Ekebe Mbụme
◼ Didie ke nnyịn ikeme ndikpeme ini ke mme mbono esop?
Ini esisọsọp ebe ke ini nnyịn inemede inem inem nneme ye mme ufan nnyịn. Ke ntak emi, ekeme ndisọn̄ ndikụre mme ikpehe mbono esop ke ini oro ẹkenọde. Nso ikeme ndin̄wam?
Tọn̄ọ ke ini. Ke ini ofụri esop ẹsopde idem, ekeme ndifọn ndidọhọ otuowo ẹda itie mmọ ke n̄kpọ nte minit kiet m̀mê iba mbemiso ẹtọn̄ọde man mbono esop ekeme nditọn̄ọ ke nnennen ini oro ẹkenịmde ye ke ido nte eyede. (Eccl. 3:1) Owo ikpenyeneke ndibiat ini ke mme mboho oro ẹbuanade n̄kpri otu, utọ nte mme mbono an̄wautom, man ẹtie ẹbet mbon oro ẹdidide ke idiọk ini.
Tịm idem mfọn mfọn. Se ẹyomde man ẹkpeme ini edi mbemiso ntịmidem. Nen̄ede fiọk uduak utịn̄ikọ. Diọn̄ọ mme akpan n̄kpọ, nyụn̄ nam mmọ ẹwọrọ ẹda. Kûyak mme ntọt oro mîdịghe akpan n̄kpọ ẹwọn̄ọde fi ntịn̄enyịn. Nam utịn̄ikọ etie mmemmem mmemmem. Edieke utịn̄ikọ esịnede mme nnamn̄wụt m̀mê mme ndụn̄ọde, bem iso nam ndomonse. Adan̄a nte ekekeme, kpeme ini utịn̄ikọ fo ke adan̄aemi anamde ndomonse uyo ọwọrọ.
Bahade utịn̄ikọ fo. Edide se ẹnọde fi anam edi utịn̄ikọ m̀mê nneme otuowo, afo emekeme ndikụt nte ọfọnde ndibahade utịn̄ikọ fo ndọn̄ ke ikpehe ke ikpehe. Biere udomo ini oro afo oyomde ndibiat ke ikpehe kiet kiet, nyụn̄ wet emi ke mben n̄wed utịn̄ikọ fo. Ekem kpeme ini fo ke adan̄aemi ọnọde utịn̄ikọ. Ke nneme otuowo, fep ndikot ediwak owo ẹnọ ibọrọ ke ntọn̄ọ ntọn̄ọ tutu afo editịn̄ mme akpan n̄kpọ oro ẹdude ke ukperedem itọk itọk. Mme ada Ukpepn̄kpọ Enyọn̄-Ukpeme ẹkpenyene ndiyak ini odu ekem ndikere mban̄a ekebe ndụn̄ọde ke utịt ukpepn̄kpọ. Mmọ n̄ko ẹkpenyene ndikpeme mbak ẹdidia ini oro ẹnịmde ẹnọ ikwọ ye akam ediberi.
Beri ke ini. Edieke mbono esop enyenede ediwak ikpehe, utọ nte Esoputom, etịn̄ikọ kiet kiet ekpenyene ndifiọk ini emi ikpehe esie ọtọn̄ọde onyụn̄ etrede. Nso ke ẹkeme ndinam edieke ẹdiade ini ke mbono esop? Eyenete m̀mê nditọete eken oro ẹnyenede n̄kpọ ndinam ke ndutịm ẹkeme ndinam mbono esop okûbe ini ebe ke ndiwụk ntịn̄enyịn ke mme akpan n̄kpọ nnyụn̄ nsịbe ndusụk ntọt oro mîdịghe akpan n̄kpọ mfep. Ukeme ndinam emi edi usụn̄ kiet oro ẹdade ẹdiọn̄ọ andikpep oro enyenede usọ.
Nte otuowo, nnyịn imekeme ndin̄wam eyenete oro adade usụn̄ ke mbono esop ebe ke ndinam mme ibọrọ nnyịn ẹdi mbio mbio ẹnyụn̄ ẹnen. Ke ntre, kpukpru nnyịn imekeme nditịp nsịn ke mme mbono esop oro ẹnamde n̄kpọ “ke nde [ke nde] ye ke ido nte eyede.”—1 Cor. 14:40.