Nnyịn Imekeme Ndinam Se Jehovah Oyomde
1. Mme mfịghe ewe ke nnyịn isisobo ndusụk ini, ndien ntak-a?
1 Ndinam n̄kpọ ke n̄kemuyo ye ibet ye mme edumbet Jehovah edi mfọnn̄kan usụn̄ uwem mfịn, ndien enye an̄wam nnyịn ndisịn eti itiat idakisọn̄ nnọ nsinsi ini iso. (Ps. 19:7-11; 1 Tim. 6:19) Nte ededi, ererimbot Satan anam nnyịn isobo ekese mfịghe. Anana-mfọnmma ikpọkidem nnyịn anam mfịghe emi etetịm ọsọn̄ ubọk. Nte idomode ndise mban̄a mme mbiomo N̄wed Abasi, ndusụk ini ekeme nditie nte ke nnyịn idikemeke ndibiom mme mbiomo emi. (Ps. 40:12; 55:1-8) Nnyịn imekeme ndikam n̄kere m̀mê iyekeme ndinam kpukpru se Jehovah oyomde oto nnyịn. Ke mme utọ ini oro, nso ikeme ndin̄wam nnyịn ndika iso nda ukem ukem ke n̄kan̄ eke spirit?
2. Didie ke Jehovah owụt eti ibuot ke se enye oyomde oto nnyịn?
2 Mbet Jehovah Ibiakke Owo Idem: Akananam Jehovah iyomke mme n̄kpọ ito nnyịn nte mîwụtke eti ibuot. Mbet esie ibiakke owo idem edi edi ke ufọn nnyịn. (Deut. 10:12, 13; 1 John 5:3) Enye ọfiọk mmeme nnyịn nte owo, “emeti ete ke nnyịn idi ntan.” (Ps. 103:13, 14) Abasi ke mbọm esinyịme mfọnn̄kan ukeme oro nnyịn isịnde ndinam n̄kpọ esie, idem edieke mme idaha nnyịn mîyakke inam nte ikpanamde. (Lev. 5:7, 11; Mark 14:8) Enye ọdọhọ nnyịn itop mbiomo nnyịn inọ imọ onyụn̄ ọsọn̄ọ ọnọ nnyịn ete ke imọ iyanam nnyịn ikeme ndisọn̄ọ nda.—Ps. 55:22; 1 Cor. 10:13.
3. Didie ke Jehovah ọsọn̄ọ nnyịn idem ndime ime?
3 Ana Inyene Ime: Mbụk Bible aban̄ade mbon nsọn̄ọnda, utọ nte Elijah, Jeremiah, ye Paul owụt ke ana nnyịn inyene ime. (Heb. 10:36) Jehovah ama ọsọn̄ọ mmọ idem ke mme ini afanikọn̄ ye ubiọn̄ọ. (1 Ndi. 19:14-18; Jer. 20:7-11; 2 Cor. 1:8-11) Ndien nsọn̄ọnda nditọete nnyịn eke eyomfịn edemede nnyịn udọn̄. (1 Pet. 5:9) Nditie n̄kere mme utọ uwụtn̄kpọ oro ekeme ndin̄wam nnyịn nditre ndikpa mba.
4. Ntak edide akpan n̄kpọ ndika iso nnyene mme un̄wọn̄ọ Abasi ke ekikere?
4 Idotenyịn ke mme un̄wọn̄ọ Abasi edi “ukwak ubom ukpọn̄ nnyịn.” (Heb. 6:19) Idotenyịn emi okonụk Abraham ye Sarah ẹnyịme ndikpọn̄ obio mmọ nte Jehovah eketemede nnyụn̄ ‘n̄kabade odudụn̄ ke isọn̄ emi Abasi ọkọn̄wọn̄ọde.’ Kpa enye ọkọnọ Moses odudu ndisọn̄ọ nda uko uko nnọ utuakibuot akpanikọ. Enye n̄ko ọkọsọn̄ọ Jesus idem ndiyọ ke eto ndutụhọ. (Heb. 11:8-10, 13, 24-26; 12:2, 3) Ndinam mme un̄wọn̄ọ Abasi oro ẹban̄ade edinen obufa ererimbot ẹka iso ẹyama ke esịt nnyịn ayan̄wam nnyịn ndisọn̄ọ nda.—2 Pet. 3:11-13.
5. Ntak emi nnyịn ikemede ndibọ nsịnudọn̄ nto editi mme edinam nsọn̄ọnda nnyịn eke ini edem?
5 Nditi mme edinam nsọn̄ọnda, n̄waidem, ye uko nnyịn eke ini edem ekeme n̄ko ndinọ nnyịn odudu ke utom nnyịn. (Heb. 10:32-34) Emi eti nnyịn aban̄a idatesịt oro inyenede ke ini inọde Jehovah se enye oyomde oto nnyịn—utuakibuot ofụri ukpọn̄ nnyịn.—Matt. 22:37.