Leta Otode Otu Ukara

Ndima Nditọete:

“MFỌN ye emem akpakam oto ke ubọk Abasi Ete nnyịn, ye Ọbọn̄ Jesus Christ esịm mbufo.” (1 Cor. 1:3) Ọdọn̄ nnyịn didie ntem ndikụt ini emi kpukpru n̄kpọ eke ẹduọkde ibifịk ẹdinọde Jehovah ubọn̄ oro enye odotde ndibọ! (Ps. 150:6) Nte nnyịn itiede ibet akwa usen oro, nnyịn ke ika iso nditan̄a eti mbụk Obio Ubọn̄ Abasi inyụn̄ inam mme mbet.

Utom ukwọrọikọ edi utom Jehovah oro ẹnọde ntịn̄enyịn idahaemi ke isọn̄. (Mark 13:10) Sia nnyịn inen̄erede ifiọk udọn̄ oro Jehovah enyenede ke utom emi, nnyịn imọbọn̄ akam iyom un̄wam esie, ifiọkde ite ke kpukpru owo ẹnyene ifet ndibọ ufọn nto ndutịm ufak. (Edi. 14:6, 7, 14, 15) Edi akpanikọ, nnyịn imosobo mme n̄kpọ-ata, edi nnyịn iwụt esịtekọm didie ntem ‘ndisịne odudu emi otode ke enyọn̄’ man inam utom emi ima!—Luke 24:49.

Edi n̄kpọ oro ọnọde uyụhọ ndifiak nse isua utom emi ebede nnyụn̄ n̄kere mban̄a se Jehovah adade mme anam-akpanikọ asan̄autom esie anam. Sia edisana spirit ọnọde mmọ odudu, ikọt Abasi ẹwụt mbiet ima Christ, ẹkande usua ke ofụri ererimbot. Ẹma ẹkụt utọ ima oro ke ikpọ mbono nnyịn. Ọtọn̄ọde ke June esịm December 2003, mme andidụk mbono ẹtode ediwak idụt ẹma ẹdụk ikpọ mbono ofụri ererimbot 32 oro ẹkenịmde ke ikpọ ubak isọn̄ itiokiet. Ke mme mbono district ye ikpọ mbono ofụri ererimbot, ẹma ẹnam ndụn̄ọde ye mme isụn̄utom, mme asan̄autom ofụri ererimbot, ye mbon Bethel oro ẹdude ke utom esenidụt.

Nnyịn ima ibọ mme n̄wed ‘Kụt Eti Isọn̄’ ye Kpep N̄kpọ to Akwa Andikpep ke ikpọ mbono emi. Adianade do, ẹma ẹtọt ke ẹyefiak ẹsio n̄wed ukpepn̄kpọ Ufọkn̄wed Utom Usiakusụn̄ ke utịt utịt isua utom 2004. Mme asiakusụn̄ emi ẹma ẹkenam utom ke anyan ini, emi ẹma ẹkedodụk ufọkn̄wed emi ẹyetiene mbufa mme asiakusụn̄ ẹbọ ukpep ke adiana ke adiana.

Ibetedem otode Abasi ye ntatubọk mme owo ẹnam ẹkeme ndibọp mme Ufọkmbono Obio Ubọn̄ efen efen, akpan akpan ke mme idụt oro owo mînyeneke okụk. Sia udọn̄ kaban̄a udia eke spirit akade-ka iso ndikọri ke ofụri ererimbot, ke ẹtat mme n̄kọk itieutom ke ediwak idụt. Ediye uduot ekpri n̄wed oro Dara Uwem ke Isọn̄ ke Nsinsi! odu idahaemi ke usem 299, ndien ofụri ibat oro ẹmịn̄de edi miliọn 139; n̄wed Ifiọk Oro Adade Osịm Nsinsi Uwem ebe miliọn 93 ke usem 161; ediye uduot ekpri n̄wed oro Nso ke Abasi Oyom Oto Nnyịn? ebe miliọn 200 ke usem 267.

Nnyịn imọnọ owo 258,845 ufiop ufiop ekọm ke ndikayarade uyakidem mmọ nnọ ke mmọn̄ baptism ke isua utom emi ebede! Okposụkedi mbufo ẹdide akpan iso en̄wan Satan ke ntak ẹnọde Obio Ubọn̄ Abasi ibetedem, mbufo ndinam emi amanam mbufo n̄ko ẹdi san̄asan̄a mbon oro Jehovah ọdiọn̄de onyụn̄ ekpemede ke n̄kan̄ eke spirit nte mbufo ẹfehede mbuba eke anade mbufo ke iso. (Heb. 12:1, 2; Edi. 12:17) Ih, ẹnen̄ede ẹnịm ẹte ke ‘Andikpeme mbufo iyetke idap.’—Ps. 121:3.

