Akakan Ufọn Ifiọk Abasi
1 Ndusụk owo ẹkere ke Mme Ntiense Jehovah ẹkpenen̄ede ẹsịn ukeme mmọ nnennen nnennen ke ndin̄wam n̄kọk mme mfịna oro ubonowo ẹsobode mfịn. Mme utọ owo oro ikwe akakan ufọn oro utom unọ ukpep Bible enyenede. Edi kpa nte apostle Paul ekewetde ete: “Edikwọrọ [“eto ndutụhọ,” NW] etie nte ndisịme ikọ ke enyịn mbon nsobo; edi ke enyịn nnyịn emi ẹnyan̄ade edi odudu Abasi.” (1 Cor. 1:18) Ke akpanikọ, nnyịn imọfiọk ite ke utom ukwọrọikọ Christian edi akakan utom oro ẹnamde mfịn ke ererimbot.
2 Uwem Oro Ọfọnde Akan Idahaemi: Mme ukeme oro mme owo ẹsịnde nditre mme mfịna ubonowo ẹnyene ata esisịt ufọn. Edibọp ibet ikpanke ubiatibet ndikọri. Mme ediomi emem ye udịmekọn̄ usịn emem itreke ekọn̄. Mme ndutịm n̄kaowo itreke ubuene. (Ps. 146:3, 4; Jer. 8:9) Ke edide isio, etop Obio Ubọn̄ omokpụhọde uwem ediwak miliọn owo ebe ke ndin̄wam mmọ ẹmen obufa owo emi enemde Abasi esịt, ẹsịne. (Rome 12:2; Col. 3:9, 10) Ke ndinam ntre, mmọ ẹdu uwem oro ọfọnde akan idem idahaemi.—1 Tim. 4:8.
3 Nyayama Ini Iso: Ke adianade ye edin̄wam nnyịn ikan mme mfịna uwem eke idahaemi, ifiọk Abasi an̄wam nnyịn ndinam nti ndutịm nnọ ini iso. (Ps. 119:105) Enye ọbiọn̄ọ nnyịn ndikụt edikpu otode edidomo ndikpụhọde editịm n̄kpọ emi. (Eccl. 1:15; Rome 8:20) Nnyịn iwụt esịtekọm didie ntem nte ke nnyịn itahakede uwem nnyịn ke ndibịne mme utịtmbuba oro mîwọrọke usụn̄! Utu ke oro, nnyịn isịn mme ukeme nnyịn ke ndinam n̄kpọ mban̄a un̄wọn̄ọ Jehovah oro mîditreke ndisu, emi aban̄ade “obufa enyọn̄ ye obufa isọn̄” emi edinen ido edidụn̄de. Ke ini usen ubiereikpe Jehovah edide edisịm, ayana in̄wan̄-in̄wan̄ nte ke mbon oro ẹkeberide edem ke ifiọk Abasi ẹma ẹnam nnennen ubiere.—2 Pet. 3:10-13; Ps. 37:34.
4 Okposụkedi ifiọk Abasi ekemede nditie nte inyeneke ufọn ke enyịn mbon oro ẹnyịnede ke “ifiọk eyo emi,” ke nditịm ntịn̄ enye edi mfọnn̄kan ifiọk ndida ndu uwem. (1 Cor. 1:21; 2:6-8) Ntem, nnyịn iyaka iso nditan̄a etop otode Abasi, kpa “Enye emi ikpọn̄-ikpọn̄ edide Abasi ọniọn̄” ke ofụri ererimbot.—Rome 16:27.