Bọ Ufọn to Edikpep N̄wed San̄a Kpere Jehovah
1 Ke Mbono District “Ifịk Ifịk Mme Anditan̄a Obio Ubọn̄,” nnyịn ima ikop inemesịt ndibọ n̄wed San̄a Kpere Jehovah. Ediwak owo ẹma ẹkot n̄wed emi ke ndondo oro. Eyịghe idụhe nte ke ibuotikọ isua 2003: “Ẹsan̄a ẹkpere Abasi, ndien enye ayasan̄a ekpere mbufo,” ama onụk ediwak mbon efen ndinam ntre.—Jas. 4:8.
2 Ke March nnyịn iyọtọn̄ọ ndikpep n̄wed San̄a Kpere Jehovah ke Ukpepn̄kpọ N̄wed Esop. Didie ke nnyịn ikeme ndinen̄ede mbọ ufọn nto ukpepn̄kpọ emi? Oyom ntịmidem. Ẹdida urua iba ikpep ibuot kiet kiet, ndien esisịt ibat ikpehe ekikere ke ẹdiomi ẹnọ ukpepn̄kpọ urua kiet kiet. Emi ayanam ekese ini odu afo ndinọ ibọrọ ofụri esịt oro ọkọn̄ọde ke se afo ekekpepde onyụn̄ etiede ekere ke ibuotikọ oro ẹnemede. Adianade do, ẹdikpep ata esisịt ibat ikpehe ekikere ke mme urua oro ẹkpepde akpatre ikpehe ke ibuot kiet kiet, man ẹnyene ini ndineme san̄asan̄a ikpehe n̄wed emi.
3 Ọtọn̄ọde ke ọyọhọ ibuot 2, ekebe oro ẹkotde “Mme Mbụme Nditie N̄kere” odu ekpere utịt ibuot kiet kiet. Ke ama ekeneme akpatre ikpehe ekikere ke ibuot kiet kiet, esenyịn ukpepn̄kpọ n̄wed ayanam otu emi ẹneme se idude ke ekebe oro. Enye eyesịn udọn̄ ọnọ otuowo ndibọrọ mbụme, oyomde ndikop nti ibọrọ otode se mmọ ẹketiede ẹkere ke mme itie N̄wed Abasi. (N̄ke 20:5) Ke adianade ye mme mbụme oro ẹnọde ke ekebe oro, ndusụk ini enye ekeme ndibụp mme utọ mbụme nte: “Nso ke ntọt emi asian fi aban̄a Jehovah? Didie ke enye otụk uwem fo? Didie ke afo ekeme ndida enye n̄n̄wam mbon efen?” Uduak esie edidi ndinam mme owo ẹnọ ibọrọ ofụri esịt, idịghe ndibụp mmọ mme mbụme oro mîdịghe akpan n̄kpọ.
4 N̄wed San̄a Kpere Jehovah edi n̄wọrọnda. Okposụkedi kpukpru n̄wed “asan̄autom emi anamde akpanikọ, onyụn̄ enyenede ọniọn̄” ẹnọde Jehovah ubọn̄, ofụri uduak n̄wed emi edi ndineme mban̄a mme edu Jehovah. (Matt. 24:45-47) Nso aduai-owo-idem ifet ana ebet nnyịn ntem! Nnyịn iyenen̄ede ibọ ufọn ito ntotụn̄ọ ukpepn̄kpọ aban̄ade edu Jehovah. Ukpepn̄kpọ emi akpakam an̄wam nnyịn ndinen̄ede nsan̄a n̄kpere Ete nnyịn eke heaven, ndien nnyịn ikpakam itetịm inyene uforo ke ndin̄wam mbon efen ẹnam ntre.