ndụk ye mbon n̄kpọkọbi.

Nnyịn ikpakam ‘inyene ibuot nte urụkikọt, inyụn̄ ifụre nte ibiom’ nte nnyịn ibuanade eti mbụk ye mbon n̄kpọkọbi.—Matt. 10:16.