Ẹnọ Utịp ke Ndime Ime
1 “Ẹdida edime ime ke ukụt ẹbọ ukpọn̄ mbufo ẹda ẹnyene.” (Luke 21:19) Mme ikọ emi, oro ẹdide ubak ntịn̄nnịm ikọ Jesus kaban̄a “akpatre ini eyo emi,” ẹnam an̄wan̄a nte ke man imụm nsọn̄ọnda ikama, ana iben̄e idem ndisobo ekese idomo. Edi ke odudu Jehovah, “ẹyenyan̄a” nnyịn owo kiet kiet edieke ‘imede ime tutu esịm akpatre.’—Matt. 24:3, 13; Phil. 4:13.
2 Ukọbọ, udọn̄ọ, unana okụk, ye editịmede esịt ẹkeme ndinam usen kiet kiet etie idomo idomo. Nte ededi, nnyịn ikpedehede ifre nte ke Satan ke odomo ndibiat mbuọtidem nnyịn ke Jehovah. Usen kiet kiet oro imụmde nsọn̄ọnda ye Ete nnyịn ikama, nnyịn imọnọ ibọrọ ke ata emi Osụn̄i Isụn̄i oro akamiade. Ọfọn didie ntem ndifiọk nte ke owo ifreke “mmọn̄eyet” nnyịn ke ini iyọde idomo! Mmọ ẹsọn̄ urua ke enyịn Jehovah, ndien nsọn̄ọnda nnyịn enem enye esịt!—Ps. 56:8; N̄ke 27:11.
3 Idomo Anam Nnyịn Ifọn Ima: Ukụt ekeme ndisio ebiet oro imemde ke mbuọtidem m̀mê ndo ke edu nnyịn owụt, utọ nte ntan̄idem m̀mê unana ime. Utu ke ndiyom mme usụn̄ oro mîkemke ye N̄wed Abasi ndida mbọhọ m̀mê nditre idomo, nnyịn ikpenyene ndinam item N̄wed Abasi oro ọdọhọde ‘iyak ime anam utom esie ama.’ Ntak-a? Koro ndisọn̄ọ nda nyọ idomo anam nnyịn ‘ifọn ima inyụn̄ isọn̄ ke ukpọn̄.’ (Jas. 1:2-4) Edime ime ekeme ndin̄wam nnyịn inyene mme ọsọn̄urua edu, utọ nte eti ibuot, mbọm, ye edikere mban̄a.—Rome 12:15.
4 Mbuọtidem Emi Ẹma Ẹkedomo Ẹwụt: Ke ini iyọde idomo, nnyịn iyenyene mbuọtidem emi ẹma ẹkedomo ẹwụt emi edide ọsọn̄urua n̄kpọ ke enyịn Abasi. (1 Pet. 1:6, 7) Utọ mbuọtidem oro etịm nnyịn idem ndisọn̄ọ nda nyọ mme idomo oro ẹdide ke iso. Akan oro, nnyịn imekeme ndinyene unyịme Abasi, ndien emi ọyọsọn̄ọ idotenyịn nnyịn, anamde idotenyịn oro etetịm edi ata idem n̄kpọ ọnọ nnyịn.—Rome 5:3-5.
5 Ẹtịn̄ mfọnn̄kan utịp edime ime ke James 1:12, emi ọdọhọde ete: “Ọfọfọn ye owo eke ọsọn̄ọde ada ke idomo, koro ke ẹma ẹkedomo enye ẹfiọk ẹte ọfọn, [ẹyenọ] enye anyanya uwem.” Ntem, ẹyak nnyịn isọn̄ọ ida ke utuakibuot nnyịn nnọ Jehovah, inyenede mbuọtidem nte ke enye ọyọnọ “mmọ emi ẹmade Enye” utịp.