Ndiwụt Esịtekọm Mban̄a Mbọm Abasi
1 Mbemiso akakabarede edi Christian, apostle Paul ama ada afai ọbiọn̄ọ Ido Ukpono Christ ndisuana. Nte ededi, sia enye akanamde emi ke unana ifiọk, ẹma ẹtua enye mbọm. Jehovah ama owụt mfọnido oro owo mîdotke, ndien ama ọnọ Paul utom edikwọrọ ikọ. Enye ama ada utom oro ke akpan n̄kpọ. (Utom 26:9-18; 1 Tim. 1:12-14) Esịtekọm oro Paul ekenyenede aban̄a mbọm Jehovah ama onụk Paul ndisịn idem nnam utom ukwọrọikọ esie mma.—2 Cor. 12:15.
2 Abasi owụt nnyịn mbọm n̄ko ke ndinọ nnyịn utom ukwọrọikọ. (2 Cor. 4:1) Ukem nte Paul, nnyịn imekeme ndiwụt esịtekọm mban̄a mbọm oro ẹwụtde nnyịn ke ndisịn ifịk n̄n̄wam mbon en̄wen ẹnam n̄kọri ke n̄kan̄ eke spirit. Usụn̄ kiet oro nnyịn ikemede ndinam emi edi ke nditọn̄ọ nnyụn̄ nnịm ukpepn̄kpọ Bible.
3 Nditọn̄ọ Ukpepn̄kpọ Bible: Usụn̄ kiet nditọn̄ọ ukpepn̄kpọ Bible edi ndinyene afan̄ magazine. Nte nnyịn ikade kpukpru ini ibịne mbon oro ẹdude ke mme afan̄ magazine nnyịn, nnyịn iyenen̄ede imehe ye mme mfịna mmọ. Nte ini akade, imekeme ndida ibuotikọ kiet ke magazine nte un̄wam ndida ntọn̄ọ ukpepn̄kpọ Bible ke ediye uduot ekpri n̄wed Oyom. Ke mme mfiakn̄ka en̄wen, nnyịn imekeme ndida ediye uduot ekpri n̄wed Oyom n̄ka iso ke nneme ke ini ifiakde ika ndinọ enyeneufọk magazine.
4 Oyom Akam ye Ukeme: Akam oro asan̄ade ọkpọsọn̄ ukeme oyofori utom ukwọrọikọ nnyịn. Eyenete an̄wan kiet emi edide asiakusụn̄ oro ekenyenede ukpepn̄kpọ Bible kiet ama ọbọn̄ akam eben̄e Jehovah ete an̄wam imọ inyene ediwak. Enye n̄ko ama anam n̄kpọ aban̄a akam esie. Enye ama odụn̄ọde utom ukwọrọikọ esie onyụn̄ okụt ke imọ ikenemeke iban̄a ukpepn̄kpọ Bible ke mme mfiakn̄ka imọ. Enye ama ọtọn̄ọ ndinam ntre ndien ikebịghike enye ama enyene ukpepn̄kpọ iba en̄wen.
5 Nso ifet ke nnyịn inyene ntem ndibuana ke ‘ndikwọrọ gospel mfọn Abasi’! (Utom 20:24) Esịtekọm oro inyenede iban̄a mbọm Abasi akpakam onụk nnyịn ndisịn ifịk ke ndin̄wam mbon en̄wen ẹbọ ufọn ẹto mfọnido Jehovah oro owo mîdotke.