Ndiyom Mbon Oro Ẹdotde
1 Item utom ukwọrọikọ emi Jesus ọkọnọde enịm nnyịn n̄kpọ-ata ke iso. Enye ọkọdọhọ ete: “Obio ekededi m̀mê obio-in̄wan̄ ekededi eke mbufo ẹdidụkde, ẹyom owo eke odotde ke esịt.” (Matt. 10:11) Ke emi mme owo ẹdiọn̄de-diọn̄ ẹbiat esisịt ini ke ufọk mi, didie ke nnyịn ikeme ndinam utom ediyom emi uforo uforo?
2 Dụn̄ọde Efakutom Fo: Tọn̄ọ ke ndidụn̄ọde efakutom fo. Ini ewe ke etie nte ke mme owo ẹsinen̄ede ẹdu ke ufọk? M̀mọ̀n̄ ke ẹkeme ndikụt mmọ ke uwemeyo? Nte odu akpan usen ke urua m̀mê akpan ini ke usen oro mmọ ẹsinen̄erede ẹdara isenowo? Ndinam ukpụhọde ke utom ukwọrọikọ fo man ekekem ye edinam ye mme idaha mme owo ke efakutom n̄kann̄kụk ekeme ndin̄wam fi ndinyene mfọnn̄kan utịp.—1 Cor. 9:23, 26.
3 Ediwak mme asuanetop ẹsikụt unen ke ntọn̄ọ ntọn̄ọ mbubịteyo. Ndusụk mme enyeneufọk ẹsinen̄ede ẹnyene ifet ẹnyụn̄ ẹnyene udọn̄ ndinọ n̄kpan̄utọn̄ ini oro. Ndinam utom ke efakutom mbubehe nnyụn̄ nnọ ikọ ntiense ke mme an̄wan̄wa ebiet n̄ko ẹdi mme usụn̄ ndida eti mbụk nsịm mme owo.
4 Ke ufan̄ ọfiọn̄ kiet oro ẹketịmde akpan edinam, esop kiet ama odiomi utom unọ ikọ ntiense ke utịt utịt uwemeyo ke kpukpru Saturday ye Sunday ye unọ ikọ ntiense mbubịteyo ke kpukpru Wednesday ye Friday. Mmọ n̄ko ẹma ẹnam ndutịm ndinam unọ ikọ ntiense ke urụk ukopikọ ẹnyụn̄ ẹdiomi ndinam utom ke efakutom mbubehe. Ndutịm emi ama enen̄ede edemede ifiopesịt ọnọ utom ukwọrọikọ tutu esop oro ebiere ndika iso ke mme edinam emi.
5 Sịn Ifịk ke Ndifiak N̄ka: Edieke edide ọkpọsọn̄ n̄kpọ ke efakutom mbufo ndisikụt mme owo ke ufọk ke ini afiakde aka, domo ndinịm akpan ini oro edifiakde aka ke okụrede mfiakn̄ka kiet kiet, idem ke ata akpa ediwaha. Ekem, kụt ete imafiak ika ke ini ekenịmde. (Matt. 5:37) Edieke odotde, ndien edieke enyeneufọk enyenede urụk ukopikọ, afo emekeme ndibọ nọmba urụk ukopikọ esie. Emi ekeme n̄ko ndin̄wam fi ndifiak nsobo owo oro.
6 Ke akpanikọ, Jehovah ọyọdiọn̄ ifịk ifịk ukeme oro nnyịn isịnde ndiyom mbon oro ẹdotde nnyụn̄ mfiak n̄ka mbịne udọn̄ oro nnyịn ikokụtde.—N̄ke 21:5.