Ufọkn̄wed Unọ Mme Asan̄autom Ukpep—Akamba Usụn̄ Oro Adade Esịm Utom
1 Ebede ke prọfet Jeremiah, Jehovah ama ebem iso etịn̄ ete: “Nyodori mme ọbọk eke ẹdibọkde [ikọt mi], ndien mmọ idifeheke aba ndịk, idem idinyụn̄ ikpaha aba mmọ, mmọ idinyụn̄ isopke.” (Jer. 23:4) Ke ẹnam utọ utom ubọkerọn̄ oro mfịn ke otu mme owo oro ẹtode kpukpru idụt. Ata ediwak tọsịn mbiowo esop ke ẹnam emi. Ke adianade do, mme uyen oro ẹwakde nte mbara ẹmenọ idemmọ unyịme unyịme ndinam n̄kpọ Jehovah. (Ps. 110:3) Nso edidiọn̄ ke mme osụhọde-idem nditọete emi ẹdi ntem ẹnọ mme esop ikọt Abasi! Nte utom editan̄ mbok eke spirit emi akade iso, osụk oyoyom iren oro ẹdotde ẹnọ idemmọ ndinam n̄kpọ nnọ nditọete mmọ.
2 Eti ndutịm ndinọ mbiowo ye mme asan̄autom unamutom emi mîdọhọ ndọ ukpep man ekeme ndibiom mbiomo efen efen edi Ufọkn̄wed Unọ Mme Asan̄autom Ukpep. Se iwakde ibe nditọ ufọkn̄wed 22,000 emi ẹtode idụt 140 ẹmebọ ukpep ke otu 999 emi ẹnịmde tọn̄ọ nte ẹketọn̄ọ ufọkn̄wed emi ke 1987. Ufọkn̄wed emi ‘eberede akamba usụn̄ ọnọ’ nditọete iren emi “ndinam akwa utom.”—1 Cor. 16:9.
3 Uduak Ufọkn̄wed Oro: Uduak Ufọkn̄wed Unọ Mme Asan̄autom Ukpep edi ndinọ iren oro ẹdotde ukpep man ẹtịm iren oro ẹdotde idem ndibiom mbiomo ke ebiet ekededi emi ẹyomde ke esop. Ufọkn̄wed oro esifori ukeme mmọ ndida usụn̄ ke utom ukwọrọikọ, ndibuana ke ndibọk mme erọn̄, ndinyụn̄ nnọ ukpep ke esop. Ke ẹkụrede ukpep, ẹsinọ ndusụk nditọ ufọkn̄wed ẹkenam utom nte mme akpan asiakusụn̄ m̀mê mme esenyịn oro ẹsan̄ade-san̄a ke idụt mmọ m̀mê ke esenidụt. Ẹsinọ mbon eken ẹkenam utom ke esop oro mmọ ẹketode ẹdi m̀mê ke mme ebiet emi udọn̄ okponde ke efakutom n̄kọk itieutom.
4 Ke ukpep urua itiaita oro, nditọ ufọkn̄wed ẹsinen̄ede ẹda ini ẹkpep Bible. Mmọ ẹsinen̄ede ẹkere ẹban̄a ekese ukpepn̄kpọ Bible ye mbiomo ubọkerọn̄ ye mme ndausụn̄ oro ẹnọde ke ndise mban̄a mme mfịna uwem Christian. Mmọ ẹsikpep n̄ko se N̄wed Abasi etịn̄de aban̄a mme edinam, ikpe, ye ndutịm esop. Mmọ ẹsibọ san̄asan̄a ukpep ke nte ẹnọde utịn̄ikọ, ẹsinyụn̄ ẹnọ mmọ ọkpọkpọ un̄wam man ẹkeme ndinam usọp usọp n̄kọri eke spirit.
5 Se Ẹyomde: Nte an̄wan̄ade, se ẹyomde man owo ekeme ndidụk ufọkn̄wed emi okpon. Mme andiyom ndidụk ẹnyene ndidi mbiowo m̀mê mme asan̄autom unamutom ke nsụhọde n̄kaha isua iba. Ana kpukpru mmọ ẹdi mbon oro mîdọhọ ndọ ẹnyụn̄ ẹnyene ndidu ke ufọt isua 23 ye 50. Ana mbon oro ẹsịnde n̄wed ẹyom ndidụk ufọkn̄wed emi ẹkeme ndikot n̄wed, n̄wet n̄kpọ, nnyụn̄ ntịn̄ ikọ udọn udọn ke usem oro ẹdade ẹnịm ufọkn̄wed emi, ana mmọ ẹnyụn̄ ẹkop nsọn̄idem, iyomke san̄asan̄a ntịn̄enyịn m̀mê udia. Ẹsisọp ndikot mbon oro ẹnamde utom usiakusụn̄ ofụri ini.
