Ẹkpebe Edu Jesus
1. Nso edu ke Jesus okowụt?
1 Okposụkedi akanam nnyịn mîkwe Eyen Abasi, ebede ke n̄wetnnịm n̄kpọ aban̄ade uwem ye ukwọrọikọ Jesus, nnyịn imedi idinen̄ede ima enye. (1 Pet. 1:8) Ke ndisụk ibuot nnọ uduak Ete esie, enye ama ọkpọn̄ n̄kokon̄ itie esie ke heaven edi isọn̄. Nte owo, enye ke unana ibụk ama anam n̄kpọ ọnọ mbon efen onyụn̄ ọnọ uwem esie ndifak ubonowo. (Matt. 20:28) Ikọ Abasi esịn udọn̄ ọnọ nnyịn ete: “Yak mbufo ẹnyene orụk esịt [edu] emi okodude ke Christ Jesus.” Didie ke nnyịn ikeme ndikpebe edu n̄waidem esie?—Phil. 2:5-8.
2. N̄kpọ-ata ewe ke ediwak Christian ẹsobo, ndien nso ikeme ndin̄wam mmọ ndikan emi?
2 Ke Ini Ikpade Mba: Kpa ye oro Jesus ekedide mfọnmma, enye ama esikpa mba. Ini kiet, enye ama ọnọ n̄wan Samaria ọyọhọ ikọ ntiense okposụkedi enye ‘okokopde mba ọnọ isan̄.’ (John 4:6) Ediwak Christian mfịn ẹsobo ukem n̄kpọ-ata oro. Ke ama akakpa mba ke ntak utom oro akanamde ke ofụri urua, ekeme ndisọn̄ ndinyene odudu ndibuana ke utom ukwọrọikọ. Nte ededi, edieke nnyịn ibuanade ke utom ukwọrọikọ Christian kpukpru ini, nnyịn iyokụt ke enye esifiak ọnọ owo odudu ke n̄kan̄ eke spirit.—John 4:32-34.
3. Didie ke nnyịn ikeme ndikpebe Jesus ke ndinyịme ndikpep mme owo n̄kpọ?
3 Ke ini efen, Jesus ye mme mbet esie ẹma ẹka desert ndiduọk odudu esisịt. Edi otuowo ẹma ẹdiọn̄ọ ẹnyụn̄ ẹfehe ẹbem mmọ iso ẹka ndisobo ye mmọ. Utu ke ndiyat esịt mban̄a emi, Jesus ama “atua mmọ mbọm” onyụn̄ ‘ekpep mmọ ediwak n̄kpọ.’ (Mark 6:30-34) Oyom inyene ukem edu oro man ikeme nditọn̄ọ nnyụn̄ n̄ka iso nnịm mme ukpepn̄kpọ Bible. Oyom ika iso isịn ukeme inyụn̄ inyene ata ima inọ mme owo. Edieke afo mûnyeneke ukpepn̄kpọ Bible idahaemi, kûkpa mba ke ndiyom ndinyene.
4. Didie ke usiakusụn̄ unọ un̄wam ekeme ndin̄wam nnyịn ndikpebe edu Christ?
4 Nịm Mme Udọn̄ N̄kpọ eke Spirit Akpa: Ndinam usiakusụn̄ unọ un̄wam ekeme ndin̄wam nnyịn nditịm n̄wụk ntịn̄enyịn ke mme edinam eke spirit. Ekpri eyenete an̄wan kiet ekewet ete: “Eka ufan mi kiet ama esịn udọn̄ ọnọ mi ye ufan mi nditiene imọ nnam usiakusụn̄ unọ un̄wam ke ọfiọn̄ kiet. Mmenen̄ede ndat esịt ke nnyịn ndikanam oro. Mma ndara nditịm mmehe ye nditọete mi, ndien ikebịghike mmọ ẹketie nte ubon ẹnọ mi. Mma nnyene akamba ifet n̄ko nditịn̄ ikọ nnọ mbon efen mban̄a Jehovah nnyụn̄ n̄kpep mmọ utịbe utịbe akpanikọ Obio Ubọn̄. Kpukpru emi ẹmenam mi ntetịm nsan̄a n̄kpere Jehovah ye esop esie.”—Ps. 34:8.
5. Ntak anade nnyịn ika iso isịn ukeme ndikpebe edu Jesus?
5 Kpukpru nnyịn imosobo en̄wan ke ufọt anana-mfọnmma ikpọkidem ye udọn̄ nnyịn ndinem Jehovah esịt. (Rome 7:21-23) Ana nnyịn ibiọn̄ọ edu ererimbot emi edide edibọbọk idem n̄kama. (Matt. 16:22, 23) Jehovah ekeme ndida edisana spirit esie n̄n̄wam nnyịn ndikan ke en̄wan emi. (Gal. 5:16, 17) Nte itiede ibet edinyan̄a nnyịn man ibe idụk edinen obufa ererimbot Abasi, nnyịn ikpakam ikpebe edu Jesus ebe ke ndinịm mme udọn̄ n̄kpọ Obio Ubọn̄ akpa nnyụn̄ mbem iso nyom ufọn mbon efen.—Matt. 6:33; Rome 15:1-3.