Ẹtịn̄ Enyịn Ẹkpeme nte Ẹdade Ini Mbufo Ẹnam N̄kpọ
1. Nso n̄kpọ-ata ke mme owo ke kpukpru ebiet ẹsobo mfịn?
1 Ke eyo emi ediwak n̄kpọ ẹdude ndisụhọde ọkpọsọn̄ utom ye ini emi ẹbiatde ke utom, etie ediwak owo ke idem nte ke mmimọ imenyene ekese n̄kpọ ndinam ye esisịt ini ndinam mmọ. Nte edi n̄kpọ-ata ọnọ fi ndika iso ke eti ndutịm eke spirit? Nte ọdọn̄ fi nte ekpenyenede ini efen efen ọnọ utom ukwọrọikọ? Didie ke nnyịn ikeme ndida ini nnyịn nnam n̄kpọ ke ata eti usụn̄?—Ps. 90:12; Phil. 1:9-11.
2, 3. Nso n̄kpọ-ata ke ifiọk usuanetop akama, ndien didie ke nnyịn owo kiet kiet ikeme ndidụn̄ọde idem nnyịn nse?
2 Diọn̄ọ Mme N̄kpọ Oro Ẹsibiatde Ini: Ke ini ke ini kpukpru nnyịn ikpenyene ndidụn̄ọde nse nte isidade ini nnyịn inam n̄kpọ. Bible eteme ete: “Ẹtịn̄ enyịn ẹkpeme nte ẹsan̄ade: ẹkûsan̄a nte ndisịme, edi ẹsan̄a nte mbon eti ibuot. Ẹdedep ifet, koro mme usen ẹdiọkde.” (Eph. 5:15, 16) Kere ban̄a mme n̄kpọ-ata oro n̄kọri ke ifiọk usuanetop akamade. Ke adan̄aemi kọmputa ye ekebe ukopikọ ye ekebe ndise ẹnyenede ufọn, mmọ ẹkeme ndikabade ndi afia edieke nnyịn ikpude nditịn̄ enyịn n̄kpeme nte idade ini nnyịn inam n̄kpọ.—1 Cor. 7:29, 31.
3 Nnyịn owo kiet kiet ikpenyene ndibụp idem nnyịn ite: ‘Nte ami mmesibiat ini kpukpru usen n̄kot nnyụn̄ mbọrọ mme etop oro ẹdade kọmputa ẹnọ emi mîsiwakke ndinyene ufọn? Nte ami mmesiwak ndikot owo ke urụk ukopikọ m̀mê ndida urụk ukopikọ nnọ mme etop oro mîdịghe akpan n̄kpọ? (1 Tim. 5:13) Ndi ami mmesidụn̄ọde Intanet m̀mê mmesito ikpehe usuanetop kiet n̄ka eken ye unana uduak ke adan̄aemi nsede ekebe ndise? Nte ini oro nyakde nsịn ke ndibre mme mbre kọmputa m̀mê mme mbre efen, utọ nte ludo ye mbre ikpa, ọtọn̄ọ ndidia ini oro n̄kpadade n̄kpep Ikọ Abasi? Nte nsibiat se ikperede ndidi kpukpru utịturua mi ke ndidụk mme usọrọ ndọ m̀mê mme usọrọ efen?’ Ndibịne mme utọ n̄kpọ emi ekeme ndibiat nsọn̄idem eke spirit nnyịn sụn̄sụn̄.—N̄ke 12:11.
4. Nso ukpụhọde ke uyen kiet akanam, ndien ntak-a?
4 Ndida Ini Nnam N̄kpọ ye Eti Ibuot: Kọmputa, ekebe ukopikọ, ekebe ndise, ye mme n̄kpọ unọ inemesịt eken ẹsiwak ndida ini ye ntịn̄enyịn nnyịn. Uyen kiet oro ekenen̄erede esịn idem ke mme mbre kọmputa ama enyịme ete: “Ndusụk ini oro n̄kesibrede mbre kọmputa mbemiso n̄kade ukwọrọikọ m̀mê mbono esop Christian, ekesidi ata ọkpọsọn̄ n̄kpọ ọnọ mi ndiwụk ntịn̄enyịn. N̄kesiwak ndikere nte ndisan̄ade mbre kiet ke otu mbre oro ọkọsọn̄de ke nnyọn̄de nsịm ufọk. Emi ama anam n̄kûnyene ini nnọ ọkpọkpọ ukpepn̄kpọ ye edikot Bible ofụri ini. Idatesịt oro n̄kesinyenede ke ndinam n̄kpọ Abasi ama ọtọn̄ọ ndisụhọde.” Sia ọkọfiọkde ke ama oyom imọ inam mme ukpụhọde, enye ama abiat kpukpru mbre kọmputa esie efep. Enye eti ete: “Oro ekedi ata ọkpọsọn̄ n̄kpọ ndinam. Mma nnen̄ede mma mme mbre emi n̄kan nte n̄kekerede. Edi mma nnen̄ede n̄kop uyụhọ ke ndibiat mmọ mfep, sia mma mfiọk ke n̄kanam oro ke ufọn idemmi.”—Matt. 5:29, 30.
5. Didie ke nnyịn ikeme ndidep ini nnọ mme n̄kpọ eke spirit, ndien didie ke nnyịn ikeme ndibọ ufọn nto ndinam ntre?
5 Ekeme ndiyom anam utọ usio-ukot oro edieke odude mme ikpehe oro anade afo anam mme ukpụhọde. Nte afo emekeme ndidep minit 30 kpukpru usen nto mme edinam oro mîdịghe akpan n̄kpọ? Oro ekpere ndidi udomo ini oro oyomde man okot ofụri Bible okụre ke isua kiet. Emi edinyene ufọn ke n̄kan̄ eke spirit didie ntem! (Ps. 19:7-11; 119:97-100) Nịm mme akpan ini nọ edikot Bible, editịm idem nnọ mbono esop, ye utom an̄wautom. (1 Cor. 15:58) Ndinam emi ayan̄wam fi ndikpeme mbiọn̄ọ mme n̄kpọ oro ẹsibiatde ini, oyonyụn̄ an̄wam fi ‘nditịm mfiọk se Ọbọn̄ amade.’—Eph. 5:17.