6 Ana mbon oro ẹnọde idemmọ ẹnyịme ẹnyụn̄ ẹkeme ndinam utom ke ebiet ekededi oro ẹyomde mmọ. Emi oyom edu oro ebietde eke prọfet Isaiah, oro ọkọnọde idemesie unyịme unyịme ndinam san̄asan̄a utom, ọdọhọde: “Se mi, dọn̄ mi utom.” (Isa. 6:8) Enye n̄ko ama owụt nsụhọdeidem ke ofụri eyouwem esie. Ima oro ẹnyenede ẹnọ nditọete mmọ ye udọn̄ ndinam n̄kpọ nnọ mmọ ẹkpenyene ndinụk mbon oro ẹnọde idemmọ ndidụk Ufọkn̄wed Unọ Mme Asan̄autom Ukpep, utu ke udọn̄ ndiyom uwọrọiso m̀mê akwa itie. Ke ẹma ẹkebọ utọ eti ukpep oro, ẹdori enyịn ndikụt nte mbon oro ẹkebọde ukpep ẹdade se mmọ ẹkekpepde ẹsịn ke edinam ke ufọn mbon efen.—Luke 12:48.
7 Mme Ufọn: Ke urua itiaita oro ẹbọde ukpep, ẹsida “ikọ mbuọtidem ye eti ukpep-n̄kpọ” ẹbọk mme andikụre ukpep oro. (1 Tim. 4:6) Emi esitịm mmọ idem ndin̄wam nnyụn̄ nsịn udọn̄ nnọ mbon efen ke esop ye ke circuit oro ẹnọde mmọ ẹka. Ke ediwak ebiet oro ẹnọde mme andikụre Ufọkn̄wed Unọ Mme Asan̄autom Ukpep ẹka, ẹmenam n̄kọri ke utom an̄wautom; ẹmesịn udọn̄ ẹnọ utom usiakusụn̄, akpan akpan ke otu n̄kparawa owo; ndien ẹmenọ ediwak mbufa owo emi ẹbuanade ye ikọt Abasi ọkpọkpọ ntịn̄enyịn.
8 Nte afo edi ebiowo m̀mê asan̄autom unamutom oro mîdọhọ ndọ, onyụn̄ odu ke ufọt isua 23 ye 50? Ntak mûkereke uban̄a edisịn n̄wed eben̄e kaban̄a Ufọkn̄wed Unọ Mme Asan̄autom Ukpep? Nte afo edi ekpri eyenete oro oyomde ndinịm mme utịtmbuba ini iso ke utom Jehovah? Ntak mûnamke uwem fo emem ọbọhọ mme n̄kpọ oro ẹwọn̄ọrede owo ntịn̄enyịn man afo ekeme ndibe ndụk ‘akamba usụn̄ oro adade esịm utom’? Enye ekeme ndinọ fi ekese idatesịt ye uyụhọ. Ke akpanikọ, Ufọkn̄wed Unọ Mme Asan̄autom Ukpep idịghe edidiọn̄ inọ mme andikụre ukpep ke ufọkn̄wed oro kpọt, edi edi edidiọn̄ n̄ko ọnọ mme esop ikọt Abasi ke ofụri ererimbot.
[Ekebe ke page 3]
Nte Mmọ Ẹkebọde Ufọn Ẹto Ukpep Oro
“Ukpep oro emenen̄ede ofori utom an̄wautom mi onyụn̄ ofori ukeme mi ndida N̄wed Abasi mbọk otuerọn̄ ke ọniọn̄.”
“Ufọkn̄wed oro amanam mi nnen̄ede nnyene uko ke ndise mban̄a nsio nsio utom oro nnyenede ke esop.”
“Enye omokpụhọde se ikperede ndidi kpukpru ikpehe uwem mi, esịnede usụn̄ oro ndade ukara ye esop Abasi.”
“Ukpep oro n̄kọbọde ama an̄wam mi ndidiọn̄ọ ufọn edinọ idemmi man nnam utom ke ebiet emi udọn̄ okponde.”