Ẹnyene Nte Ini Edide Usọp Usọp ke Ekikere!
1 Jesus ama ọfiọk ke imọ ikenyene esisịt ini ndida n̄kụre utom oro Ete imọ ọkọdọn̄de imọ ke isọn̄. (John 9:4) Ntem, enye ama enyene nte ini edide usọp usọp ke ekikere ke ini enye akanamde utom ukwọrọikọ esie, onyụn̄ ekpepde mme mbet esie ndinam kpasụk ntre. (Luke 4:42-44; 8:1; 10:2-4) Enye ikadaha udia uwem nte akakan n̄kpọ. (Matt. 8:20) Ntre, enye ama ekeme ndikụre utom oro Jehovah ọkọnọde enye.—John 17:4.
2 Esisịt Ini: Esisịt ini n̄ko odu ndida n̄kwọrọ gospel “ke ofụri ekondo.” (Matt. 24:14) Ntịn̄nnịm ikọ Bible owụt ke nnyịn idu uwem ke ata ukperedem ini. Ibịghike “mmọ emi mîfiọkke Abasi, mînyụn̄ isụkke ibuot inọ gospel Ọbọn̄ nnyịn Jesus . . . [ẹyebọ] ufen nsinsi nsobo.” (2 Thess. 1:6-9) Ubiereikpe oro edidi ke mbuari. (Luke 21:34, 35; 1 Thess. 5:2, 3) Oyom mme owo ẹfiọk ke uwem mmimọ odu ke itiendịk. Edi mbiomo nnyịn ndin̄wam mmọ ẹyom mfọn Jehovah ke adan̄aemi ini osụk odude.—Zeph. 2:2, 3.
3 Ndinam Ofụri Ukeme Nnyịn: Mme asan̄autom Jehovah ẹda utom ukwọrọikọ nte ata akpan n̄kpọ sia ẹfiọkde ke “ẹsịbe ini omụhọ.” (1 Cor. 7:29-31; Matt. 6:33) Ndusụk mmọ ẹtre ndibịne inyene obụkidem m̀mê mme mbubehe idemmọ man ẹkeme nditat utom ukwọrọikọ mmọ. (Mark 10:29, 30) Mbon eken ke ẹka iso ‘ndiyọhọ ke utom Ọbọn̄.’ (1 Cor. 15:58) Ediwak owo ẹmetan̄a eti mbụk an̄wan̄wa ke ediwak isua ye unana ediyok. (Heb. 10:23) Jehovah ada kpukpru utọ n̄waidem oro ẹnamde ke ufọn Obio Ubọn̄ ke ata ọsọn̄urua n̄kpọ.—Heb. 6:10.
4 Ndinam utuakibuot Jehovah edi akpan n̄kpọ ke uwem nnyịn, emi ẹsịnede utom ukwọrọikọ, an̄wam nnyịn nditi usen Jehovah. Enye iyakke ererimbot Satan ọwọn̄ọde ntịn̄enyịn nnyịn onyụn̄ ọsọn̄ọ ubiere nnyịn ndimụm ndisana idaha n̄kama. (2 Pet. 3:11-14) Ke akpanikọ, ndinyene nte ini edide usọp usọp ke ekikere ke ini inamde utom ukwọrọikọ nnyịn ekeme ndinyan̄a nnyịn ye mbon oro ẹkopde uyo nnyịn.—1 Tim. 4:16.