Ibuotikọ isua 2004 emi, “Ẹkpeme . . . Ẹben̄e idem,” enen̄ede edi ke ekemini. (Matt. 24:42, 44) Ikọ Abasi okot mme Christian mbon isan̄ ke n̄kpakpa editịm n̄kpọ emi. (1 Pet. 2:11; 4:7) Ntem, ana nnyịn itịn̄ enyịn, inam uwem nnyịn emem, inyụn̄ itịm idụn̄ọde esịt nnyịn. “Akwa dragon” oyom ndita nnyịn, ndidụri nnyịn nsịn ke editịm n̄kpọ esie.—Edi. 12:9.

Edikot Bible eke usen ke usen edi akpan n̄kpọ ke ndidu ke ukpeme. Enye ekeme ndin̄wam inam ‘Ih nnyịn edi Ih’ man idu uwem ekekem ye uyakidem nnyịn inyụn̄ “[isọn̄ọ] imụm mbuọtidem eke ikenyenede ke editọn̄ọ tutu esịm akpatre” ikama. (Jas. 5:12; Heb. 3:14) Edikot Bible eke usen ke usen ekeme ndin̄wam nnyịn iti nte ererimbot ọwọn̄ọrede ọkpọn̄ mme idaha Abasi oro mîkpụhọkede. (Mal. 3:6; 2 Tim. 3:1, 13) Ifiọk Bible ekeme ndin̄wam nnyịn ndisọn “ikpîkpu mbụk” inyụn̄ inam akpanikọ inọ Jehovah.—2 Pet. 1:16; 3:11.

Mme ete ye eka, nte mbufo ẹkamade nditọ mbufo ke ntụnọ ye item Jehovah, nte mbufo ke ẹn̄wam mmọ ndinịm mme utịtmbuba eke spirit nnyụn̄ ‘ndu ke ukpeme’? (Eph. 6:4) Nte mbufo ke ẹkpep mmọ ndise ini iso mmọ kpa nte owo emi enyenede ọniọn̄ akan emi akanam odude ke isọn̄ ekesede ini iso esie? Jesus ekpekedi akakan anamusọ eto, andisio obufa n̄kpọ ndi, m̀mê abiausọbọ oro akanam odude uwem, edi utu ke oro enye ekebịne utom ukwọrọikọ uyọhọ ini. Uwụtn̄kpọ esie akpakam onụk mbufo ndin̄wam nditọ mbufo ẹnịm mme udọn̄ n̄kpọ Obio Ubọn̄ akpa ke uwem mmọ.

Otu asan̄autom emi anamde akpanikọ, emi Otu Ukara adade ke ibuot esie, enen̄ede owụt esịtekọm ọnọ “akwa otu owo” ke ndin̄wam nnyịn inam utom ‘edikwọrọ gospel Ubọn̄ Abasi emi ke ofụri ekondo nte ntiense.’ (Edi. 7:9; Matt. 24:14, 45) Mbufo ndima nditọete ẹmenyene nsọn̄ọ oro Jehovah ọnọde nte ke imọ imeti “utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.” (Heb. 6:10) Nte mbufo ẹkotde mme aduai-owo-idem ifiọkutom ke 2004 Yearbook of Jehovah’s Witnesses, ẹnyụn̄ ẹkụtde utịp emi otode mme ukeme oro kpukpru mbufo ẹkesịnde, ẹfiọk ẹte ke mbufo ẹmenyene akpan udeme ke ndinọ ikọ ntiense emi ke ofụri ererimbot.

Mbufo ẹkpekam ẹsak iso ẹse ini iso ye uko ke adan̄aemi mbufo ẹkade iso ‘ndiwụk enyịn nse utịp eke ẹdinọde mbufo,’ ẹtrede ndiyak owo ndomokiet m̀mê demon ọbiọn̄ọ mbufo ndibọ utịp emi. (Heb. 11:26; Col. 2:18) Ih, ẹberi edem ke Jehovah ẹnyụn̄ ẹnyene mbuọtidem nte ke enye ayan̄wam kpukpru mbon oro ẹmade enye, ẹnyene nsinsi uwem.—John 6:48-54.

Nnyịn imadat esịt ndinam utom ye mbufo man ubọn̄ ye itoro ẹnyene Jehovah.

Nditọete mbufo,

Otu Ukara eke Mme Ntiense Jehovah