Mbono District “Ẹsan̄a ye Abasi” eke Mme Ntiense Jehovah eke 2004
1 Nso isinam afo ada mme mbono district nnyịn eke isua ke isua ke ata akpan n̄kpọ? Ndi edi mme utịn̄ikọ oro ẹbọpde-bọp ye drama emi “asan̄autom emi anamde akpanikọ, onyụn̄ enyenede ọniọn̄” etịmde ọnọ nnyịn? (Matt. 24:45-47) Nte edi mbufa n̄wed oro ẹsịnede udia eke spirit oro ẹnọde ke ekemini? Ndi edi nditọete oro ẹbụkde mme ifiọkutom mmọ ke nte Bible okpụhọrede uwem mmọ? Nte edi mme ntọt ẹban̄ade nte utom ukwọrọikọ Obio Ubọn̄ akade iso ndikọri ke mme idụt efen? Nte edi edibuana ye ekemmọ mme andinịm ke akpanikọ emi ẹdude ke nsio nsio isua emana? Ke akpanikọ, mme n̄kpọ emi ye mme ntak efen ẹsinam nnyịn inen̄ede iben̄e idem ibet mme mbono nnyịn ye ọkpọsọn̄ udọn̄!
2 Dụk Usen Mbita: Ebede ke Moses, Jehovah ama owụk ete: “Bon kpukpru owo ọtọ kiet . . . man mmọ ẹkop, man mmọ ẹnyụn̄ ẹkpep.” (Deut. 31:12) Ebede ke otu asan̄autom emi anamde akpanikọ, onyụn̄ enyenede ọniọn̄, Jehovah omodiomi akpan ndutịm ubọ ukpep ọnọ nnyịn ke kpukpru usen mbono nnyịn. Sia enye ekpepde ‘nnyịn usụn̄ udori,’ nnyịn iyom ndidụk man ibọ kpukpru item esie. (Isa. 48:17) Edieke afo oyomde ndiben̄e eteutom fo ọnọ fi ini ndidụk mbono emi, tiene uko uko uwụtn̄kpọ Nehemiah, bọn̄ akam nọ Jehovah ndien nam eben̄e fo. (Neh. 1:11; 2:4) N̄ko, okpowụt ima nditọt mbonubon oro mînịmke ke akpanikọ mban̄a ndutịm mbono fo usọp usọp nte ekekeme.
3 Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nte enende ẹyọhọ babru Room Request kiet kiet oro ẹyakde ẹnọ. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mme owo emi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt aban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Tiene wet enyịn̄ nditọwọn̄ sịn. Edieke oyomde ufan̄ oro okponde akan se idude ke babru oro, da babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono. Ẹkpenyene ndibabak nnọ babru emi mbemiso mbono. MBỌK ẸKÛNỌ babru Room Request ẹsọk ọfis n̄kọk itieutom. Ẹkpenyene ndinọ enye aka nnennen adres mbono oro ẹwụtde ke edem babru oro.
4 Ke isua ke isua, nnyịn imesiben̄e nditọete ndidiana kiet ye Itieutom Unọ Ufọkidụn̄ mbono. Ke adan̄aemi ediwak owo ẹsitienede ndausụn̄ emi, nnyịn ke isụk ibọbọ ntọt iban̄a ndusụk owo oro mînamke emi. Nnyịn imesịn udọn̄ inọ kpukpru owo ndiwụt ima nnọ otu nditọete ebe ke ndidiana kiet ye ndutịm oro Itieutom Unọ Ufọkidụn̄ ẹnamde idem edieke owo mînọhọ fi ufọkidụn̄ oro afo amade. Mbọk fiak dụn̄ọde babru Itieutom Unọ Ufọkidụn̄ ke ini anamde ndutịm ufọkidụn̄ ke itie mbono ibọhọke afo edidu ye ufan m̀mê iman fo. Kpa ye oro, ọfọn ndifiọk m̀mê Itieutom Unọ Ufọkidụn̄ ama ananam ndutịm aban̄a ufọkidụn̄ oro. Mbọk kûfụmi Itieutom Unọ Ufọkidụn̄ ube uka ukọnọ ete enyene-ebiet m̀mê ufọkisen okụk oro awakde akan man enyene ufọkidụn̄ oro afo oyomde. Ebede ke ndidiana kiet ye Itieutom Unọ Ufọkidụn̄, nnyịn iyesụhọde ubiatokụk inọ nditọete nnyịn inyụn̄ iwụt ke nnyịn idi mbon oro idianade kiet inyụn̄ isụkde ibuot.—Phil. 2:1-4; 1 John 3:17; 1 Corinth 10:24.
