San̄asan̄a Ubịnikọt Ndisuan Obufa Ediye Uduot Ekpri N̄wed
1 Ediwak owo mfịn ẹtịmede esịt ẹban̄a mme idaha ererimbot, edi ibat ibat owo ẹfiọk ntak oro mme n̄kpọ ẹtiede ntem, se inade ke iso, ye se anade mmọ ẹnam man ẹbọhọ ubiereikpe emi edide. (Ezek. 9:4) Man ẹn̄wam mmọ ẹfiọk se mme ini nnyịn ẹwọrọde, ẹtịm san̄asan̄a ubịnikọt ndisuan obufa ediye uduot ekpri n̄wed Ẹdu ke Ukpeme! ọtọn̄ọde ke Monday, March 21, esịm Sunday, April 17.
2 Imekeme ndinọ ediye uduot ekpri n̄wed emi ke ini inamde utom eke ufọk ke ufọk, ke ini inamde mme mfiakn̄ka, ke ini inọde ikọ ntiense ido nneme, m̀mê ke ini inọde ikọ ntiense ke efak. Nte ededi, owo ikpasuanke Ẹdu ke Ukpeme! ntịme ntịme. Utu ke oro, mbon oro ẹnyenede udọn̄ ke se Bible etịn̄de aban̄a se mme n̄kpọntịbe ererimbot ẹwọrọde kpọt ke ẹdinọ ediye uduot ekpri n̄wed oro. Ẹkeme ndinọ mbon oro ẹnyenede esisịt udọn̄ ke etop emi tract kiet.
3 Afo emekeme ndidemede owo udọn̄ ke ndidọhọ:
◼ “Ediwak owo ẹtịmede esịt ẹban̄a ikpọ mfịna ye mme enyene-ndịk n̄kpọntịbe oro ẹdide ọsọ n̄kpọ mfịn. [Siak n̄kpọntịbe kiet oro ẹdiọn̄ọde ke n̄kann̄kụk.] Ndi afo ama ọfiọk ke ẹma ẹbem iso ẹtịn̄ n̄kpọ ntre ke Bible? [Bet ibọrọ. Ekem kot itie N̄wed Abasi oro ekemde ye n̄kpọntịbe oro akasiakde utọ nte Matthew 24:3, 7, 8; Luke 21:7, 10, 11; m̀mê 2 Timothy 3:1-5.] Bible owụt se mme n̄kpọntịbe eyo nnyịn ẹwọrọde ye se inade ke iso ibet ubonowo. Ndi ayama ndifiọk n̄kpọ efen efen mban̄a emi? [Bet ibọrọ. Nọ ediye uduot ekpri n̄wed emi edieke ẹwụtde ata udọn̄.] Owo inyamke-nyam ediye uduot ekpri n̄wed emi. Edieke oyomde ndinọ etịbe imaesịt kaban̄a utom nnyịn oro ẹnamde ke ofụri ererimbot, iyama ndibọ.”
4 Mîdịghe afo emekeme ndikụt nte usụn̄ utọn̄ọ nneme enye emi enyenede uforo:
◼ “Ediwak owo mfịn ẹkop mfụhọ ke ntak mme ẹnyene-ndịk n̄kpọntịbe mîdịghe ke ntak akwa n̄kpọ oro mmọ ẹtabade. Ndusụk owo ẹsikere m̀mê nsinam Abasi mîkpanke mme utọ n̄kpọ oro. Bible ọsọn̄ọ ọnọ nnyịn ke Abasi ọyọsọp ndinam n̄kpọ man osio ndutụhọ oro ubonowo ẹsobode efep. Kam se mme edidiọn̄ oro Abasi edidade isọk ubonowo. [Kot Psalm 37:10, 11.] Ndi ayama ndifiọk n̄kpọ efen efen?” Beri nte ẹwụtde ke enyọn̄ emi.
5 Domo ndibọ enyịn̄ ye adres owo kiet kiet oro ọbọde ediye uduot ekpri n̄wed emi, nyụn̄ diomi ndifiak n̄ka man akanam udọn̄ oro okokụtde ọkọri. Nsiondi Utom Obio Ubọn̄ Nnyịn eke April 2005 ọyọnọ mme ekikere ke nte ẹkpenamde emi. Edieke owo enen̄ede owụt udọn̄ ke akpa ediwaha, afo emekeme ndikama ediye uduot ekpri n̄wed Ẹdu ke Ukpeme! mîdịghe n̄wed en̄wen, utọ nte ediye uduot ekpri n̄wed Oyom ntọn̄ọ ukpepn̄kpọ Bible ke ebe oro.
6 Ẹyedeme obufa ediye uduot ekpri n̄wed emi ke Esoputom oro ẹnemede ibuotikọ emi ama akasuana. Ẹnọ ekikere ẹte mme asuanetop ye mme asiakusụn̄ ofụri ini ẹbọ sụk se mmọ ẹdidade ẹnam utom ke akpa usen ifan̄ eke ubịnikọt emi. Jehovah akpakam ọdiọn̄ san̄asan̄a utom emi ẹnamde mi man ẹtoro enye ẹnyụn̄ ẹda ufọn ẹsọk mbon esịt akpanikọ ke kpukpru ebiet.—Ps. 90:17.