Ndinem Ikwọ
1 Ikwọ edi akpan ikpehe ke utuakibuot akpanikọ. Ke Israel eset, Asaph ye nditọete esie ẹma ẹkwọ ẹte: “Mbufo ẹkọm Jehovah . . . Ẹkwọ ẹnọ enye; ẹkwọ ikwọ ẹnọ enye; ẹkere kpukpru mme utịbe n̄kpọ esie.” (1 Chron. 16:8, 9) Mfịn nnyịn imesikwọ ikwọ inọ Jehovah ke mme mbono esop nnyịn eke urua ke urua. (Eph. 5:19) Nso utịbe utịbe ifet nditoro enyịn̄ esie ke emi edi ntem!—Ps. 69:30.
2 Ndikpan̄ utọn̄ nnọ Kingdom Melodies, kpa ikwọ Obio Ubọn̄ oro ẹdade n̄kukwak ẹbre, ekeme ndinam esịt nnyịn ekere n̄kpọ eke spirit. Eyenete an̄wan kiet ọkọdọhọ ete: “Nte ndinem ikwọ oro ẹbrede, mmesitọn̄ọ nditi mme ikọ ikwọ oro ke esịt mi. Nso eti usụn̄ ndinyene Jehovah ke ekikere ke adan̄aemi n̄kopde ikwọ ke emi edi ntem!”—Phil. 4:8.
3 Mme Ini Ndibre Mmọ: Ndibre Kingdom Melodies ke ufọk esinam ẹnyene ufiop ufiop idaha eke spirit emi an̄wamde ẹnyene emem ke ubon. Ubon kiet ekewet ete, “Nnyịn imesibre [ikwọ] emi ke ufọk ye ke ubomisọn̄ nnyịn, ndien akanam nnyịn ikpaha mba ke nte ẹbrede enye. Ediwak ini Kingdom Melodies esinam ekikere owo ana sụn̄ ke ini itịmde idem inọ mme mbono esop Christian m̀mê ke ini ikade mbono.” Eyenete an̄wan kiet ọkọdọhọ ete: “Ndikpan̄ utọn̄ n̄kop mmọ ke adan̄aemi nnamde utom ke ufọk esinam nnen̄ede n̄kop inemesịt—anie ekpekere ke mmekeme ndikop inemesịt ke adan̄aemi n̄kpan̄de ọfọn̄? Mmodiomi ndibre mme ikwọ emi ke ini n̄kopde mfụhọ. Ikwọ emi enen̄ede enyene odudu ndidemede owo udọn̄! . . . Kpukpru ikwọ emi ẹsinem owo esịt.” Nte odu mme idaha oro mme utọ ndinem ikwọ emi ẹkemede ndinọ fi ufọn?
4 Ediwak ikwọ mfịn ẹnyene edu ererimbot. Mme ete ye eka ẹkeme ndin̄wam nditọ mmọ ndinyene udọn̄ ke nti ikwọ ebe ke ndibre Kingdom Melodies ediwak ini. Eyenem ediwak nditọ ukpepn̄kpọ Bible ye mbon efen oro ẹnyenede udọn̄ ndifiọk n̄ko mban̄a ndinem ikwọ eke spirit emi, oro ẹnọde Jehovah ubọn̄ ẹnyụn̄ ẹdemerede spirit.—Ps. 47:1, 2, 6, 7.