5 San̄asan̄a Un̄wam: Ẹnam ndutịm emi ẹnọ sụk mbon oro ẹyomde san̄asan̄a un̄wam ẹto mbon en̄wen ke ndinam ndutịm mbono mmọ, akpan akpan ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Sụk mme asuanetop ye mme asiakusụn̄ emi ẹnịmde eti uwụtn̄kpọ, esịnede nditọ mmọ oro ẹdude eti uwem, emi ẹyomde san̄asan̄a un̄wam, oro Kọmiti Utom Esop onyụn̄ ọnọde unyịme, ẹdot ndibọ ufọn nto ndutịm San̄asan̄a Un̄wam emi. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi nnọ ndutịm mbono. Apostle Paul ama eti mme esop ke Galatia ete ‘ẹfọn ido ye kpukpru owo, akpan-akpan ye mmọ emi ẹtode ke ufọk mme andinịm ke akpanikọ.’ (Gal. 6:10) Ekeme ndidi nditọete iren ye iban oro ẹma ẹkesọn̄, mbon n̄kpọnnam, ete m̀mê eka emi ọbọkde nditọ ikpọn̄, m̀mê mbon oro ẹnamde utom uyọhọ ini ididọhọke fi an̄wam mmimọ, edi ekeme ndidi ọkpọsọn̄ n̄kpọ nnọ mmọ ndidụk mbono. Nte afo emekeme ‘ndifọn ido’ ye mmọ nnyụn̄ n̄n̄wam mmọ ke ndusụk usụn̄? Mme iman ẹdide mme Christian ye mbiowo ẹkpenyene nditịm mfiọk mme idaha utọ mbon oro.
6 Edieke asuanetop ayakde babru Special Needs Room Request ọnọ, Kọmiti Utom Esop oyodụn̄ọde babru emi. Mmọ ẹkpenyene ndikere m̀mê mmimọ imekeme ndise mban̄a san̄asan̄a udọn̄ emi ke idem mmimọ. Edieke Itieutom Unọ Ufọkidụn̄ enyenede mbụme ekededi aban̄a eben̄e san̄asan̄a un̄wam, mmọ ẹyebụp ewetn̄wed esop.
7 Nte ededi, Itieutom Unọ Ufọkidụn̄ oyodomo ndinọ mme asuanetop oro ẹyomde san̄asan̄a un̄wam ufọkidụn̄ oro odotde edieke mbon oro ẹdude ke esop mîkemeke ndin̄wam mmọ. Mme asuanetop emi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ẹse m̀mê esop eyekeme ndin̄wam mme owo emi ke ndise mban̄a edinọ mmọ itieidụn̄. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye ewetde mme ikọ emi “SAN̄ASAN̄A UN̄WAM,” in̄wan̄-in̄wan̄ ke enyọn̄ akpa page oro. Mbon oro ẹyomde san̄asan̄a un̄wam kpọt ke ẹkpenyene ndiwet n̄kpọ nyọhọ babru san̄asan̄a un̄wam emi nnọ. Owo oro esịnde eben̄e oro enyene ndiwet n̄kpọ nyọhọ enye. Ẹkpenyene ndifiak nyak babru emi nnọ ewetn̄wed, emi edisede m̀mê ẹwet n̄kpọ ẹyọhọ, m̀mê ẹwet n̄kpọ nte enende, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Ewetn̄wed ekpenyene ndinam mme idaha oro ẸN̄WAN̄A KE NDE KE NDE ke ufan̄ oro ẹnịmde ke edem babru oro. Ẹkpenyene ndibabak nnam emi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyenọ ntọt nnennen nnennen ẹsọk owo oro esịnde eben̄e emi oyom itieidụn̄.
8 Mbon oro ẹyomde san̄asan̄a un̄wam IKPENYENEKE ndika itie mbono n̄koyom ufọkidụn̄ ke ini mmọ ẹsịmde, koro ana Itieutom Unọ Ufọkidụn̄ enyene unyịme otode Kọmiti Utom Esop.
9 Ndidụk Mbono Efen: Idaha fo ekeme ndinam afo oyom ndidụk mbono efen utu ke ndidụk enye oro ẹkedemede esop mbufo ẹsịn. Edieke afo ediyomde ndiben̄e itieidụn̄, mbọk sobo ye ewetn̄wed esop mbufo nyụn̄ bọ babru Room Request. Nọ n̄wed eben̄e fo aka nnennen adres. Edieke ẹdinịmde mbono iba m̀mê akande oro ke obio oro, kụt ete ke omowụt usenọfiọn̄ mbono oro afo oyomde ndidụk ke n̄wed eben̄e fo.
10 Ke akamba mbono ikọt Jehovah oro ẹkenịmde ke se ikperede isua 2,500 emi ẹkebede, Ezra ye mme Levite eken ẹma ẹkot Ikọ Abasi ẹnyụn̄ ẹnam enye an̄wan̄a mbon oro ẹkesopde idem. Nso ikedi utịp? Nehemiah 8:12 asian nnyịn ete ke ‘kpukpru owo ẹma ẹnam akamba idara: koro mmọ ẹtịmde ẹfiọk ikọ emi ẹsiakde ẹnọ mmọ.’ Nte nnyịn ikopke inemesịt nte ke otu asan̄autom emi ẹyetde aran, ukem nte Ezra ye mme Levite, ada Ikọ Abasi anam n̄kpọ, anam enye an̄wan̄a, onyụn̄ owụt nnyịn nte ikemede ndida enye ndu uwem? Ke ndinam ntre, asan̄autom oro owụt ata ata ima ye edikere mban̄a oro Jehovah owụtde ọnọ kpukpru ikọt Esie. Biere ndidụk kpukpru usen mbono District “Ẹsan̄a ye Abasi”!
[Ekebe ke page 3]
Mme Ini Edinam
Friday
9:20 a.m. - 4:50 p.m.
Saturday
9:00 a.m. - 4:30 p.m.
Sunday
9:00 a.m. - 3:20 p.m.